50
I Yusuf netinoku nte tuamana. Ia notumangi bo nombaeki lenje ntuamana. 2 Naliu haitu niparenta i Yusufmo topande mombadika pakuli ri mboa i Yakub ala ledo mapopo. 3 Pombadika pakuli haitu patapulu eo kasaena. ToMesir novia ada pombatora kamate i Yakub pitupulu eo kasaena.4 Naupupa tempo pombatora haitu, nangulimo i Yusuf ka tomaoge-tomaoge nu magau, “Merapi tulungi, ulimo petevai hitu ka magau: 5 Tempo tuamaku naparamo janjina, nituduna yaku nojanji nte ia, yaku mombatana ia ri dayo nipasadiana mboto ri tana Kanaan. Sabana haitu, dekeimo yaku hau mombatana tuamaku. Maliu haitu pade manjili yaku.”
6 Jadi nangulimo magau, “Koimo, tanamo tuamamu nangoseaka janjimu nte ia.”
7 Naliu haitu, haumo i Yusuf mombatana tuamana. Pura-pura potudua nu magau, tona nalanga nturona ri banua nu magau, bo tomaoge ri Mesir, hau singgani-nggani nte i Yusuf. 8 I Yusuf sambanua, bo sampesuvu-sampesuvuna, bo sarara-sararana ntanina hau muni. Aga ngana kodi bo binatara naboli ri ngata Gosyen. 9 Bara sakuya doka bo tona nojara netuntuni muni, ira nompanuntu nadea mpuu. 10 Tempo ira nakava ri ngata Goren Haatada, ri sabingga mpandake binangga Yordan, ira nekakai nte buku rara bo suara namangga. I Yusuf novia ada popatana, pitu eo kasaena. 11 Tempo toKanaan nompeinta ada popatana ri Goren-Haatad haitu, nangulimo ira, “Nompakabuku rara mpuu ada popatana ntoMesir haitu!” Haitumo sabana sampe ngata haitu nipoposanga Abel-Mizraimb. 12 Ivesiamo ana-ana i Yakub nompovia anu niuli ntuamara. 13 Ira nanggeni mboana hau ri tana Kanaan bo nibolira riara bolo vatu nipodayo nosanga Makhpela, ri sabingga mpandake ngata Mamre, ri tana niali i Abraham lako nte i Efron toHet. Tana haitu nialina rapodayo. 14 Naliu nopatana tuamana, nanjilimo i Yusuf hau ri Mesir nosinggani-nggani nte sampesuvu-sampesuvuna bo pura-pura tona anu nantuntuni ia nopatana tuamana.
I Yusuf nompakasana rara ntuakana
15 Namatepa tuamara, nangulimo tuaka-tuaka i Yusuf, “Berimbamo ane rabalasi i Yusuf pokaingguta nggaulu?” 16 Sabana haitu nitudura tona manguli petevai ka i Yusuf, niulira, “Dopame tuamata namate, 17 ia nombatudu kami manguli ka iko ivei: ‘Ampungimo sampesuvu-sampesuvumu bo dosara, sabana ira nokainggu nadaa nte iko.’ Jadi, hitupa ampungimo sala-sala nipovia kami, batua nu Alatala anu nisomba ntuamata.”
Nangepe petevai niuli ntona haitu, notumangimo i Yusuf. 18 Naliu haitu nakavamo sampesuvu-sampesuvuna netiasi nte ia. Ira nantaputu notungga ri ngayona bo nanguli, “Kami hii batuamu.”
19 Tapi i Yusuf nanguli ka ira, “Nee maeka, apa yaku ledo mamala mokainggu mpo Alatala. 20 Komiu nasintuvumo novia anu nadaa ka yaku, tapi Alatala nombabali nia nadaa haitu najadi nabelo, ala sii-sii nadea tona rapakasalama sabana anu najadi nggaulu. 21 Nee makini raramiu. Yaku mompakagana anu niparaluumiu ntaliana.” Ivesiamo i Yusuf nompakasana rara ntuaka-tuakana ante tesa-tesa nalusu nompakavoe rarara.
I Yusuf namate
22 I Yusuf naroo ri tana Mesir ante sampesuvu-sampesuvuna. Ia natuvu saatu sapulu mpae kasaena. 23 Da nipeintanapa tupu katalu ntapina dako nte i Efraim. Nipeintanapa muni tupu karontapina dako nte i Manasye. I Makhir ana i Manasye, bo ana-ana i Makhir nipakambaso i Yusuf mpo anana mboto.
24 Jadi i Yusuf nanguli ka sampesuvu-sampesuvuna, “Naparamo janjiku, tapi Alatala batena mompiara komiu bo manggeni komiu mesuvu lako ri ngata hitu, hau ri tana nijanjiNa ka i Abraham, i Ishak bo i Yakub. Janji haitu nipakarosoNa nte sumpa.” 25 Naliu haitu, nangulimo i Yusuf ka sampesuvuna ivei, “Pojanjimo nte yaku, ane Alatala manggeni komiu hau ri ngata haitu, rakenimiu muni mboaku [nau damo aga bukuku maboli kana rakenimiu.]” 26 Naliu haitu namatemo ia ri tana Mesir tempo ia noumuru saatu sapulu mpae. Ira nombadika pakuli ri mboana ala ledo mapopo bo nidikara mboana riara peti ntomate.