Uve nesuvu lako ri vatu mbaso
Bilangan 20:1-13
17
Hau puramo toIsrael nompalaisi karava bai Sin bo nompapola polipara. Ira nolinja-linja nangoseaka parenta nTUPU ka ira.Nakava ri Rafidim, notenda vai ira tapi ri sia ledo ria uve. 2 Jadipa nongau vaimo ira ka i Musa bo nanguli, “Dekei ka kami uve rainu!”
Nesana i Musa, “Nakuya komiu nongau bo nombasapuaka TUPU?”
3 Tona gahaitu nabai ntoto tambolora bo nongau-ngau njuu ka i Musa. Ira nanguli, “Nakuya bo nikenimuka kami nesuvu lako ri Mesir? Rapalambamiu kami nte ana-ana kami, bo muni binata kami mamate makabaisa ri sii?”
4 Jadipa nosambayamo i Musa ivei, “Nuapa kupovia ka todea gahitu? Peintamo, rarempera vatumo yaku!”
5 Nangulimo TUPU ka i Musa, “Unakamo bara sakondua pakenira bo polipamo singgani-nggani nte ira mokolu ka todea haitu. Keni muni toko nipakemu nombaboba binangga Nil baipia. 6 Yaku meangga ri ngayomu ri bavo vatu mbaso ri Bulu Sinaia. Bobamo vatu haitu nte tokomu, bo uve mesuvu lako ri vatu haitu sampe tona gahaitu mamala manginu.” I Musa nangoseaka anu niuli nTUPU ri ngayo ntodea [bo nesuvu mpuumo uve lako ri vatu haitu].
7 Rahaitu nipoposanga Masab sabana ri sia toIsrael nombasapuaka TUPU apa ira nekutana, “Naria mpuu TUPU nomporoa kita?” Bo rahaitu muni nipoposanga Meribac sabana pongau ntoIsrael.
Posieva ante toAmalek
8 ToAmalek nakava nombasuu toIsrael ri Rafidim. 9 Nanguli i Musa ka i Yosua, “Pelisimo bara sakondua todeata mombaeva toAmalek. Maile yaku meangga ri buntina bo mombatipale toko nitudu nTUPU kukeni.”
10 I Yosua nangoseaka anu niparenta i Musa ka ia. Haumo ira mangeva toAmalek. I Musa, i Harun bo i Hur hau nantende ri buntina. 11 Ane raanggataka i Musa njuu palena, toIsrael padagi. Tapi ane ratorakana palena, toAmalek padagi. 12 Namagapa nirasai i Musa, niala i Harun bo i Hurmo vatu raponturona. I Harun bo i Hur neangga ri sabingga njidi bo sabingga nggana i Musa nombatande palena ala batena mateanggataka sampe masolo eo. 13 Kaupuna i Yosua bo todeana nombadagi toAmalek.
14 Nangulimo TUPU ka i Musa, “Tulisimo kajadia padagi hitu ala batena ratora. Ulimo ka i Yosua, Yaku mompakaropu toAmalek sampe domo ratora ntona ira.”