Boda panginu gubernur nalipo
44
Naupu nangande, niparenta i Yusufmo topompasiayu banuana, “Isimo karu-karu ntona gahaitu ante gando, sukana pompakulera, bo suaraka doira ri karura mboto. 2 Suaraka muni boda panginuku anu nipovia lako ri salaka riara karu ntueira panggaupu, ante doi pombayari gando.” Topompasiayu banua pangane nanturusi parenta haitu.3 Kamaile bobayana, nogaamo i Yusuf nte sampesuvuna, apa sampesuvuna ante keledaira malaimo. 4 Dopa nakavao ira lako ri ngata haitu, niuli i Yusufmo ka topompasiayu banuana, “Masalisa raga tona hautu. Ane rakavamiumo, ulika ira, ‘Nakuya nibalasikamiu kabelo ante kadaa? 5 Nakuya nipanganggasikamiu boda panginu i pua? Boda haitu nipakena nanginu bo neanto. Nadaa mpuu poviamiu!’ ”
6 Tempo topompasiayu banua haitu nanggava sampesuvu i Yusuf, niulinamo anu niparenta i Yusuf ka ia. 7 Nesana ira, “Nuapa patuju i pua? Kami mopinda, ledo kami novia anu ivetutu! 8 Nisanimiu mboto doi nikava kami riara karu haitu, nipopanjili kami vai ka komiu. Jadi, nee rasarumakamiu kami mangala bulava bara salaka lako ri banua gubernur! 9 Pua, ane rakavamiu anu tutu riara karu bara isema dako nte kami hitu, dekeikamo ia mamate, bo kami majadi batuana.”
10 Nanguli topangurusi banua haitu, “Nabelomo. Tapi isema tona rapanggava boda haitu, iamo majadi batuaku. Tona ntanina mamala mompapola polipana.” 11 Jadi nasalisamo ira nombatauraka karura. 12 Topompasiayu banua i Yusuf nomparesa pakabelo karu-karura, nompamula lako ri karu ntuaka paratama sampe karu ntuei panggaupu, bo boda panginu haitu nikava ri karu i Benyamin. 13 Tuaka-tuaka i Yusuf nabuku mpuu rarara sampe nombabite-bitesi pakeara. Nisavirakara mpanjili panggenira bo nanjili vai hau ri ngata.
14 Nakavapa i Yehuda bo sampesuvuna ri banua i Yusuf, i Yusuf da naria ri sia, bo nantaputu notungga vai ira ri ngayona. 15 Jadi nangulimo i Yusuf, “Nuapa nipoviamiu? Ledo nisanimiu yaku hii tona namala mangisani pokainggumiu nadaa ante pangisani?”
16 Nesana i Yehuda, “Nuapa vai mamala rauli kami, pua? Berimba kami mamala mombasapuaka bo mompakakana karo kami mboto? Alatala nompopakita kasala kami. Hitupa kami pura-pura majadi batuamiu, ledo aga ia nipanggava boda haitu.”
17 Nanguli i Yusuf, “Ledo! Yaku ledo madota movia ivetutu! Aga tona nipanggava boda haitu majadi batuaku. Ntanina mamala manjili hau nte tuamamiu.”
I Yehuda nombasaliku i Benyamin
18 I Yehuda nombakaparai i Yusuf bo nerapi ampu, “Pua, dekei loga ka yaku motesa nte komiu. Nee marau ka yaku batuamiu. Komiu mpo magau Mesir mboto. 19 Pua, nipekutanamiumo kami, ‘Da naria tuama bara sampesuvumiu?’ 20 Nesana kami, ‘Tuama kami natuamo bo tuei kami nipoanaka tempo tuama kami natuamo. Tuaka santina nte tuei kami hitu namatemo, damo ia saitona natuvu lako nte ira randua sangu tina, bo tuama kami mpuu-mpuu nompotove ia.’ 21 Pua, komiu nombatudu kami manggeni ia tumai, ala mamala rakitamiu. 22 Nesana kami, ‘Tuei kami haitu ledo namala mogaa nte tuama kami. Ane ia mogaa ante tuama kami, tuama kami mamate.’ 23 Bo niulimiu kami domo mamala manjili nte komiu ane ledo ria tuei kami rakeni kami.
24 Tempo kami nanjili hau ri ngata kami, nitesa kami pura anu niulimiu ka tuama kami. 25 Naliu sia nituduna vai kami makava tumai mangali anu rakande. 26 Nesana kami, ‘Kami ledo madota hau, sabana gubernur nangulika kami ledo mamala mantingayo ia ane tuei kami panggaupu ledo maria rakeni kami hau nte ia. Mamala kami hau ane hau muni ia.’ 27 Jadi nangulimo tuama kami, ‘Nisanimiu i Rahel, bereiku aga randua anana. 28 Anana paratama nipalaisinamo yaku. Tantumo ia nikande nu binatamo, sabana sampe sii-sii domo nikitaku. 29 Ane raalamiu vai ngana panggaupu hitu lako nte yaku, bo majadi bara nuapa ante ia, kabuku nu rara nipoviamiu ka yaku hitu mompakamate yaku, apa yaku hii natuamo.’ ”
30-31 I Yehuda nanguli ka i Yusuf, “Sabana haitu, pua, ane kami manjili hau nte tuama kami bo ledo maria tuei kami hitu, tantu mami tuama kami mamate. Sabana ledo rapakulena matuvu ane domo ria anana hitu. Natua gagamo sampe kabuku nu rarana rapovia kami ka ia mompakamate ia. 32 Bo yaku muni nojanjimo ante tuamaku, yaku kana manggeni ia mpanjili. Yaku nanguli ka tuamaku, ane ledo kukeni mpanjili ka ia, yakumo rahukuna sampe mamate. 33 Jadi kuperapi nte komiu, pua, dekeimo yaku monturo ri sii majadi batuamiu mombasambei tuei kami hitu. Dekeimo ia manjili singgani-nggani ante tuakana. 34 Berimba yaku mamala manjili ane tueiku tutu ledo metuntuni? Ledo kupakule manggita anu majadi ante tuama kami sabana anu najadi hitu.”