ToIsrael novote Tasi Siroyo
14
Ri ngata Etam TUPU nanguli ka i Musa, 2 “Tudumo toIsrael manjili mpanjili bo motenda ri ngata Pi-Hahirot, ri olo ngata Migdol bo Tasi Siroyo, nantingayo ngata Bal-Zefon. 3 Rasarumaka magau Mesir, komiu toIsrael naeka modala ri karava bai bo aga nolinggura ri ngata hitu mangelo dala ntanina. Karava bai nombalava dalara hau ri mpandakena. 4 Yaku mompakakaa baga magau Mesir bo ia mombaraga komiu. Tapi Kupopakita kuasaKu ka ia bo tantarana, ala rasanira Yakumo TUPU.” Pade nipovia ntoIsrael mpuumo anu niparenta nTUPU ka ira.5 Tempo magau Mesir nangepe toIsrael nalaimo, ia bo tomaoge-tomaogena nanjoso rara bo nanguli, “Hai! Nuapamo nipoviata? Nakuya nipalambakata toIsrael nalai sampe domo naria batuata?” 6 Jadi nitudu magaumo tadulakona mompasadia doka posieva bo tantarana. 7 Haumo ira nombaraga toIsrael. Nikenira ono atu (600) doka posieva tobelona, bo nikenira muni pura-pura doka posieva ntanina. Sangu-sangu doka naria pakeni ntantara nesavi ri sia. 8 TUPU mpuu-mpuu nompakakaa baga magau Mesir, sampe ia nombaraga toIsrael. Tapi toIsrael aga nompapola polipara bo TUPU nombajagai iraa. 9 Tantara Mesir anu nesavi jara bo nesavi doka posieva, bo tantara anu aga nolipa nombaraga toIsrael sampe nakava ri potendara ri talinti ntasi napara ngata Pi-Hahirot.
10 Tempo toIsrael nompeinta magau Mesir nte tantarana naparamo, naeka mpuu ira bo nongare nerapi tulungi nte TUPU. 11 Nangulimo ira ka i Musa, “Ledo ria tana rapodayo ri Mesir, sampe komiu nanggeni kami mamate ri karava bai hitu? Peinta vei asele mpoviamu! 12 Tempo da ri Mesir niuli kami mamimo ka komiu, anu ivehitu majadi! Niuli kamimo, nee rabato kami! Dekeikamo kami batena majadi batua ri tana Mesir! Nabelopa mamate hamai pade mamate ri karava bai hitu!”
13 Nesana i Musa, “Nee maeka! Pakaroo raramiu! Rapeintamiu ngena nuapa rapovia nTUPU mompakasalama komiu. ToMesir anu nikitamiu eo hitu, domo rapeintamiu hanupa. 14 TUPU mangeva ira, bo komiu ledo paraluu movia nuapa-nuapa.”
15 TUPU notesa ka i Musa, “Nakuya iko nongare nekitulungi? Tudumo toIsrael mapola! 16 Laerakamo tokomu ri bavo ntasi. Uve mogaa bo toIsrael mamala mombavote tasi bo molipa ri tana bai. 17 Kupakakaa baga ntoMesir sampe ira mombaraga njuu komiu toIsrael, bo Kupopakita kuasaKu ka magau Mesir, bo ka tantarana anu nolipa, bara anu nesavi jara bara doka mposieva. 18 Tempo Yaku mombadagi magau Mesir nte tantarana ngena, rasani pura-pura ntoMesirmo, Yakumo TUPU.”
19 Malaeka nu Alatala anu nolipa ri ngayo ntoIsrael, nolinja ri puri. Bo nolinja muni tinja kulimu hau ri puri sampe netaa ri olo tantara Mesir bo todea toIsrael. 20 Kulimu haitu nompakalanda bagia ntoMesir bo nompakareme bagia ntoIsrael, sampe njambongi haitu tantara Mesir bo todea Israel ledo namala nosinggaparai.
21-22 Pade i Musa nombalaeraka palena ri bavo ntasi, bo TUPU nompopeburu poiri rimboso lako ri mpandakena sampe uve ntasi noura. Njambongi ntua poiri haitu neburu, bo uve ntasi nogaa natebagi randua bo nabaimo ri tatangana. Tempo toIsrael nombavote tasi, ira nolipa ri tana bai, bo uve ri panggai bo pangganara eva rindi.
23 ToMesir ante pura-pura jara, doka ante topesavina nombaraga toIsrael sampe ri tatanga ntasi. 24 Nabobayapa, TUPU naria riara tinja apu bo kulimu. Ia nompeintaka tantara Mesir bo nipakagadoNa. 25 NipakatetubeiNa roda-roda nu dokara, sampe nakaja mpuu ira nompapola polipara. Nangulimo toMesir, “TUPU nombatulungi toIsrael bo nangeva kita. Anumo, malaimo kita lako ri sii!”
26 Nangulimo TUPU ka i Musa, “Laerakamo palemu ri bavo ntasi, ala uve mosiumpu mpanjili eva batena, bo mompakalome toMesir, doka-doka bo topesavi jara.” 27 Jadi nilaeraka i Musamo palena ri bavo ntasi bo tempo maravanjakamo, uve nosintomu mpanjili mpo batena. ToMesir nompasimbuku nompakasalama karora, tapi TUPU nompakalome ira riara ntasi. 28 Uve ntasi nobaluu bo nombatampunisi doka-dokara, topesavi-topesavina, bo pura-pura tantara Mesir anu nombaraga toIsrael sampe ri tatanga ntasi pangane, sampe ira namate puramo. 29 Tempo toIsrael nombavote tasi pangane, ira nolipa ri tana bai, bo uve eva rindi ri panggai bo pangganara.