I Yakub nomperapi rasi bo belo ka i Efraim bo i Manasye
48
Bara sakuya kasaena naliu haitu, niulimo kareba ka i Yusuf, tuamana nadua ntamo. Jadi haumo ira ntaliana, haitumo i Efraim bo i Manasye nompeinta tupura i Yakub. 2 Niepe i Yakub nakavamo i Yusuf, nipakaranggaanamo bukuna, bo nembangu nonturo ri paturu. 3 Nangulimo i Yakub ka i Yusuf, “Alatala anu nambaso kakuasaNa nompopakita karoNa ka yaku ri ngata Lusa, ri tana Kanaan bo nojanji mombadekei rasi bo belo ka yaku. 4 Ia nanguli ka yaku, ‘Yaku mombadekei ka iko muli madea, ala ira momuli madea majadi todea-todea ngata mbaso. Yaku mombadekei tana hitu ka iko majadi ponturora sampe ri kasae-saena.’ ”5 I Yakub nompapola tesana, “Yusuf, anamu randua, i Efraim bo i Manasye, nipoanaka ri sii dopame yaku nakava ri sii. Nompamula eo hitu ira kureke anaku mboto, bo ira manggava kakalumanaku nasimbayu mpo anaku i Ruben bo i Simeon. 6 Tapi ane moana hanupa iko, ira ledo kureke anaku tapi aga anamu, bo ledo rakaboli kakalumana dako nte yaku, ira rakaboli nu kakalumana lako nte i Efraim bo i Manasye. 7 Haitu nipoviaku sabana i Rahel, tinamu. Polipaku navoli lako ri Mesopotamia, namatemo tinamu ri tana Kanaan, ledo nakavao lako ri ngata Efrata, bo nabuku mpuu raraku. Yaku nombatana ia ri bivi dala hau ri ngata Efrata.” (Hitupa ngata Efrata niuli ngata Betlehem.)
8-10 I Yakub domo nalanto nepeinta sabana natua gagamo bo matana navundomo. Tempo i Yakub nanggita ana-ana i Yusuf, nipekutananamo, “Isema ngana tutu?”
Nesana i Yusuf, “Hitumo ana-anaku anu nidekei nu Alatala ka yaku ri sii, ri tana Mesir.”
I Yakub nanguli, “Pakapara tumai ira ala kuperapi Alatala mombadekei rasi bo belo ka ira.” I Yusuf nompakapara anana nte i Yakub, bo i Yakub nombakapui bo nangeki ira. 11 Pade nangulimo i Yakub ka i Yusuf, “Bara ipia, domo ntoto nisarumakaku mosinggava nte iko, tapi hitupa Alatala nombadekei loga ka yaku manggita lenjemu bo anamu muni.”
12 Naliu haitu, niala i Yusufmo anana ri timpu i Yakub, bo ia mboto nantaputu notungga ri tana ri ngayo ntuamana.
13-14 Naliu haitu nidika i Yusufmo anana napara nte i Yakub. I Manasye ana lumbua nidikana ri sabingga nggana bo i Efraim tueina ri sabingga njidi. Tapi i Yakub nompoposisape palena bo nombadika pale ngganana ri balengga i Efraim nau i Efraim ledo ana lumbua, bo pale njidina nidikana ri balengga i Manasye. 15 Naliu haitu, niperapina rasi bo belo ka i Yusuf ivei:
“Alatala, Iamo Tupu nisomba ntotuaku i Abraham bo i Ishak.
Eva topoevu nompiara bimbana, ivesia muni Alatala nompiara yaku sampe sii-sii.
16 Iamo Malaeka nombakabasaka yaku lako ri mpengaya kadaa.
Damo Alatala mombadekei rasi bo belo ka ngana-ngana hitu.
Kuperapi sangaku, sanga i Abraham, bo sanga i Ishak rasani ntona sabana ngana gahitu!
Kuperapi ira momuli madea ri dunia.”
17 I Yusuf ledo nasana rarana nanggita tuamana nombadika pale ngganana ri balengga i Efraimb; jadi nilinjana pale nggana ntuamana lako ri balengga i Efraim bo nidikana ri balengga i Manasye. 18 Nanguli ia ka tuamana, “Nee ivetutu, tata. Hitu ngana lumbua; dikamo pale nggana ri balenggana.”
19 Tapi tuamana nompoara, ivei, “Nisaniku, anaku, nisaniku. I Manasye majadi tona mambaso kuasana bo mulina majadi todea ngata mbaso. Tapi tueina majadi makuasapa pade ia, bo muli ntueina majadi madea todea ngata mbaso.”
20 Naliu haitu, niperapina vai rasi bo belo ka ana-ana i Yusuf eo haitu, ivei:
“ToIsrael manguli sangamiu, ri tempo ira merapi rasi bo belo ka tona.
Raulira, ‘Perapi Alatala mombadekei rasi bo belo ka iko mpo nidekeiNa ka i Efraim bo i Manasye.’ ”
Ivesiamo, i Yakub nompakaogepa i Efraim pade i Manasye. 21 Pade nanguli vaimo i Yakub ka i Yusuf, “Naparamo janjiku, tapi Alatala batena mombatulungi komiu, bo manggeni komiu manjili hau ri tana ntotuamu. 22 Aga iko Kudekeika ngata Sikhem, ngata toboyana anu niagoku nte gumaku lako nte toAmori. Ledo Kudekei ka sampesuvumu.”