Posusa Paskah
12
TUPU notesa ka i Musa bo i Harun ri tana Mesir ivei: 2 “Mpae-mpae bula ivehitu majadi bula paratama mpae baru. 3 Ulimo parenta hitu ka pura-pura toIsrael: Manggava tanggala sapulu bula hitu, [kana rapoviamiu posusa ka Yaku.] Eo haitu pura-pura langgai kana mosambale sangu ana bimba bara ana ntovau bo rakandera mosinggani sambanua. 4 Ane ira sambanua ledo mompakule mangande pakaupu sangu ana bimba bara tovau haitu, kana rarondera tosambanuana ri sinjorira ala mamala ira mosinggani-nggani mangande pakaupu bau haitu. Pelisimo ana bimba bara tovau haitu sukana maupu rakande. 5 Komiu mamala mompelisi bimba bara tovau, tapi kana lakina, noumuru sampae, bo anu tobelona. 6 Komiu kana momboli binata haitu sampe tanggala sapulu ampa (14). Nggoviana eo haitu, pura-pura komiu toIsrael mosambale bimba bara tovau haitu. 7 Raana kana rareremiu sakide ri tinja nu vamba ntimali-mali bo ri bavo nu vamba ri banua rapangandemiu bau haitu.8 Bongi haitu muni bau haitu kana ratunu bo rakande nte uta napai bo roti ledo noragi. 9 Ana bimba bara tovau haitu kana ratunu nteangu, da nte balenggana, kadana, bo isi rarana. Kandemo bau nitunu haitu. Nemo rakandemiu bau haitu ane da namata bara radaka. 10 Nee raboli bau haitu sakidea sampe maile mpadondo. Ane maria labina, kana rapalabusi pakaupu.
11 Tempo mangande, komiu masadia puramo nte pakea mpolipa, sandale, bo kayu rapotoko. Komiu kana masalisa mangande. Haitumo Posusa Paskah anu mombabila Yaku, TUPU.
12 Bongi haitu ngena Yaku mompesayoki njumangu tana Mesir, bo mompatesi ana langgai lumbua ntoMesir, bo pura-pura binatara lakina anu nipoanaka paratama. Yaku mombahuku pura-pura viata anu nisomba ntoMesir, sabana Yakumo TUPU. 13 Tempo Yaku mombahuku toMesir, raa nirere ri vambamiu majadi tanda banua ponturo ntoIsrael. Ane Kupeinta raa haitu, Kuliunaka banuamiu bo ana lumbuamiu ledo Kupatesi. 14 Eo haitu kana rapoviamiu posusa ka Yaku. Posusa haitu kana rapoviamiu mpae-mpae sampe ri kasae-saena.”
Posusa Roti ledo noragi
15 TUPU nanguli, “Pitu eo kasaena komiu ledo mamala mangande roti noragi. Eo pamulana, pura-pura ragi rasuvurakasi lako riara banuamiu, apa ane maria komiu mangande roti noragi riara minggu haitu, ia domo rareke todeaKu. 16 Eo pamulana bo eo kapapituna, komiu kana masiromu metupu bo ledo mamala mokarajaa nuapa-nuapa, aga anu paraluu rakandemiu namala rapasadiamiu.
17 Eo haitu, pura-pura todeamiu Kukeni mesuvu lako ri tana Mesir. Sabana haitu, mpae-mpae sampe muli nu mulimiu, eo haitu kana ratoramiu bo rapoviamiu posusa. 18-20 Riara bula pamulana, nompamula tanggala sapulu ampa (14) bongina, sampe tanggala ropulu sangu (21) bongina, ledo mamala komiu mangande roti nidika ragi. Riara pitu eo haitu, ledo mamala rakava ragi riara banuamiu. Isema-sema nangande roti noragi ri tempo posusa haitu, ia ledo rareke todeaKu, naupa ia toIsrael, bara topesovo. Nee ntoto mangande nuapa-nuapa nipovia ante ragi. Ri umba-umba rakalaumiu ri tempo posusa haitu, aga roti ledo noragi rakandemiu.”
Posusa Paskah paratama
21 Naliutaka haitu pade nironde i Musamo pura-pura pakeni ntoIsrael bo niulikana ira, “Koi ala sangu ana bimba bara ana ntovau ka komiu sambanua rapake posusa paskah. 22 Alamo sampou kavoko hisop ratome ri raa nu bimba bara tovau haitu bo rereka tinja nu vamba ntimali-mali bo ri bavo vamba nu banuamiu. Nemo maria saitoa komiu mompalaisi banuamiu sampe maeo mpadondo. 23 Bongi hitu TUPU mompesayoki ngata hitu mompatesi ana lumbua ntoMesir. Ane rapeintaNa raa ri tinja nu vamba ntimali-mali bo ri bavo vamba banuamiu, raliunakaNa banuamiu. Ledo radekeiNa malaeka mpepatesi mombasuaki banuamiu mompatesi ana lumbuamiu.
