Silaka kauvaluna: Nggaboro
10
TUPU nanguli ka i Musa, “Koi tingayo vai magau. Tapi Yaku nompakakaa baga magau bo tomaogena, ala Kupovia tanda mabaraka ri ngayora, 2 bo mamala ratesakimiu ka anamiu bo muli-mulimiu berimbana Yaku nompongeika toMesir ante tanda-tanda nabaraka. Bo ala rasanimiu pura, Yakumo TUPU.”3 Naliu haitu, hau vai i Musa bo i Harun nantingayo magau bo nanguli tesa nTUPU, Alatala nisomba ntoIbrani ka ia ivei: “Sampe maipia iko ledo matundu nte Yaku? Dekeimo todeaKu malai, ala mamala ira metupu nte Yaku. 4 Ane da mupoarapa, maile Kupakatu nggaboro tulau ri ngatamu. 5 Njumangu bavo ntana mavuni nggaboro dea. Pura-pura labi nu tuda-tuda, bo kayu-kayu anu ledo namate tempo uda es, rapakaupu nggaboro haitu. 6 Banuamu, banua ntomaogemu, bo banua ntodeamu mabutu nggaboro. Silaka haitu melabipa kadaana pade anu nirasai ntotuamu lako ri nggauluname sampe sii-sii.” Naliu haitu nalaimo i Musa.
7 Nalaipa i Musa, nekutanamo tomaoge nte magau: “Sampe maipia tona gahautu mompakasusa kita? Dekeimo toIsrael hau metupu nte TUPU, Alatala nisombara. Peinta ngatata hitu nageromo!”
8 Magau nompokio mpanjili i Musa bo i Harun. Niulina, “Komiu mamala hau metupu nte TUPU Alatala. Tapi, isema pura komiu hau?”
9 Nesana i Musa, “Pua, hau pura kami, ngana kodi bo totua. Rakeni kami pura ana kami, japi kami, bimba kami, bo tovau kami, apa kami movia posusa mbaso mombabila TUPU.”
10 Magau nanguli, “Nee rasarumakamiu kudekei komiu manggeni mombine bo ana-anamiu! Nisanikumo akalamiu nadaa. 11 Ane komiu mpuu-mpuu madota metupu, aga langgai mamala hau metupu!” Naupu notesa ivehaitu magau, nipopalaisinamo i Musa bo i Harun. 12 Nangulimo TUPU ka i Musa, “Laerakamo palemu ri bavo ntana Mesir. Nggaboro-nggaboro makava mangande pura-pura tuda-tuda labina lako ri uda es.”
13 Jadi i Musa nombalaeraka toko ri palena bo TUPU nompopeburu poiri mpandake njumaeo njambongi ri ngata haitu. Napara naeopa, nikeni mpoiri haitumo nggaboro nadea mpuu, 14 sampe nabutu pura ri njumangu ngata. Dopa naria nipeinta ntona nggaboro nadea gaga ivehaitu, bo naliu haitu muni domo maria anu ivehaitu hanupa. 15 Nggaboro navuni ri njumangu bavo ntana sampe navuri puramo nikita. Nikandesi nggaboro pura kavoko anu ledo namate nidunggu nu uda es haitu, ivesia muni tuda-tuda ri talua bo kayu-kayu. Njumangu tana Mesir domo naria tava naramanta naboli, nau tava kayu bo tava nggavoko, nagali puramo.
16 Nasalisamo magau nompokio i Musa bo i Harun bo nanguli, “Nadosamo yaku nte TUPU Alatala nisombamiu bo nte komiu muni. 17 Ampungimo dosaku, bo perapimo nte TUPU Alatala, ala rakabasakaNa yaku lako ri pehuku mepakamate hitu.”
18 Naliu haitu nalaimo i Musa bo nosambaya nerapi nte TUPU. 19 TUPU nombagoliaka peburu mpoiri najadi poiri mpanau anu mpuu-mpuu narimboso. Nggaboro-nggaboro haitu niburusi mpoiri navaro hau ri Tasi Siroyomo. Nau sambaa domo ria naboli ri tana Mesir. 20 Tapi TUPU nompakakaa baga nu magau, sampe ledo nidekeina toIsrael malai.
Silaka kasasiona: Tana Mesir nitaulandana
21 TUPU nanguli ka i Musa, “Anggatakamo palemu ri laerava, ala rataulandana tana Mesir.” 22 Jadi i Musa nanganggataka palena ri laerava, bo talu eo kasaena tana Mesir nalanda mpirika. 23 ToMesir domo namala nanggita nuapa-nuapa bo domo namala hau riumba-umba tempo haitu. Tapi ri ponturo ntoIsrael batena nareme.
24 Naliu haitu nipokio nu magaumo i Musa bo Harun bo nanguli, “Koimo somba TUPU. Mombine bo ngana-ngana mamala metuntuni, tapi japi, bimba bo tovaumiu nemo rakeni.”
25 Nesana i Musa, “Pua, ane ivetutu tano, dekeimiu ka kami binata piara ratunu rapesomba ka TUPU, Alatala anu nisomba kami. 26 Pura-pura binata kami kana rakeni kami. Nau aga sambaa ledo raboli kami. Dopa nisani kami binata mbana raala lako ri binata kami haitu. Makava hamai pade rasani kami binata umbana rapesomba ka TUPU Alatala nisomba kami.”
27 Tapi TUPU nompakakaa baga nu magau sampe ia ledo nombadekei toIsrael malai. 28 Magau nanguli ka i Musa, “Palaimo lako ri ngayoku! Nee sampe da kukita vai iko! Ane da kukita lenjemu, mamate iko!” Ivesiamo magau nangompanaka i Musa.
29 Nesana i Musa, “Nabelomo. Domo hanupa kupeinta lenjemiu.”