Pesuvu 11

TUPU nompopaisani silaka kasapuluna ka i Musa

TUPU notesa ka i Musa, “Kupambela vai sangupa silaka ka magau Mesir bo todeana. Maliu haitu, radekeinamo komiu malai. Komiu pura rapopalaina lako ri sii. 2 Jadi koi uli ka toIsrael ira kana momperapi bulava poramba, bo salaka lako nte tona ri sinjorira.” 3 TUPU nompakaluu rara ntoMesir manggita toIsrael. Bo i Musa mboto najadi tona nibila ntomaoge bo todea ntoMesir.

4 Nangulimo i Musa ka magau, “Ivei panguli nTUPU: ri tanga bongi Ia mompesayoki tana Mesir. 5 Pura-pura ngana lumbua langgai ri tana Mesir mamate, mompamula lako ri ana nu magau sampe ana nu batua mombine anu nogili gando. Ana lumbua nu binata mamate muni. 6 Ri njumangu tana Mesir raepe tona motumangi mamangga, dopa naria najadi ivehaitu bo domo majadi hanupa. 7 Tapi ri bagia kami toIsrael, nau manusia bara binata ledo maria mamate. Bo rasanimiumo TUPU ledo nompakasimbayu komiu toMesir bo kami toIsrael.” 8 Kaupuna i Musa nanguli, “Pura-pura tomaoge ri ngatamiu makava bo mantaputu ri ngayoku bo merapi ala yaku bo todeaku mompalaisi ngata hitu. Maliu haitu malaimo yaku.” Narau mpuu rara i Musa bo nalaimo ia lako ri banua magau.

9 TUPU nanguli ka i Musa, “Ledo raparasaya nu magau tesamu, ala mantambaipa kadea kabaraka Kupovia ri tana Mesir.” 10 I Musa bo i Harun novia pura-pura kabaraka pangane ri ngayo nu magau, tapi TUPU nompakakaa baga nu magau, sampe ledo nidekeina toIsrael mompalaisi ngatana.