Novia pakea ntopanggeni pesomba
39
I Bezaleel bo i Aholiab novia pakea ka topanggeni pesomba lako ri bana nagavu, nakamao bo nalei rapake tempo ira mokarajaa ri Tombi Nagasa. Pakea ka i Harun pakeni ntopanggeni pesomba, nipoviara nangoseaka anu niparenta nTUPU ka i Musa.2 Baju efod nipoviara lako ri kae linen nalusu, bana nagavu, nakamao bo nalei, bo bana bulava. 3 Ira nopempe-pempe pakanipi bulava pade nikotora bo nipadiira najadi bana nanipi, bo nitanura nosinggani-nggani nte kae linen nalusu bo bana nagavu, nakamao bo nalei. 4 Naliu haitu nipovia robingga vinga nu baju efod bo nidau ntimali-mali ri baju efod ri tampa bavona bo ri bengona. 5 Pompou kope nipovia lako ri kae nalusu nasimbayu mpo baju efod, bo nidau pakasangu ante baju efod haitu.
6 Ira nombasampu vatu ake bo nirandu bulava. Pade niukira sanga-sanga sapulu randua ana i Yakub ri vatu-vatu haitu. 7 Pade nipatakara vatu-vatu haitu ri vinga nu baju efod najadi tanda pombatora sapulu randua valaa toIsrael, evamo niparenta nTUPU ka i Musa.
Novia potutui bambara
8 I Bezaleel bo i Aholiab novia potutui bambara lako ri kae nasimbayu ante kae nipovia baju efod, bo posujina muni nasimbayu. 9 Potutui bambara haitu nitilu randua bo nisulapa ampa, kaluona bo kandatena simbo ropulu randua 22 senti. 10 Ri potutui bambara haitu nipatakara pata-ndala vatu mpoali. Dala paratama vatu delima, vatu krisolit bo vatu zamrud. 11 Ri dala karondalana, vatu pirus, vatu nilam, bo vatu intan. 12 Katalu-ndalana, vatu ambar, vatu ake, bo vatu kecubung. 13 Bo kapatandalana, vatu beril, vatu ake nolapi-lapi, bo vatu yaspis. Ri bivi sapulu randua vatu mpoali gahaitu nirandu bulava. 14 Ri sangu-sangu vatu haitu niuki sanga saito-saito lako ri sapulu randua ana i Yakub, najadi tanda pombatora valaa-valaa ntoIsrael.
15 Pade nipovia rompenga rante ka potutui bambara haitu lako ri bulava ledo ria galona anu nikaloro mpo lui. 16 [Randua vatu ake ri vinga nu baju efod] nirandu muni ante bulava bo nipovia randua ponto bulava rapataka ri tampa bavona ri potutui bambara haitu. 17 Pade rompenga rante bulava nisuaraka riara ponto-ponto haitu. 18 Tampana ntimali nipataka ri [vatu ake anu] nirandu bulava ri vinga nu baju efod. Jadi potutui bambara haitu namala raposiumpu ri bagia ngayo vinga nu baju efod. 19 Pade nipovia vai randuapa ponto bulava anu nipataka ri potutui bambara haitu, ri tampa tambena bagia riarana mambela baju efod. 20 Naliu haitu nipovia randuapa ponto bulava anu nipataka ri ngayo baju efod ntimali-mali. Nipataka ri olo podau vinga bo podau ri pompou kope nu baju efod. 21 Ponto ri potutui bambara niposiumpu ante lui nakamao ri ponto baju efod, sampe potutui bambara haitu batena naria ri bavo pompou kope bo ledo montoya. Haitu pura nipoviara nangoseaka parenta nTUPU ka i Musa.
Novia pakea ntanina ka topanggeni pesomba
22 Baju ndoe anu ledo nopale nipake ri tambe baju efod nitanu lako ri bana nagavu pura. 23 Tambolo nu baju ndoe anu ledo nopale nipovia ri tatangana, bo bivina nipakaroso ante didi ala ledo masalisa maugu. 24-26 Ri doe-doe baju haitu nipatakara poramba eva vua delima nipovia lako ri bana nagavu, nakamao bo nalei anu nipule. Vua delima haitu nipoposiolo ante banggula bulava nakodi, nangoseaka parenta nTUPU ka i Musa.
27 Ira novia baju ndoe anu nopale ka i Harun ntaliana, nitanu dako ri kae linen nalusu, 28 bo nipoviara muni songgo bo puruka mbuku lako ri kae linen, 29 bo nipoviara muni pompou kope lako ri kae linen nalusu, bana nagavu, nakamao bo nalei, nitanu poposura, bo nirambaki nte posuji nangoseaka parenta nTUPU ka i Musa.
30 Nipoviara muni poramba lako ri bulava ledo ria galona, tandana i Harun nitaniaka ka TUPU. Ri poramba haitu nitulisi “Nitaniaka ka TUPU.” 31 Poramba haitu nipataka ante lui nagavu ri songgona bagia koluna, nangoseaka parenta nTUPU ka i Musa.
Pokarajaa haitu nipakaupu
32 Kaupuna naupu puramo pokarajaa novia Tenda nTUPU haitu. ToIsrael novia pura-pura nangoseaka anu niparenta nTUPU ka i Musa. 33 Pade nikenira pareva nTenda nipoviara haitu ante mpengaya ganana ka i Musa. Nikenira pekai-pekaina, dopi-dopina, kayu polondo, tinja-tinja bo potandena, 34 potutui ata nipovia lako ri kuli bimba lakina nipakalei, potutui ata nipovia lako ri kuli nalusu, ante kae povombo polenduti. 35 Nikenira Peti Pojanji anu noisi rompeka vatu, nosanggani ante kayu-kayu pokova bo potutuina. 36 Nikenira muni meja ante pura-pura parevana bo roti rapesomba. 37 Nikenira kada mpoindo nipovia lako ri bulava ledo ria galona, poindona ante mpengaya parevana, bo lanana. 38 Nikenira lanta potunju dupa nipovia lako ri bulava, lana ada, dupa vangi, bo kae povombo vamba nTenda. 39 Nikenira lanta pesomba nipovia lako ri gala ante kawa gala nisua, kayu pokovana ante mpengaya parevana. Nikenira muni pomboli uve ante kadana. 40 Nikenira kae povombo doyata bo tinja-tinjana, potandena, povombo bobaa doyata ante kalorona, bo panto nu Tenda. Nikenira pura pareva nipake ri Tenda nTUPU pangane, 41 bo pakea-pakea anu rapake ntopanggeni pesomba tempo ira mokarajaa ri Tombi Nagasa, haitumo pakea nitaniaka ka i Harun ntaliana.