I Yitro hau nompeinta i Musa
18
I Yitro, matua i Musa, saito topanggeni pesomba ri tana Midian. Niepe i Yitro mpengaya anu nipovia nu Alatala ka i Musa bo todea toIsrael, tempo i Musa nanggeniaka toIsrael nompalaisi tana Mesir. 2 Baipia i Musa nantudu bereina i Zipora hau manjili nte tuamana. Jadi hitupa haumo i Yitro mompeinta i Musa bo nikenina i Zipora anu da nonturo ri tana Midian, 3 nosinggani nte randua anana langgai i Gersom bo i Eliezer. Ana lumbuana nipoposanga i Gersoma sabana i Musa nanguli, “Yaku topesovo lako ri sangatana.” 4 Anana karanduana nipoposanga i Eliezerb, sabana niuli i Musa, “Alatala anu nisomba ntotuaku nggaulu, nombatulungi bo nompakasalama yaku sampe yaku ledo nipatesi nu magau Mesir.”5 Jadi haumo i Yitro nosinggani-nggani nte berei i Musa ntaliana ri karava bai nipotenda i Musa napara bulu nu Alatalac. 6 Naria kareba nipakatu ka i Musa, nakavamo matuana i Yitro, ante berei i Musa bo anana randua. Ira madota mosinggava nte i Musa. 7 Jadi nesuvumo i Musa nombakadambanaka ira. I Musa nekanaede ri ngayo i Yitro bo niekina. Ira nosimpekutana kareba pade nesua rantenda i Musa. 8 I Musa nombatesaki ka matuana mpengaya-ngaya anu nipovia nTUPU ka magau Mesir bo todeana tempo nompakasalama toIsrael. Nitesana muni kasusa nitingayo ntoIsrael riara mpolipara, bo berimbana TUPU nompakasalama ira.
9 Nadamba mpuu rara i Yitro nangepe pura-pura anu nabelo nipovia nTUPU ka toIsrael tempo nalai lako ri tana Mesir. 10 Niulina, “Ratoiyamo TUPU anu nompakasalama komiu lako ri kuasa nu magau bo lako ri pepandasa ntoMesir! Ratoiyamo TUPU anu nombakabasaka toIsrael lako ri pobatua! 11 Hitupa nisanikumo TUPU nakuasapa pade pura-pura tupu ntanina, sabana pura-pura anu nipoviaNa ka toMesir anu nompandasa toIsrael.” 12 Naliu haitu, i Yitro nanggeni binata rapalabu bo bara sakuya binata ntanina rasambale, pura-pura rapesomba ka Alatala. I Harun bo pura-pura pakeni ntoIsrael nakava nangande singgani nte i Yitro ri ngayo nu Alatala.
I Musa nanganggataka topotangara
Ulangan 1:9-18
13 Eo kamailena, i Musa nombatangara parakara-parakara ntona anu nakava nte ia. Ia nombatangara lako ri mpadondona sampe nabongi. 14 Matuana nanggita ia, nadea mpuu tempo nipakena notangara. Nangulimo ia, “Nakuya aga iko saitomu nantingayo potangara njumaeo, bo todea neangga nantagui iko lako ri mpadondona sampe nabongi?”
15 Nesana i Musa, “Tona gahaitu nakava nte yaku ala rasanira dota nu Alatala. 16 Ane ira nosinggarau, ira nakava ri ngayoku ala yaku mombabotusi parakarara, bo yaku nompasimbayu parenta-parenta bo atura-atura nu Alatala ka ira.”
17 Nanguli i Yitro, “Ledo nabelo ivetutu. 18 Iko aga nompakalenge karomu mboto bo tona gahaitu muni. Pokarajaa tutu nadea gaga ane aga saito mombaurusina. 19 Epemo pepangajariku, bo Alatala mombatulungi iko. Nabelo mami iko nanjambeiki todea hitu ri ngayo nu Alatala bo nanggeni parakarara ka Ia. 20 Iko kana mompatuduki parenta-parenta nu Alatala ka ira bo mombatentei dala nggatuvu nabelo bo nuapa paraluu rapoviara. 21 Ntanina lako rahaitu, iko kana mompelisi bara sakondua tona anu natau nompekiri, bo manganggataka ira mombabalenggai tona sanjobu kadeana, saatu kadeana, limapulu kadeana, bo sapulu kadeana. Ira haitu kana meose nte Alatala, mamala raparasaya bo ledo madota mantarima doi sogo. 22 Tudumo ira majadi topotangara todea, mangoseaka lunura mboto. Anu nipatava ka ira haitu kana rapoviara pakasiayu. Anu nakaja ratangarara radekeira ka iko, tapi posisalapaha sakide mamala ratangarara mboto. Haitu mompakangaa pokarajaamu apa ira muni mamala mombatangara sabagia. 23 Haitumo niparenta nu Alatala mupovia, jadi ane mupovia anu niparentaNa, mupakule mokarajaa anu nipatava ka iko, pura-pura tona manjili maosa rarara sabana parakara nitingayora nasalisa nipakaupu.”
24 I Musa nangoseaka pangajari i Yitro, 25 bo nipelisina tona natau nompekiri lako ri todea Israel. Nipelisina ira mombatangara tona sanjobu kadeana, saatu kadeana, limapulu kadeana, bo sapulu kadeana. 26 Ira nantui bagora najadi topotangara ka todea toIsrael. Ane maria parakara nantamo bara nakaja, raulira ka i Musa, tapi parakara nangaa rapakaupura mboto. 27 Naliu haitu, nidekei i Musamo matuana i Yitro nalai bo nanjili hau ri ngatana.