Alatala nompelisi tona movia Tenda bo gana-ganana
31
TUPU nanguli ka i Musa, 2 “NipelisiKumo i Bezaleel ana i Uri, tupu i Hur lako ri valaa i Yehuda, 3 bo nidekeiKumo Nosa GasaKu. NidekeiKu kapande ka ia, katau bo pompakule riara mpengaya pokarajaa, 4 evamo katau nomperano, bo natau ia norandu bulava, salaka bo gala. 5 Natau ia nosampu vatu mpoali bo norandu kayu bo mpengaya-ngaya katau ntanina. 6 I Aholiab, ana i Ahisamah lako ri valaa i Dan, nipelisiKu munimo mombatulungi i Bezaleel. NidekeiKu muni kapande namadai ka topande ntanina, ala ira mamala mompovia anu Kuparenta ka ira evamo: 7 TendaKu, Peti Pojanji bo potutuina, bo pura-pura gana nu Tenda. 8 Gana nu Tenda haitumo: meja bo ganana, kada mpoindo lako ri bulava mpuu ante ganana, bo lanta potunju dupa. 9 Rapoviara muni lanta ka pesomba nipalabu bo mpengaya ganana, pomboli uve ante kadana. 10 Rapovia muni pakea petupu ka i Harun ntaliana, anu kana rapakera tempo ira mokarajaa manggeni pesomba. 11 Rapoviara lana ada, bo dupa vangi ka Tombi Nagasa. Pura-pura haitu kana rapoviara mangoseaka anu nipatotosiKu ka iko.”Eo penonto
12-13 TUPU nombatudu i Musa mompatolele ka toIsrael ivei, “Oseakamo atura-atura eo penonto, eo nipakatantuKu rapenonto. Sampe ri kasae-saena eo haitu majadi pepatora ka Yaku bo komiu, ala rasanimiu Yakumo TUPU, bo komiu nitanikaKu majadi todeaKu mboto.
14-15 Oseakamo atura-atura eo penonto sabana nireke eo nagasa ka komiu. Kudekei aono eo loga mokarajaa, tapi eo kapapituna, eo mbaso anu nitaniaka ka Yaku. Isema mokarajaa eo haitu kana rahuku mate bo domo rareke todeaKu. 16 ToIsrael bo muli-mulira sampe kasae-saena kana mangoseaka atura-atura eo haitu tanda pojanji nipoviaKu nte ira. 17 Eo haitu, eo pepatora ka Yaku bo ka komiu toIsrael sampe kasae-saena. Sabana Yaku, TUPU nompajadi langi bo tana riara ono eo, bo eo kapapituna Yaku nenontomo nokarajaa bo notondodo.”
18 Naupupa notesa nte i Musa ri bavo Bulu Sinai, Alatala nombadekei rompeka vatu noisi parenta-parentaNa, anu nitulisiNa mboto.