Dade i Musa
15
Naupu sia, i Musa bo toIsrael singgani-nggani nompodadeka dade hitu mombatoiya TUPU.“Yaku modade mombatoiya TUPU,
sabana Ia nombadagi baliNa nte kuasa nipokumaaka.
Pura-pura jara bo topesavina eva nitedeakaNa riara ntasi.
2 TUPU nombasaliku yaku bo yaku nodade sabana Ia;
Iamo nompakasalama yaku.
Ia Alatala anu nisombaku, kutoiya Ia.
Ia Alatala nisomba ntotuaku, kupakaoge Ia.
3 TUPU tadulako naroso,
TUPUmo sangaNa.
4 Tantara nu magau Mesir bo pura-pura dokara eva nitedeakaNa riara ntasi.
Tadulako rosona naonga ri Tasi Siroyo.
5 Ira nilomesi ri tasi ndala,
eva vatu nalome hau ri tambena.
6 O Pue, karosoMiu mpuu-mpuu nipokumaaka.
Komiu nompakaropu pura baliMiu.
7 NipakamateMiu pura topangeva Komiu ante kuasaMiu nambaso.
KarauMiu navaya mpo apu, bo nombatunju ira mpo nombatunju jami.
8 Tasi nitavusiMiu, uvena nobaluu nalanga, nobaku neangga mpo rindi,
sampe ri tatanga ntasi namala niose.
9 Bali kami nanguli, ‘Raragata ira bo rasakata,
raosuta gumata, bo rapakaroputa ira.
Raagosita pura kakalumanara,
raalata pura anu nipodotata bo rapaketa sampe maosa rarata.’
10 Tapi Komiu, PUE, aga sanggani nitavusiMiu, nosintomu mpanjilimo uve ntasi.
Ira nalomemo eva vatu ntamo nitedaka ri uve oge.
11 O PUE, ledo ria Alatala nasimbayu mpo Komiu.
Komiumo naoge bo nakuasapa pade tupu-tupu ntanina.
Komiu namala novia kabaraka-kabaraka.
KaogeMiu nipokumaaka!
12 NianggatakaMiu pale nggana,
naopo puramo baliMiu niomesi ntana.
13 NikeniakaMiu kami todea nipakasalamaMiu hitu,
sabana toveMiu ledo ria kaupu-upuna.
Kami nilendutiMiu, bo nikeniMiu hau ri ponturo nipelisiMiu ante karosoMiu nambaso.
14-15 Tona ri ngata-ngata ntanina nolete nangepena;
ToFilistin bo pakeni-pakeni ngata Edom naviora.
Nau toMoab naroso, nolete muni.
Pura-pura toponturo ri tana Kanaan nolete bo naeka.
16 O PUE, ira naeka sabana nikitara karosoMiu.
Tempo kami todeaMiu noliu ri ngatara,
bali kami ledo nompakule nombalava kami.
Natepaliumo kami, todea anu nikabasakaMiu.
17 Pade nikeniMiu kami toIsrael hau ri ponturo nipelisiMiu raponturoMiu mboto.
Kami maroo ri bulu nipelisiMiu, ri banua nipopeanggaMiu mboto.
18 Komiumo TUPU, momparenta sampe ri kasae-saena.”
[Ivesiamo dade i Musa.]
Dade i Miryam
19 Tempo toIsrael nombavote tasi, ira nolipa ri tana bai ri tatanga ntasi. Tapi tempo doka-doka mposieva ntoMesir ante topesavi jara nesua riara ntasi, TUPU nompoposintomu mpanjili uve ntasi sampe nalome ira. 20 I Miryam, saito nabi, tuaka i Harun, nangala tamburen, bo pura-pura mombine nantuntuni ia notamburen bo nolodi-lodi. 21 I Miryam nodade ka ira,
“Podademo mantoiya TUPU,
sabana Ia padagi nipokumaaka.
Pura-pura jara bo topesavina,
eva nitedeakaNa riara ntasi.”
Uve napai
22 Naliupa haitu, nikeni i Musamo toIsrael lako ri Tasi Siroyo hau ri karava bai Syur. Talu eo kasaena ira nolipa ri karava bai ledo nanggava uve. 23 Jadipa nakavamo ira ri ponturo anu nosanga Mara bo ri sia naria uve. Tapi uve ri sia napai leke, sampe ledo namala niinu. Haitumo sabana nipoposanga Mara, batuana “napai”. 24 Jadi toIsrael gahaitu nongaumo ka i Musa, bo nekutana, “Nuapa rainuta?”
25 I Musa mpuu-mpuu nekakai nte TUPU, pade nituduaka nTUPUmo ka ia sanggoto kayu. Kayu haitu nitendeaka i Musa riara nu uve, bo uve haitu domo napai bo namalamo niinu.
Ri siamo TUPU nombadekei atura-atura ka ira, bo ri sia muni Ia nombauji ira. 26 TUPU nanguli, “Pariaramo tesaKu bo poviamo anu nabelo ri panggitaKu; oseakamo pura-pura parentaKu. Ane movia ivesia komiu, ledo Kuhuku komiu ante dua-dua nipambelaKu ka toMesir, apa Yakumo TUPU nompakabelo komiu.”
27 Naliu haitu, ira nakava ri ponturo nosanga Elim. Ri sia naria sapulu randua mata nu uve bo pitu pulu kayu kurma. Ira notenda napara uve haitu.