Manna bo tonji rombo
16
ToIsrael nalai lako ri ponturora nosanga Elim. Tanggala sapulu alima (15), karombulana ira nompalaisi tana Mesir, ira nakava ri karava bai Sin, ri olo Elim bo bulu Sinai. 2 Ri karava bai haitu pura-pura todea nongau ka i Musa bo i Harun. Nanguli ira, 3 “Aginamo kami monturo ri tana Mesir, bo dekeikamo TUPU mompatesi kami hamai! Hamai naoge bau bo nadea roti nagana nikande kami sampe nabosu. Nagana pangande kami hamai, tapi hitupa nikenimiu kami tumai ri karava bai hitu bo nompalamba kami mamate maara.”4 Pade nangulimo TUPU ka i Musa, “Yaku mombanavusaka kandea ka komiu eva uda lako ri langi. Eo-eo komiu mompasiromu kandea haitu sukana rakandemiu saeo. Yaku mombauji todeaKu ante poviaKu hitu, ala Kusani bara raoseakamiu parentaKu bara ledo. 5 Ri eo kaaonona komiu kana mompasiromu kandea ronggani kadeana eva biasana nipasiromumiu eo-eo.”
6 Jadi nangulimo i Musa bo i Harun ka toIsrael, “Nggoviana hitu rasanimiumo TUPU mpuu-mpuu nanggeni komiu nesuvu lako ri Mesir. 7-8 Maile mpadondo komiu manggita reme kuasa nTUPU. NiepeNamo pongaumiu. Kakanana komiu nongau ka TUPU, ledo nongau ka kami sabana kami aga novia anu niparentaNa ka kami. Ia mombadekei bau rakandemiu nggoviana bo roti rakandemiu mpadondona. Rasanimiumo Ia mpuu-mpuu nangepe pongaumiu.”
9 Naliu haitu, i Musa nangulika i Harun manguli ka todea makava ri ngayo nTUPU, apa niepe nTUPUmo pongaura. 10 Da notesa i Harun ka ira, nipeilira karava bai bo sampesanika nikitara reme kuasa nTUPU ri kulimu.
11 Nangulimo TUPU ka i Musa, 12 “NiepeKumo pongau ntoIsrael. Ulikamo ira, nggoviana ira mamala mangande bau, bo mpadondona ira mamala mangande roti sampe mabosu. Bo rasaniramo Yakumo TUPU, Alatala nisombara.”
13 Nggoviana haitu nakavamo tonji rombo nadea mpuu nombavuniti njumangu potenda. Bo mpadondona nanaumo leni ri njumangu potendara. 14 Nosumoapa leni ri tana haitu, neumbamo anu napeka-peka nakodi, nalusu eva kulimu nobaku. 15 Tempo toIsrael nompeinta anu haitu, ledo nisanira nuapa haitu. Jadi nosimpekutanamo ira, “Nuapa hitu?”
Jadi nangulimo i Musa, “Tutumo kandea nidekei nTUPU ka komiu. 16 TUPU nanguli rapasiromu sukana paraluu, haitumo simbo rolite saito.”
17 Iveimo nipovia ntoIsrael: naria sanu tona nompasiromu nelabi rolite ka tona saito bo naria muni nakura. 18 Nisukarapa ante posuka, tano mai tona nompasiromu nadea ledo muni nelabi, bo tona nakura pompasiromuna ledo muni nakabu. Simbo nompasiromu sukana niparaluura.
19 I Musa nanguli ka ira, “Nau isema, nee mpuu momboliaka kandea hitu nau aga sakide sampe maile.”
20 Tapi bara sakondua ira ledo nepangala niulika i Musa. Nibolira sabagia kandea haitu. Kamailena, kandea haitu nakaulemo bo navau. Jadipa naraumo i Musa ka ira.
21 Mpadondo-mpadondo ira nompasiromu kandea haitu sukana niparaluura, bo ane nompamulamo eo napane, kandea haitu nagonumo.
22 Eo kaaonona ira nompasiromu kandea haitu ronggani kadeana, haitumo pata lite kadeana ka tona saito. Pade pakeni-pakenira nakava nompopaisani ka i Musa. 23 Nangulimo i Musa ka ira, “TUPU nanguli maile eo penonto, haitumo, eo nitaniaka rapombabila TUPU. Eo haitu komiu kana menonto, ledo mamala mokarajaa. Jadi eo hitu nuapa rapodotamiu ratunumiu, tunumo, nuapa rapodotamiu radakamiu, dakamo. Bolimo labina rakande maile.”
24 Jadi kandea labina haitu nibolira ka eo maile nanturusi anu niparenta i Musa ka ira. Kandea haitu ledo navai bo ledo nakaule. 25 I Musa nanguli, “Hitumo kandeamiu eo hitu, sabana eo hitu eo penonto, eo rapombabila TUPU. Eo hitu, nau aga sakide, ledo rakavamiu kandea ri savaliku potenda. 26 Aono eo kasaena komiu nompasiromu kandea, tapi eo kapapituna eo penonto, bo ledo maria kandea rapopanau eo hitu.”
27 Nau niuli i Musa ivesia, ri eo kapapituna kana naria bara sakondua ira hau mompasiromu kandea, tapi ledo ria nikavara nuapa-nuapa. 28 Pade nangulimo TUPU ka i Musa, “Sampe maipiapa komiu ledo mangoseaka parentaKu? 29 Toramo! Yaku nombadekei ka komiu saeo eo penonto. Haitumo sampe eo kaaonona Yaku nombadekei kandea sukana rakandemiu ro eo. Bo eo kapapituna komiu kana menonto simbo ri tendamiu mboto, bo ledo namala mesuvu mangelo kandea bara mokarajaa.” 30 Sabana haitu ri eo kapapituna ira nenontomo nokarajaa.
31 Kandea haitu niuli ntoIsrael manna.a Lenjena napeka nakodi bo naputi. Rasana eva roti nidika manisa. 32 Nangulimo i Musa, “TUPU nombatudu kita mangala ‘manna’ nitasere ro lite raboli ka mulita, ala rakitara kandea nidekei nTUPU ka kita ri karava bai, tempo kita nikeniNa nesuvu lako ri tana Mesir.”
33 Jadi i Musa nanguli ka i Harun, “Ala sangu kura bo raisi manna nitasere ro lite bo dika ri ngayo nTUPU ala raboli ka mulita.”
34 Jadi nidika i Harunmo kura haitu ri ngayo nu Peti Pojanji, raboli nangoseaka parenta nTUPU ka i Musa. 35 Manna haitu najadi kandea ntoIsrael patapulu mpae kasaena sampe ira nakava ri tana Kanaan, ngata nikaroora. 36 (Posuka nabiasa nipake ntona tempo haitu, nosanga efa bo noisi ropulu liter kadeana.)