I Yakub hau nantingayo Magau Mesir
47
1-2 Naliu haitu nikeni i Yusufmo alima sampesuvuna hau nantingayo magau. Niulina, “Tuama bo sampesuvuku nakavamo lako ri tana Kanaan. Ira nanggeni tovau, bimba, japi bo pura-pura mbara-mbarara. Hitupa ira naria ri ngata Gosyen.” Pade nipoposisanina sampesuvuna nte magau. 3 Magau nompekutana ira, “Nuapa pokarajaamiu?”Nesana ira, “Kami hii topoevu mpo totua kami nggaulu. 4 Kami nakava monturo ri ngata hitu, sabana kaara mpai ri tana Kanaan najadi-jadi mpuu, sampe domo naria kavoko rakande nu binata kami. Dekeimo kami monturo ri ngata Gosyen.”
5 Pade nangulimo magau ka i Yusuf, “Hitupa sampesuvu-sampesuvumu nakavamo ri sii. 6 Rekemo ngata hitu mpo ngatamu mboto. Dekeikamo ira maroo ri ngata Gosyen, ponturo nabelo ntoto ri ngata hitu. Ane maria nte ira tona natau nompasiayu binata, patava ka iramo mompasiayu binataku.”
7 I Yusuf muni nompoposisani tuamana nte magau. I Yakub nerapi Alatala mombadekei rasi bo belo ka magau. 8 Naupu sia, magau nompekutana i Yakub, “Sakuyamo umurumiu?”
9 Nesana i Yakub, “Saatu talupulu mpaemo yaku natuvu ri dunia. Katuvuku hii, nadea nirasaiku kasusa bo kapari, bo ledo nandoe umuruku ane rapasimbayu ante umuru ntotuaku nggaulu natuvu ri dunia.” 10 Naliu haitu, i Yakub nerapi vai nte Alatala mombadekei rasi bo belo ka magau bo nopalakanamo ia.
11 Jadi i Yusuf nombatulungi tuamana ante sampesuvu-sampesuvuna nonturo ri tana Mesir. Nidekeina tana tobelona ntoto majadi anura mboto ri bagia Rameses (anu niuli muni Gosyen), nangoseaka parenta nu magau. 12 Bo i Yusuf nompakagana anu rakande niparaluu ntuamana bo sampesuvuna nangoseaka kadea nu anara.
Tempo nggaara
13 Najadi-jadi mpuumo kaara, sampe ri umba-umba domo naria anu rakande. Tona ri tana Mesir bo ri tana Kanaan nalentemo bo domo nompakule sabana naara mpai. 14 Nggani-nggani ira nangali gando, nipasiromu i Yusufmo doi pangali gando bo nibolina ri banua nu magau. 15 Naupupa doi ntoMesir bo toKanaan, toMesir nakava nte i Yusuf bo nanguli, “Dekei ka kami anu rakande! Nee rapalamba kami mamate. Naupumo doi kami.”
16 Nesana i Yusuf, “Ane maupumo doimiu, dekeimo binatamiu. Yaku mombadekei anu rakande ka komiu.” 17 Naliu haitu nidekeiramo binatara ka i Yusuf, bo nidekeinamo anu rakande ka ira raposambei bimba, tovau, japi bo keledaira. Mpae haitu i Yusuf nombadekei anu rakande ka ira bo nibayarira ante binatara.
18 Naliu mpae haitu, nakava vai ira bo nanguli, “Pua, kami mangaku ante komiu, doi kami naupumo, bo binata kami nte komiu puramo. Domo ria nuapa-nuapa nte kami anu mamala radekei kami ka komiu, damo karo kami bo tana kami. 19 Nee rapalamba kami mamate! Nee rapalamba tana kami majadi karava. Alimo kami bo tana kami majadi pombayari gando. Kami bo tana kami majadi anu magau. Dekei ka kami gando mompakapola katuvu kami bo savua rasavu ri talua kami.”
20 Jadi niali i Yusuf puramo tana ri Mesir ka magau. Pura-pura toMesir nompobalu tanara raali ka kandea, sabana tempo nggaara najadi-jadi mpuu. Jadi njumangu tana Mesir najadi tana nu Magau. 21 Pura-pura toMesir nipajadi batua. 22 Damo aga tana ntopanggeni pesomba ri banua petupu ka viata ledo nialina. Topanggeni pesomba ledo paraluu mompobalu tanara, sabana magau nombadekei nuapa-nuapa niparaluura riara nggatuvura.
23 I Yusuf nanguli ka todea, “Peintamo! Komiu bo tanamiu nialikumo ka magau. Siimo savua mamala rasavumiu ri taluamiu. 24 Tempo komiu mokato, asele rakavamiu kana rabagi alima, bo sangu bagia kana radekei ka magau. Labina lako rahaitu, mamala rapake raposavua bo rakandemiu sambanua.”
25 Nesana ira, “Nipakasalamamiumo kami, bo kami motarima kasi. Kami madota majadi batua nu magau.” 26 Jadi anu haitu nipajadi i Yusuf atura ri tana Mesir, haitumo asele mpovia rabagi alima, sangu bagia mesuvu ka magau. Sampe eo hitu atura haitu da naria. Aga tana ntopanggeni pesomba ri banua-banua petupu ka viata ledo najadi anu nu magau.
Pomperapi i Yakub panggaupuna
27 Iveimo toIsrael naroo nonturo ri tana Mesir, ri ngata Gosyen. Ira najadi nakalumana bo nomuli nadea. 28 I Yakub da natuvu sapulu pitu mpaepa ri tana Mesir sampe umuruna nagana saatu patapulu pitu mpae. 29 Naparapa tempona ia mamate, nirondenamo anana i Yusuf ntaliana bo nanguli, “Dikamo palemu ri olo ntimpukua bo mojanji manturusi perapiku hitu: ane mamate yaku, nee mutana ri sii ri Mesir. 30 Yaku madota ratana ri sinjori ntotuaku. Kenimo mboaku lako ri ngata hitu bo tanamo ri tana nipodayo ntotuaku.”
Jadi nesanamo i Yusuf, “Kuturusi anu niulimiu tutu, tata.”
31 Nanguli i Yakub, “Pojanjimo, kana mupovia.” I Yusuf nojanji, bo i Yakub nantaputu ri sinjori paturuna bo nombasomba Alatala.