Ana lumbua radekei ka TUPU
13
1-2 TUPU notesa ka i Musa, “Dekeimo pura-pura ana langgai lumbua ntoIsrael ka Yaku. Dekei muni pura-pura ana binata lakina paratama nipoanaka. Pura-pura manusia bo binata gahaitu, Yaku tupuna.”Posusa Pepatora Roti Ledo Noragi pamulana
3 Naupu sia i Musa notesa ka todea Israel, “Eo hitu TUPU nombakabasaka kita ante kuasaNa nambaso lako ri tana Mesir, ri tana niponturota tempo kitaa nipobatua. Sabana haitu, toramo eo hitu bo poviamo Posusa Pepatora Roti Ledo Noragi. Ri posusa haitu nemo mangande roti nidika ragi. 4 Eo hitu tanggala sangu bula sangu, haitumo bula Abib, kita nompalaisi tana Mesir. 5 Alatala nojanji roso ka totuata nggaulu Ia mombadekei ka kita ngata ntoKanaan, toHet, toAmori, toHewi bo toYebus. Maliu TUPU manggeni kita hau ri ngata nakalumana bo naboya haitu, mpae-mpae riara bula Abib, kita kana movia Posusa Pepatora Roti Ledo Noragi hitu. 6 Riara pitu eo, kita ledo mamala mangande roti nidika ragi, bo ri eo kapapituna kita kana movia posusa mombabila TUPU. 7 Jadi pitu eo kasaena kita ledo mamala mangande roti noragi, bo ri njumangu ngatata ledo mamala maria ragi bara anu ntanina nidika ragi. 8 Ri eo pompamula posusa haitu, kita kana mombatesaki ka ana-anata, berimba TUPU nombatulungi kita nesuvu lako ri tana Mesir. Haitu sampe kita novia posusa hitu ala ratorata. 9 Posusa hitu najadi pepatora ka kita, nasimbayu eva tanda nipou ri palemiu bara ri balenggamiu. Posusa hitu mompopatora ka kita, kita kana batena meguru bo motesaki atura nTUPU, sabana TUPU nombasuvuraka kita lako ri tana Mesir ante kuasaNa nambaso. 10 Posusa hitu rapoviata mpae-mpae ri tempo nipakatantu.”
Batuana pombadekei ana lumbua
11 I Musa nanguli ka todea toIsrael, “TUPU manggeni kita hau ri tana Kanaan anu nijanjiNa nte sumpa ka kita bo totuata nggaulu. Ane tana haitu majadi tanatamo, 12 kita kana mombadekei ana langgai lumbuata bo ana binata lakina anu paratama nipoanaka. Pura-pura haitu TUPUmo tupuna. 13 Tapi ana-ana nu keledai lakina anu nipoanaka paratama, kana ratolokita ante sangu ana bimba radekei ka TUPU. Ane kita ledo madota mombasambei ana keledai haitu, tambolo nu keledai kana rakotosi sampe mamate. Tapi pura-pura anata langgai lumbua kana ratoloki.
14 Ane nggapurina ngena anata mekutana nuapa sabana kita nombadekei ana lumbuata ka TUPU, kita kana mesana ivei: ‘Ante kuasaNa nambaso TUPU nanggeni kita lako ri tana Mesir, tana niponturota tempo kita nipobatua. 15 Tempo magau Mesir nakaa bagana bo ledo nombadekei kita malai, TUPU nompatesi pura-pura ana langgai lumbua ntoMesir, bo pura-pura ana binata lakina anu paratama nipoanaka. Haitumo sampe ana binata lakina anu paratama nipoanaka kana radekeita majadi pesomba ka TUPU, tapi anata langgai lumbua kana ratolokita.’ 16 Kabiasa haitu majadi tanda pepatora ka kita, nasimbayu eva tanda nipou ri paleta bara ri balenggata. Ivesiamo, kita batena rapopatora TUPU nombasuvuraka kita lako ri tana Mesir ante kuasaNa nambaso.”
Tinja kulimu bo tinja apu
17 Naliu magau Mesir nombadekei toIsrael nalai, Alatala ledo nanggeni ira noliu ri ngata ntoFilistin, naupa dala haitu napara ntoto. Alatala nanguli, “Nee-nee ane rasanira ira kana mosieva, tantu manjoso rarara bo manjili ira hau ri tana Mesir.” 18 Sabana haitu, Alatala nanggeni ira nodala ntaenggo ri karava bai hau ri Tasi Siroyo. Tempo nompalaisi Mesir, ira nanggeni pareva eva tona hau mosieva.
19 I Musa nanggeni buku-buku mboa i Yusuf, sabana tempo i Yusuf da natuvu, nituduna toIsrael mojanji movia anu niulina. Ivei tevai i Yusuf: “Tempo Alatala mombakabasaka komiu ngena, bukuku kana rakenimiu lako ri sii.”
20 ToIsrael nompalaisi ngata Sukot bo notenda ri Etam, ri soso nggarava bai. 21 Eona TUPU nokolu riara tinja kulimu, bongina Ia nokolu riara tinja apu ala mompakareme dala. Ivesiamo ira namala molipa eo bongi. 22 Eona tinja kulimu batena naria ri ngayora bo bongina tinja apu batena nosanggani nte ira.