Tesa i Yakub kaupuna notesa anu majadi nte mulina nggapurina
49
Naliu haitu nironde i Yakubmo ana-anana bo nanguli, “Kasiromu mapara nte yaku ri sii puramo komiu. Bo kuuli ka komiu nuapa majadi nte mulimiu ri eo nggapurina. 2 Ana-anaku, kasiromumo, epemo tesaku.Rubena, anaku lumbua.
Iko nibila bo nipompangala pura-pura anaku ntanina.
4 Tapi iko nasimbayu mpo uve lono ledo natantu poilina.
Iko domo rareke ana tuaka, sabana iko nosampaturu nte bereiku.
Iko nojampa nte yaku tuamamu, bo nompakadaa pobereiku.
5 Simeon,b Lewi,c komiu nosampesuvu, nasimbayu patujumiu;
komiu naseke nompake gumamiu.
6 Ledo yaku mantuntuni anu nadaa niposintuvumiu,
bo ledo muni yaku mompasiose patujumiu natenggo.
Komiu nompakapunggu japi, aga ka kasana raramiu mboto
bo nompatesi tona sabana karau raramiu.
7 Masurukavumo komiu sabana karau raramiu!
Masurukavumo komiu sabana kasekemiu!
Alatala mombakamburaka mulimiu ri njumangu ngata muli i Yakub.
Alatala mompakasimpotare mulimiu ri njumangu tana ntoIsrael.
8 Yehudad, mulimu ratoiya nu sampesuvu-sampesuvumu bo ira matundu nte mulimu.
Mulimu mompakaropu balira.
9 O, anaku! Mulimu mombadagi balira.
Ira masimbayu eva singa muda nanjili nanggeni anu nisakana.
Balira maeka nte mulimu, nasimbayu eva
tona ledo mabia mompopembangu singa naturu,
bara manggaparai singa netinanaki.
10 Mulimu ledo ria kaupu-upuna momparenta
sampe maria saito mulimu anu momparenta sampe ri kasae-saena.
Pura-pura todea ngata matundu nte ia,
bo manggeni pedekei bo mombasomba ia.
11-12 Tempo haitu mabelo mpuu pura-pura katuvua.
Madea mpuu asele mpovia, sampe bata anggur mamala rapake rapopanto nu jara.
Melabi kadeana asele nu anggur sampe uve nu anggur mamala rapake motoposi baju!
Malei mata ntona sabana kaoge nu anggur niinu
bo maputi ngisi sabana kaoge nu susu niinu!
13 Zebulone, mulimu monturo napara tasi.
Kapala-kapala ntasi mesampo ri talintina,
pantaa ntanara sampe ri ngata Sidon.
14 Ishakarf, mulimu masimbayu mpo keledai naroso bukuna naturu noluku nte patekena.
15 Tapi tempo ira mompeinta ngata haitu nabelo bo nasana, masadiamo ira mokarajaa ntamo mpo batua.
16 Dang, mulimu mombatangara todeana,
bo ira majadi pakeni nu valaa nasimbayu eva valaa ntanina ri todeaku, haitumo toIsrael.
17 Ira masimbayu mpo ule nobisa ri bivi dala,
anu sampesanika nombateo kada jara sampe topesavi natetedeaka.”
18 I Yakub nekakai nte TUPU, “O PUE, yaku nanjarumaka kasalama radekeiMiu.
Aga haitumo nipopea-peaku.
19 Gadh, mulimu raeva ntopeago,
tapi mulimu meago mpanjili.
20 Asyeri, asele ntana nu mulimu madea mpuu bo mabelo.
Ira mompakasadia pangande marasa, masipato ka magau-magau.
21 Naftalij, mulimu [ledo raparenta nu balira],
ira masimbayu mpo rusa nakabasaka, nangova hau ri umba rapodotana.
Ana-anana magaya mpuu.
22 Yusufk, mulimu [momuli madea bo matuvu riumba-umba]
nasimbayu mpo anggur natuvu napara mata nu uve, sepina nendolo ri njumangu vala.
23 Balira masese meraga
bo meviorasi nte pana.
24 Tapi mulimu, maroso kabosura,
sabana nitulungi nu Alatala nelabi karosoNa,
anu nombasaliku muli i Yakub.
Tupumo Topoevu naroso,
Ia eva bulu vatu nombalenduti toIsrael.
25 Alatala nambaso kakuasaNa anu nisomba ntuamamu, mombadekei rasi bo belo ka komiu.
RadekeiNa uda lako ri langi bo uve lako ri tambe ntana.
RapakadeaNa anamiu, japimiu, gandomiu bo bungamiu.
26 Alatala anu nisomba ntuamamu nombadekei rasi bo belo nelabipa pade kakalumana nikae lako ri bulu-bulu anu nasaemo.
Perapi doa pura-pura rasi bo belo haitu manau nte iko bo muli-mulimu.
Iramo nipelisi nu Alatala majadi maogepa pade pura-pura sampesuvumu.
27 Benyamin,l mulimu maseke mompatesi balira.
Ira masimbayu mpo asulaku.
Mpandondona asulaku nombasaka anu rakandena
bo bongina nibagi-bagina asele mpesakana.”
28 Haitumo tesa i Yakub kaupuna ka sapulu randua anana. Nitesana ka ira saito-saito anu majadi nte mulira nggapurina. Iramo najadi balengga sapulu randua valaa ntoIsrael.
I Yakub namate bo nitana
29-30 Naliu haitu, i Yakub nombadekei tevai ka ana-anana, “Domo masae makavamo janjiku. Tanamo yaku ri sinjori dayo ntotuaku, ri vatu mpobolo nosanga Mahkpela ri sabingga mpadake ngata Mamre ri tana Kanaan. I Abraham nangali vatu mpobolo haitu bo tana ri sinjorina lako nte i Efron toHet. Vatu mpobolo haitu nipajadi podayo. 31 Ri sia i Abraham bo i Sara, i Ishak bo i Ribka nitana. Bo ri sia muni nipopatanaku i Lea. 32 Tana bo vatu mpobolo haitu niali lako nte toHet. Tanamo yaku ri sia.” 33 Naupupa i Yakub nombatevai ana-anana, naturu ia bo namatemo.