I Yusuf nompopaisani isema ia ka sampesuvuna
45
Domo nipakule i Yusuf nantaamaka kabuku rarana ri ngayo nu batua-batuana. Jadi nituduna ira mompalaisi ia riara ntombi haitu ala ia mamala mompopaisani ka tuaka-tuakana isema ia. 2 Nesuvu purapa batuana lako riara ntombi, nantetemo i Yusuf notumangi, sampe toMesir ri savalikuna nangepe ia, bo kareba haitu niepe sampe ri banua i Firaun, magau Mesir.3 I Yusuf nanguli ka sampesuvu-sampesuvuna, “Yakumo hii i Yusuf. Da natuvu i tata?” Nangepe i Yusuf nanguli ivehaitu, naeka puramo sampesuvuna sampe domo nabia nesana. 4 Nangulimo i Yusuf ka ira, “Kamai tumai sii!” Nekaparaimo ira, bo niulina vai, “Yaku i Yusuf, anu nipobalumiu bo nikeni tumai ri tana Mesir. 5 Nee maeka bara manjoso raramiu nompobalu yaku. Kakanana Alatala mboto nanggeni yaku tumai mokolu ka komiu ala mompakasalama todea. 6 Hitu da karompaekana tempo nggaara, bo lima mpaepa tona ledo mamala motuda nuapa-nuapa. 7 Alatala nanggeni yaku nokolu ka komiu ante dala nipokumaaka hitu, ala mombajaga kasalamamiu bo kapola katuvu nu mulimiu. 8 Jadi kakanana ledo komiu nanggeni yaku tumai, aga Alatala. Ia nompajadi yaku timali nu magau Mesir. Yaku nidekeika kuasa ri banuana bo ri njumangu tana Mesir. 9 Jadi hitupa, koi panjilimo masalisa hau nte i tata bo ulimo ka ia ivei, ‘Tata, petevai hitu lako nte yaku, anamiu i Yusuf. Alatala nompajadi yaku nombakuasai njumangu tana Mesir. Kamaimo masalisa tumai nte yaku! 10 Kamai puramo komiu ntaliana bo pura-pura tupumiu. Keni munimo bimba, tovau, japi bo pura-pura kakalumanamiu. Komiu mamala monturo ri ngata Gosyen, napara nte yaku. 11 Ane komiu maria ri ngata Gosyen, mamala kupiara komiu. Tempo nggaara da lima mpaepa bo yaku mompasimbuku ala komiu sambanua bo binatamiu ledo makura nuapa-nuapa.’ ”
12 Bo niulina vai, “Hitupa nipeintamiu mbotomo, bo iko muni, Benyamin, nipeintamu mbotomo, yakumo hii i Yusuf. 13 Ulika i tata nipakaoge mpuu yaku ri sii, ri tana Mesir, bo uli ka ia puramo anu nipeintamiu. Keni tumaimo ia masalisa.”
14 Naupu sia, nikapuinamo i Benyamin, tueina, bo notumangi. I Benyamin muni notumangi bo nombakapui i Yusuf. 15 Naliu haitu, da nte tangi, i Yusuf nombakapui sampesuvu-sampesuvuna ntanina bo nombaeki ira, pade nosimpotesamo ira ntali sampesuvu.
16 Tempo niepe ri banua nu magau naria sampesuvu i Yusuf ri tana Mesir, magau nte tomaoge-tomaoge muni nadamba. 17 Pade nanguli magau ka i Yusuf, “Tudumo sampesuvumu tutu mombasaviraka gando ri keledaira manjili hau ri tana Kanaan, 18 mangala tuamamu bo sampesuvumu molinja tumai. Kudekei ka ira tana tobelona ntoto, bo ira mamala matuvu magana lako ri asele ntana haitu. 19 Tudu muni ira manggeni bara sakuya doka lako ri sii mangala tuamamu bo rapanggenira bereira bo ngana kodi tumai. 20 Domo rapekirikara mbara-mbara anu rapalaisira, sabana kudekei ka ira tana tobelona ri Mesir.”
21 Ana-ana i Yakub nanturusi parenta haitu. I Yusuf nombadekei ka ira bara sakuya doka bo baku ri dala, niparenta nu magau ka ia. 22 Nidekeina muni ka ira simbo santonga baju baru, tapi i Benyamin nidekeikana taluatu mpeka doi salaka bo lima ntonga pakea baru. 23 Ia nompakatu ka tuamana sapulu angu keledai anu nanggeni mbara-mbara tobelona lako ri Mesir. Nipakatuna muni sapulupa vai keledai besina anu nangulaya gando, roti bo kandea ntanina anu rakande ri dala tumai ri Mesir. 24 Naliu haitu, nikalivonakanamo sampesuvuna bo niulina, “Nee mosinggarau ri dala.”