Novia lanta pesomba ka pesomba nipalabu
38
I Bezaleel nte roana novia lanta pesomba ka pesomba nipalabu. Lanta pesomba haitu norara bo norindi dopi. Nipovia lako ri kayu akasia. Lanta pesomba haitu nosulapa, kandatena bo kapekana simbo rometere ropulu senti (2,20), bo langana sametere talu pulu senti (1,30). 2 Ri pasu patampasu nipovia mpo tandu anu nipakasangu ante lanta pesomba haitu. Njumangu nitapiki ante gala. 3 Nipovia muni sero, loya, potosu bau, pomboli avu, bo pomboli ruti. Pura-pura pareva haitu nipovia lako ri gala. 4 Nipovia polava nu lanta pesomba bo kawa gala nisua. Nidika kawa gala haitu ri tambe polava nu lanta pesomba ala langa nu kawa haitu matepasantanga ante kalanga nu lanta pesomba. 5 Pade nipoviaa ampa ponto gala raposuaraka kayu pokova bo nipataka ri pasu pata-mpasu nu kawa gala. 6 Kayu pokova haitu nipovia lako ri kayu akasia anu nitapiki ante gala. 7 Pade randua kayu pokova haitu nisuaraka riara ponto nipataka ri rindi ntimali-mali nu lanta pesomba haitu. Lanta pesomba haitu nirindi ante dopi bo bagia riarana nipoporara.Pomboli uve
8 I Bezaleel novia pomboli uve ante kadana lako ri gala. Gala haitu niala lako ri pompevayo-pompevayo mombine anu nokarajaa ri vamba nu Tenda nTUPU.
Novia Vala Doyata Tenda nTUPU
9-17 Naupu sia, i Bezaleel novia vala doyata nu Tenda nTUPU ante povombo lako ri kae linen nalusu. Ri sabingga puluna bo tasina, kandate doyata haitu pata pulu pata (44) metere, bo ri sabingga mpandakena bo mpanauna kandatena ropulu rometere (22). Ri ntiku-ntiku doyata kae povombo nipataka ri tinja-tinja anu nipasidai ante polondona bo pekaina. Pekaina, polondona, bo potutui vuntu ntinjana nipovia lako ri salaka. Tinja bo potande nipovia lako ri gala, ropulu tinja ri sabingga puluna bo ropulu vai ri sabingga tasina, bo sapulu tinja ri sabingga mpanauna. Ri sabingga mpandakena naria bobaana. Ri njidi-nggana bobaa haitu nipataka povombo, kandatena simbo ono metere onopulu senti (6,60). Povombo nipataka ri tatalu tinja ntimali-mali bo tinja haitu nitande potande anu nipovia dako ri gala.
18 Kae povombo bobaa nu doyata haitu nipovia lako ri kae linen nalusu anu nitanu ante bana nagavu, nakamao bo nalei, bo nirambaki ante posuji. Kandatena sio metere bo kapekana rometere, nasimbayu ante povombo doyata. 19 Kae povombo bobaa haitu nipataka ri tinja pata-ntinja anu nitande potande anu nipovia dako ri gala. Pura-pura pekai, potutui vuntu ntinja, bo polondona nipovia lako ri salaka, 20 tapi panto-panto Tenda bo valana nipovia lako ri gala.
Gana nipake novia tenda nTUPU
21 Hitumo gana nipake novia Tenda nTUPU, pomboli rompeka vatu noisi sapulu parenta nu Alatala. Gana haitu nitulisi ntoLewi nangoseaka parenta i Musa. ToLewi haitu nikeniaka i Itamar, ana i Harun topanggeni pesomba.
22 I Bezaleel ana i Uri tupu i Hur lako ri valaa Yehuda, ia novia pura-pura anu niparenta nTUPU rapoviana. 23 Timalina i Aholiab ana i Ahisamakh lako ri valaa i Dan. I Aholiab saito tona natau norandu, nomperano bo notanu kae linen nalusu ante bana nagavu, nakamao bo nalei nipovia dako ri bulu bimba. 24 Bulava nipesomba nipake novia Tenda nTUPU kantamona nitasere sanjobu (1.000) kilob, nitimba nangoseaka potimba ri Tenda nTUPU.
25 Salaka nikeni ntoIsrael nitasere talu njobu pataatu talupulu (3.430) kiloc kantamona nitimba nangoseaka potimba nipake ri Tenda nTUPU. 26 Kadea salaka haitu niala dako ri doi petolosi nibayari ntoIsrael anu nitulisi riara posensus. Pura-pura langgai kana nombayari santanga mpeka doi salaka, ali nipakatantu nangoseaka ali nipake ri Tenda nTUPU. Kadea nu langgai noumuru labi ropulu mpae, onoatu talu njobu limaatu limapulu (603.550). 27 Talu njobu pataatu (3.400) kilo salaka nipake novia saatu potande tinja nu Tenda nTUPU bo tinja povombo polenduti anu nidika ri olo nTombi Nagasa bo Tombi Nelabi Kagasana riara Tenda. Sangu potande kantamona talupulu pata (34) kilo. 28 Labi nu salaka haitu, talupulu (30) kilo, nipovia i Bezaleel nu polondo bo pekaina ri tinja, ante potutui vuntu tinja haitu.
29 Kantamo gala nipesomba ka TUPU, nitasere ronjobu pataatu ropulu alima (2.425) kilo. 30 Gala haitu nipake novia potande tinja ri vamba nu Tenda nTUPU. Nipake muni novia lanta pesomba ante kawa gala nisua bo pareva-pareva nipake ri lanta pesomba. 31 Nipake muni novia potande tinja povombo doyata, potande tinja bobaana, panto nu tenda, bo panto vala nu doyatana.