24 Komiu bo mulimiu kana mangoseaka parenta haitu sampe ri kasae-saena. 25 Ane komiu mesuamo ri tana nijanji nTUPU ka komiu, komiu kana movia posusa hitu. 26 Ane anamiu mekutana, ‘Nuapa batuana posusa hitu?’ 27 Komiu kana mesana ivei: ‘Ada Posusa Paskah hitu nipoviata mombabila TUPU, sabana niliunakaNa banuata ntoIsrael ri tana Mesir. Tempo Ia nompatesi ana lumbua ntoMesir, nipalambaNa kita natuvu!’ ”
Naupu i Musa notesa ivesia, nantaputumo toIsrael bo nombasomba TUPU. 28 Naliu haitu haumo ira novia anu niparenta nTUPU ka i Musa bo i Harun.
Ana-ana lumbua nipatesi
29 Tanga bongi haitu TUPU nompatesi pura-pura ana langgai lumbua ntoMesir, nompamula lako ri ana magau sampe ana ntona ri tarunggu. Pura-pura binatara lakina anu nipoanaka paratama nipatesi muni. 30 Bongi haitu magau, tomaoge, bo pura-pura toMesir nembangu. Ri njumangu tana Mesir, niepe suara ntopotumangi namangga mpuu sabana sabana ri pura-pura banua ntoMesir naria kamate ana langgai lumbua.
31 Bongi haitu muni, magau nombaronde i Musa bo i Harun bo nanguli, “Palaimo komiu pura-pura lako ri sii! Palaisimo ngataku! Koimo somba TUPU evamo niperapimiu. 32 Kenimo japi, bimba, bo tovaumiu, bo koimo! Perapi muni rasi bo belo ka yaku!”
33 ToMesir nombasaravi-ravi toIsrael ala masalisa mompalaisi ngata haitu. Nanguli ira, “Mamate pura kami ane ledo masalisa komiu malai!” 34 Jadi, niala ntoIsraelmo kura tana bo niisira roti ledo nidika ragi, nibungura nte kae, bo nisimbuakara. 35 Nipoviara muni anu niparenta i Musa ka ira, haitumo niperapira bulava, salaka bo pakea nte toMesir. 36 TUPU nompakaluu rara ntoMesir nte toIsrael, sampe nidekeira anu niperapi ntoIsrael. Ivesiamo toIsrael nanggeni kakalumana ntoMesir nesuvu lako ri ngata haitu.
ToIsrael nompalaisi tana Mesir
37 Naupu haitu, haumo toIsrael nolipa lako ri ngata mbaso Ramses hau ri ngata Sukot. Onoatu njobu (600.000) kadeana ira, ledo nireke mombine bo ngana-ngana. 38 Nadea japi, tovau bo bimba nikenira. Nadea muni topesovo netuntuni. 39 Ira nombatunu roti ledo noragi anu nikenira lako ri Mesir. Ira nipopalai njara-njara lako rahaitu, sampe ledo nakapo nompasadia baku.
40 ToIsrael pataatu talupulu (430) mpaemo kasaena nonturo ri tana Mesir. 41 Eva nisuka, eo haitu nagana pataatu talupulu (430) mpae ira nonturo ri tana Mesir, bo eo haitu muni pura-pura todea nu Alatala, haitumo toIsrael, nompalaisi tana Mesir. 42 Bongi haitu Alatala nombajaga bo nanggeni ira nesuvu lako ri tana Mesir. Jadi bongi haitu najadi bongi pepatora ala mombabila TUPU. Mpae-mpae, todea toIsrael kana mojaga-jaga bongi pepatora haitu sampe ri kasae-saena.
Atura-atura posusa Paskah
43 TUPU nanguli ka i Musa bo i Harun, “Hitumo atura posusa Paskah:
Topesovo ledo mamala mangande bau bimba bara tovau anu nipesomba ri Eo Paskah. 44 Tapi batua nialimiu mamala mangandena, ane nisunamo ia. 45 Topesovo bara batua nitambo ledo mamala mangandena. 46 Pura-pura bau haitu kana rakande rabanua, bo ledo mamala rakeni ri savalikuna. Nau sangu bukuna, nemo rapakakoto. 47 Pura-pura toIsrael kana movia Posusa Paskah haitu. 48 Tona ledo nisuna ledo mamala mangande kandea posusa haitu. Ane topesovo anu naroo nte komiu madota mombabila YAKU, bo mosusa Paskah, pura-pura langgai riara banuana kana rasuna ntani. Maliu rasuna, ira pade rareke toIsrael mpuu, bo mamalamo mantuntuni Posusa Paskah. 49 Atura haitu nipake ka toIsrael bo ka topesovo anu naroo nte komiu.”