Tuaka-tuaka i Yusuf nosinggani-nggani nte i Benyamin hau ri tana Mesir
43
1-2 Kaara mpai ri tana Kanaan najadi-jadi mpuumo. Naupupa nikandera gando nikeni lako ri Mesir, nangulimo i Yakub ka ana-anana, “Anaku, koi vai komiu hau ri tana Mesir mangali gando ka kita.”3 I Yehuda nanguli, “Tata, gubernur nanguli ledo mamala kami mantingayo ia ane ledo rakeni kami tuei kami i Benyamin. 4 Ane radekeimiu i Benyamin, madota kami hau mangali anu rakande. 5 Tapi ane ledo radekeimiu i Benyamin metuntuni, ledo hau kami. Sabana niuli nu gubernurmo ledo mamala kami makava ri ngayona ane ledo maria i Benyamin rakeni kami.”
6 Nesana i Yakub, “Nakuya nipakasusakamiu yaku, nitesamiu ka tona da nariapa tueimiu?”
7 Ira nesana, “Tona haitu nekutana njuu nte kami, berimba kami ntali sampesuvu. Niulina, ‘Da natuvu tuamamiu? Da naria tueimiu langgai?’ Jadipa nipesanaka kami puramo. Berimba bo rasani kami ia mombatudu kami manggeni tuei kami hitu?”
8 Jadi nanguli i Yehuda ka tuamana, “Dekeimo ngana tutu metuntuni, yaku mombajagai ia. Hau kami masalisa ala ledo ria lako nte kita mamate maara. 9 Yakumo mombasimbuakana, ane ledo kukeni mpanjili ia, yakumo ratuntumiu. Damo kusimbuaka hukuna sampe ri kasae-saena. 10 Ane ledo nompopea ia, tantu rongganimo kami navoli lako ri Mesir.”
11 Pade nanguli tuamara, “Ane ivetutu tano, kenimo asele anu nabelo ntoto lako ri ngata hitu, rapotanda mata nte i Gubernur: dama, manisa, rampa, dupa, vua beau bo vua ntanina. 12 Keni muni doi ronggani kadeana, sabana doi nikavamiu riara karumiu kana rapopanjili ka gubernur. Bara tona hamai nasala dika ri batutumiu. 13 Kenimo tueimiu hitu, bo koimo masalisa hau nte gubernur. 14 Alatala anu nambaso kakuasaNa, damo Ia mompakaasi mata nu gubernur haitu manggita komiu, ala ia madota mompopanjili i Benyamin bo i Simeon ka komiu. Tapi ane mpuu-mpuu anaku malipomo, damo rakuya?”
15 Naliu haitu, nikeni nu sampesuvu i Yusufmo tanda mata bo doi ronggani kadeana, ira nosinggani nte i Benyamin. Haumo ira nasalisa ri tana Mesir. Nakavapa sumai, haumo ira ri ngayo i Yusuf. 16 Tempo i Yusuf nanggita i Benyamin bo tuaka-tuakana, niulinamo ka topompasiayu banuana, “Kenimo tona tutu hau ri banuaku. Ira mangande singgani-nggani ante yaku tanga eo hitu. Jadi sambalemo sangu binata bo poriapumo.” 17 Batua haitu nombaturusi parenta haitu, bo nanggeni sampesuvu i Yusuf hau ri banuana.
18 Tempo ira nikeni hau ri banua i Yusuf, naekamo ira bo nompekiri, “Kita nikeni ri sii sabana doi nikavata riara karuta, tempo kita lako ri sii bara ipia. Sampesanika rasakara kita bo raalara keledaita bo kita rapajadira batua.”
19 Sabana haitu, napara ri vamba banua i Yusuf, notesamo ira ka topompasiayu banua, 20 “Merapi ampu, nariamo kami nakava ri sii bara ipia nangali anu rakande. 21-22 Tempo kami nanjili, kami nasambongi ri dala. Nigea kami batutu kami, nikava kami naria pura doi riara batutu. Ledo nisani kami isema nombadika doi haitu. Hitupa nikeni kami mpanjili ka i pua. Bo nikeni kami vai doi santanina rapangali gando.”
23 Nangulimo batua haitu ka ira, “Nee maeka. Neemo mapari raramiu. Tupumiu, haitumo Alatala anu nisomba ntuamamiu, Iamo nombasuaraka doi haitu riara karumiu. Nitarimakumo pombayarimiu gando haitu.”
Naliu haitu, nikeninamo i Simeon ka ira, bo 24 nikeninamo ira nesua riara banua. Nidekeina uve ka ira rapotoposi kadara, bo anu rapakande ka binatara. 25 Naliu haitu, nipasadia ntuaka i Yusufmo tanda mata radekei ka i Yusuf tempo ia makava tanga eo, sabana niuli mamimo ka ira mangande singgani-nggani nte gubernur tanga eo. 26 Tempo i Yusuf nakava ri banua, nidekeiramo tanda mata haitu ka ia bo nantaputu notungga natudu ri tana ri ngayona. 27 Nipekutana i Yusufmo berimba karebara. Ia nanguli, “Baipia niulimiu ka yaku da naria tuamamiu. Berimba karebana sii-sii? Nabelo-belo?”
28 Nesana ira, “Tuama kami, batuamiu, da nabelo.” Bo notungga vai ira.
29 Tempo i Yusuf nanggita i Benyamin tuei koyopusena, niulinamo, “Jadi, hitumo tueimiu panggaupu anu niulimiu ka yaku? Damo Alatala mombadekei rasi ka iko, anaku.” 30 Nabuku rara i Yusuf sabana kalentorana bo pompotovena tueina. Sakidepa ledo namala nitaamakana tangina, jadi nalaimo ia hau ri tombina bo notumangi. 31 Naliu haitu, nidoupisinamo lenjena, pade nesuvu vai hau nte sampesuvuna. Nipakaroona rarana, bo nituduna batuana mombasondu anu rakande.
32 I Yusuf nangande ri meja nipasantani, bo sampesuvuna nangande ri meja ntanina. ToMesir nangande ri meja santanina muni, sabana nipopalira nangande nosinggani nte toIbrani. 33 Sampesuvu-sampesuvu i Yusuf nangande ri meja anu nosintingayo nte meja pangande i Yusuf. Ira nipoponturo nosunju-sunju nantuntuni umurura, nompamula lako ri ana lumbua sampe ri ana kaupu. Tempo nipeintara sunju ponturora haitu, nokumaa ira nosipeinta. 34 Ira nidekeika kandea lako ri meja i Yusuf, bo i Benyamin nidekeika anu rakande lima nggani kaogena lako ri tuakana santanina. Naliu haitu, nangandemo ira singgani-nggani nte i Yusuf sampe nabosu.