I Yakub sambanua nolinja ri tana Mesir
46
Jadi haumo i Yakub (niuli muni i Israel) nte pura-pura kakalumanana. Nakava ri ngata Bersyeba nisambaleramo binata rapesomba ka Alatala, Tupu nisomba ntuamana i Isak. 2 Bongina haitu naria pompakita nikita i Yakub. Niepena suara nu Alatala nanguli: “Yakub! Yakub!”Nesana i Yakub: “Sii yaku, Pue.”
3 Nanguli vai Alatala, “Yakumo Alatala anu nisomba ntuamamu. Nee maeka hau ri tana Mesir. Kupakadea mulimu hamai sampe majadi todea ngata mbaso. 4 Yaku momporoa iko hau ri tana Mesir, bo manggeni muli-mulimu manjili ri tana Kanaan hitu. I Yusuf mboto maria ri sinjorimu ane makavamo janjimu.”
5 Jadi nalaimo i Yakub lako ri ngata Bersyeba. Ana-anana nompopesavi tuamara, ngana-ngana kodi, bo bereira riara doka anu nipakatu nu Magau Mesir. 6-7 Jadi i Yakub ntaliana ante tupu-tupuna, langgai bo mombine, hau puramo ri tana Mesir. Nikenira muni pura-pura binata bo mbara-mbara nikavara ri tana Kanaan. 8 Sanga-sanga muli i Yakub (anu niuli muni i Israel) anu nantuntuni ia hau ri Mesir haitumo:
9 i Ruben ana lumbua, ante ana-anana i Henokh, i Palu, i Hezron, bo i Karmi.
10 I Simeon, ante ana-anana i Yemuel, i Yamin, i Ohad, i Yakhin, bo i Zohar. Bo muni i Saul ana i Simeon lako nte bereina toKanaan.
11 I Lewi ante ana-anana: i Gerson, i Kehat bo i Merari.
12 I Yehuda ante ana-anana i Sela, i Peres bo i Zerah. Ana i Yehuda ntanina, haitumo i Er bo i Onan namate ri tana Kanaan. Tupu i Yehuda, ana-ana i Peres: i Hezron bo i Hamul.
13 I Isakhar ante ana-anana i Tola, i Pua, i Ayub bo i Simron.
14 I Zebulon ante ana-anana, i Sered, i Elon bo i Yahleel.
15 Ira pangane muli ngana nipoanaka i Lea ante i Yakub ri ngata Padan-Aram (ri tana Mesopotamia). Anu ntanina lako rahitu anana mombine anu nosanga i Dina. Jadi pura-pura muli i Yakub lako nte bereina i Lea, talupulu bo tatalu kadeana.
16 I Gad ante ana-anana: i Zifyon, i Hagi, i Syuni, i Ezbon, i Eri, i Arodi bo i Areli.
17 I Asyer ante ana-anana: i Yimna, i Yiswa, i Yiswi, i Beria bo i Serah anana mombine.
Tupu i Asyer, ana-ana i Beria: i Heber bo i Malkiel.
18 Ira sapulu aono haitu, muli i Yakub lako nte i Zilpa, Haitumo batua mombine anu nidekei i Laban ka anana mombine, i Lea.
19 I Rahel berei i Yakub, randua anana, haitumo: i Yusuf bo i Benyamin.
20 Ri Mesir i Yusuf noana randua: i Manasye bo i Efraim anu nipoanaka nu bereina i Asnat, ana i Potifera, topanggeni pesomba ri banua petupu ka viata ri ngata Heliopolis.
21 Ana-ana i Benyamin: i Bela, i Bekher, i Asybel, i Gera, i Naaman, i Ehi, i Rosy, i Mupim, i Hupim bo i Ared.
22 Ira sapulu ampa pangane, muli i Yakub nte berina i Rahel.
23 Da naria hanupa, i Dan ante anana: i Husim,
24 i Naftali ante ana-anana: i Yahzeel, i Guni i Yezer bo i Syilem.
25 Ira papitu pangane, muli i Yakub lako nte i Bilha, batua mombine anu nidekei i Laban ka anana, i Rahel.
26 Muli i Yakub anu hau ri tana Mesir, onopulu bo aono kadeana. Ledo natereke nte maniana. 27 Randua ana i Yusuf nipoanaka ri tana Mesir. Ira nireke singgani ante gi Yakub sambanua anu nakava ri tana Mesir, pitupulu ira kadeana.
I Yakub sambanua ri tana Mesir
28 Tempo nanggalivo hau ri tana Mesir, i Yakub nantudu i Yehuda mokolu bo mangulika i Yusuf mantomunaka ia ri ngata Gosyen. Nakavapa ira ri ngata Gosyen, 29 i Yusuf nesavi dokana hau mombatomunaka tuamana. Tempo ira nosinggava, i Yusuf nombakapui tuamana bo nasae notumangi. 30 Nangulimo tuamana ka i Yusuf, “Hitupa nau mamate yaku, domo makuya, sabana nikitakumo iko bo nisanikumo iko da natuvu!”
31 Nangulimo i Yusuf ka sampesuvu-sampesuvuna ntanina, “Yaku kana hau mangulika magau apa sampesuvuku bo sararaku anu nonturo ri tana Kanaan nakavamo. 32 Kuuli ka ia, komiu topoevu bimba bo japi, bo nikenimiumo binatamiu ante pura-pura mbara-mbaramiu. 33 Ane magau mombaronde komiu bo mompekutana nuapa pokarajaamiu, 34 ulimo ka ia, lako ri kakodimiume, komiu najadi topoevu binata nasimbayu mpo totuamiu. Ane vesia, ia mombatudu komiu monturo ri ngata Gosyen.” I Yusuf nanguli ivehaitu sabana nipopali ntoMesir nosimporoa nte topoevu.