Silaka kaalimana: Binata piara namate
9
Naupu sia TUPU nanguli ka i Musa, “Koi tingayomo magau, bo uli ka ia ivei, ‘TUPU, Alatala nisomba kami ntoIbrani, nomparenta komiu palambamo todeaNa malai ala ira mombasomba Ia. 2 Ane ira ledo radekeimiu hau, 3 Ia mombadekei dua mpendai ka binata nipiaramiu, haitumo jara, keledai, unta, japi, bimba, bo tovaumiu. 4 TUPU ledo nompakasimbayu binata ntoIsrael bo binatamiu toMesir. Binata kami ntoIsrael nau sambaa ledo ria mamate. 5 TUPU nompakatantu maile rapoviaNa anu haitu.’ ”6 Eo kamailena TUPU novia anu niuliNa. Pura-pura binata ntoMesir namate, tapi binata ntoIsrael nau sambaa ledo namate. 7 Sabana haitu, magau nantudu tona hau momparesa binata ntoIsrael, bo mpuu-mpuu binata ntoIsrael ledo ria nau sambaa namate. Tapi magau da batena nakaa bagana bo ledo nidekeina todea haitu malai.
Silaka kaaonona: Dua bisu
8 Naupu sia TUPU nanguli ka i Musa bo i Harun, “Kakurakamo sanggaku avu lako ri talusi. Bo kamburakamo avu haitu ri laerava ri ngayo nu magau. 9 Jadi avu lako ri talusi haitu majadi sovu bo mavaro ri njumangu tana Mesir. Manusia bo binata mambela avu haitu madua bisu memboka majadi baka manana.”
10 Naliu haitu, niala i Musa bo i Harunmo avu lako ri talusi bo haumo ira nantingayo magau. I Musa nokamburaka avu haitu ri laerava. Jadipa toMesir bo binatara nipeumba bisu anu nemboka bo najadi baka nanana. 11 Toposibali mata domo namala hau nte i Musa, sabana nabisu njumanggaro nasimbayu mpo toMesir ntanina. 12 Tapi TUPU nompakakaa baga nu magau. Evamo niuliNa, ledo rapangala magau tesa i Musa bo i Harun.
Silaka kapapituna: Uda esi
13 TUPU nombatudu i Musa, “Pembangu masalisa maile mpadondo hau mantingayo magau, bo ulika magau ivei: TUPU, Alatala anu nisomba kami ntoIbrani, nomparenta komiu, palogamo todeaNa hau mombasomba Ia. 14 [Ane ledo radekeimiu,] hitupa silaka ledo aga radekeiNa ka tomaoge bo todea, tapi ka komiu muni, ala rasanimiu ledo ria ntanina ri dunia nasimbayu kakuasana nte TUPU. 15 Ane rapana TUPU madota mombahuku komiu bo todeamiu nte dua, tantu komiu mamate mpuumo. 16 Tapi Ia mompalamba komiu matuvu, ala mompopakita kuasaNa ka komiu, ala sangaNa rasani ntodea ri njumangu dunia. 17 Komiu da nompakalanga raramiu bo ledo nidekeimiu kami toIsrael malai. 18 Jadi, maile mpadondo, mpadondona eva hitu muni, TUPU mompopanau uda es nadaa mpuu anu dopa ria simbayuna najadi ri tana Mesir lako ri nggauluname sampe eo hitu. 19 Jadi parentamo ala pura-pura anumiu bo binata naria ri savalikuna rakeni mesua ri kaluuna. Pura-pura tona bo binata ri savalikuna anu ledo nekanaluu, mamate rarunju nu uda es.”
20 Bara sakondua tomaoge naeka nangepe tesa nTUPU. Jadi nikenira batua-batuara bo binatara nesua rabanua ala matejaga. 21 Tapi sanu tona ledo nompangala parenta haitu bo nompalamba batua-batuara bo binatara ri savalikuna.
22 TUPU nanguli ka i Musa, “Anggataka palemu ri laerava, bo uda es mombadunggu tana Mesir. Uda haitu mombadunggu manusia, binata bo pura-pura tuda-tuda ri talua.” 23 I Musa nombaanggataka tokona ri laerava, bo TUPU nompopepogu guru bo nompopanau uda es, bo kila novende ri tana. TUPU nombadekei uda es nte kila damo mparea nosinjalea sampe ri tana. 24 Haitumo uda es anu nadaa ntoto ri Mesir. Lako ri nggauluname sampe sii-sii dopa naria uda es nadaa ivehaitu. 25 Uda es haitu nompakamate mpengaya-ngaya anu naria ri savalikuna, nambela manusia bo binata. Pura-pura tuda-tuda ri talua naope bo kayu-kayu napatisaka. 26 Aga bagia Gosyen, anu niponturo ntoIsrael, ledo nauda es.
27 Naliu haitu, nipokio nu magaumo i Musa bo i Harun bo nanguli, “Nadosamo yaku. TUPUmo nakana, yaku bo todeaku novia sala. 28 Posambayamo merapi nte TUPU; nandasa mpuumo kami nikava nu uda es bo guru hitu. Kudekeimo komiu malai. Tumo monturo ri sii komiu.”
29 Nangulimo i Musa ka magau, “Pua, ane yaku malai lako ri ngata hitu, kuanggataka paleku bo kuperapi nte TUPU. Menontomo ngena kila bo uda es, ala rasanimiu dunia hitu TUPU Alatala tupuna. 30 Tapi nisaniku komiu bo tomaogemiu dopa naeka nte TUPU Alatala.”
31 Tuda-tuda rami bo pae jelai namate, sabana pae jelai da tempo novuli bo rami dako nosese.a 32 Tapi gando bo pae ntanina ledo namate sabana dopa tempona nituda.
33 Naliu haitu, i Musa nompalaisi magau bo hau ri savaliku ngata; hamai ia nanganggataka palena nosambaya nerapi nte TUPU. Tempo haitu muni nenontomo guru bo uda es. 34 Tempo magau nompeinta uda nenonto, dopa muni najea ia bo todeana. Ia bo todeana batena nakaa bagara bo da nipoviara dosa. 35 Evamo niuli nTUPU ka i Musa, nakaa baga magau bo ledo nidekeina toIsrael malai.