Tenda nTUPU nipopeangga bo nitaniaka ka TUPU
40
TUPU nanguli ka i Musa, 2 “Ri tanggal sangu, bula sangu popeanggamo TendaKu, [haitumo Tenda Kuposinggava nte komiu]. 3 Riara Tenda haitu, suaraka Peti Pojanji anu noisi sapulu parenta bo ri ngayona pataka povombo polenduti anu mombataoloki Tombi Nagasa bo Tombi Nelabi Kagasana. 4 Suarakamo meja ri [Tombi Nagasa] bo pasiayu parevana ri bavona. Suarakamo kada mpoindo bo dikamo poindona ratunju. 5 Dikamo lanta potunju dupa nitapiki nte bulava ri ngayo Peti Pojanji ri savaliku povombo polenduti, bo patakamo povombo vamba ri vamba nTenda. 6 Dikamo lanta pesomba ka pesomba nipalabu ri savaliku nTenda nosintingayosi nte vambana. 7 Dikamo pomboli uve ri olo nTenda bo lanta pesomba haitu, bo isi ante uve. 8 Pade patakamo povombo ri ntiku-ntiku doyata bo pataka povombo ri bobaa.9 Maupu sia, Tenda bo mpengaya isina kana mutaniaka ka Yaku ante mombalanai ante lana ada. Ivesiamo pura-pura haitu rareke nagasa bo nitaniaka ka Yaku. 10 Povia ivesia muni ka lanta pesomba bo mpengaya-ngaya parevana ala rataniaka ka Yaku. 11 Povia ivesia muni pomboli nu uve bo kadana.
12 Maliu haitu, tudumo i Harun ntaliana makava ri vamba nTenda bo motoposi karora ri pomboli uve. 13 Popakeka i Harun pakea ka topanggeni pesomba, bo toli sakide lana ada ri balenggana, ala ia rataniaka mokarajaa manggeni pesomba ka Yaku. 14 Pade tudumo ana-anana mapara nte iko, bo popakeka baju ndoe anu nopale ka ira. 15 Pade toli munimo sakide lana ada ri balenggara, nasimbayu mpo nipoviamu ka tuamara, ala ira muni namala mokarajaa ka Yaku manggeni pesomba. Panganggataka ira haitu sampe muli nu mulira.” 16 I Musa novia mpengaya anu niparenta nTUPU ka ia.
17 Jadi tanggaa sangu bula sangu riara mpae karompaena naliu toIsrael nompalaisi Mesir, nipatakamo Tenda nTUPU. 18 I Musa nomparenta ala tona mombadika potande-potandena, mompopeangga dopi-dopina, mompataka kayu-kayu polondona, bo mompopeangga tinja-tinjana. 19 Pade nitantara ata nTenda bo nidikara potutuina ri bavo nu Tenda, nangoseaka parenta nTUPU.
20 Naupu sia nisuarakara rompeka vatu haitu riara Peti Pojanji. Pade nipataka i Musamo potutui Peti Pojanji bo nosuaraka kayu pokovana riara pontona. 21 Pade nidikara Peti haitu riara nTenda ri Tombi Nelabi Kagasana bo nompataka povombo polenduti ri ngayona, nangoseaka anu niparenta nTUPU ka i Musa.
22 Pade nidika i Musamo meja riara nTenda nTUPU, ri bagia tasina ri savaliku nu povombo polenduti ri Tombi Nagasa, 23 bo ri bavo meja haitu nidikara roti pesomba.
24 Kada mpoindo nidikara riara nTenda ri bagia puluna, nosintingayo nte meja haitu, 25 pade poindo-poindo haitu nitunjura ri ngayo nTUPU.
26 Lanta potunju dupa anu nitapiki nte bulava nidikara riara nTenda, ri ngayo povombo polenduti, 27 bo nitunjura dupa vangi eva niparenta nTUPU ka i Musa.
28 I Musa nompataka povombo vamba nTenda, 29 bo ri savalikuna nosintingayo nte vamba haitu nidikara lanta pesomba. Ri bavo lanta pesomba haitu nidikara pesomba nipalabu bo pesomba gando bo lana.
30 Pomboli uve nidikara ri olo nTenda bo lanta pesomba, bo niisira uve. 31 I Musa bo i Harun ntaliana nombatoposi kada bo palera ri sia, 32 nggani-nggani ira mesua ri Tenda nTUPU bara manggaparai lanta pesomba.
33 I Musa nomparenta tona mompataka povombo ri ntiku-ntiku doyata nTenda haitu, pade nipatakara povombo bobaa nu doyata. Jadi naupumo pokarajaa haitu.
Kulimu nombabungusi Tenda nTUPU
Bilangan 9:15-23
34 Naliu haitu, nanaumo kulimu nombatutui Tenda nTUPU, bo tenda haitu nibungusi nu reme Kaoge nTUPU. 35 Ledo namala i Musa nesua hau riara nTenda sabana reme haitu.
36 Nggani-nggani kulimu haitu neore lako ri Tenda nTUPU, toIsrael kana mombagero tendara bo molinja hau ntanina. 37 Tapi ane kulimu haitu ledo neore, ira muni ledo nolinja sampe kulimu haitu molinja vai. 38 Ri eona kulimu haitu nenonto ri bavo nTenda nTUPU bo bongina kulimu haitu nevangga ala toIsrael mamala manggitana. Ivesiamo kapolana riara mpolipara.