Tau-tau nolenje mpo japi nipovia dako ri bulava
Ulangan 9:6-29
32
ToIsrael nombarasai nasae gagamo i Musa dopa notua lako ri bulu. Da hamai ri bavo nu bulu i Musa, nasiromumo ira nombatagui i Harun bo nanguli, “Nikeni i Musamo kita nesuvu lako ri Mesir, tapi hitupa domo nisanita nuapa najadi nte ia. [Isemamo manggeniaka kita?] Jadi povia ka kamimo anu mamala rasomba kami bo mombakeniaka kami.”2 Nangulimo i Harun ka ira, “Lelakamo nganti-nganti bulava nipake nu bereimiu bo ana-anamiu, bo keni ka yaku.” 3 Jadi nilelakaramo nganti-nganti, bo nidekeira ka i Harun. 4 I Harun nangala nganti-nganti haitu, bo nigonuna pade nitolina bulava nigonu haitu ri potepena pade nipaana sampe najadi tau-tau nolenje mpo japi lakina. Todea haitu nanguli, “Hitumo lenje ntupu anu nanggeni kita nesuvu lako ri Mesir!”
5 Naliu haitu nipopeangga i Harunmo sangu lanta pesomba ri ngayo tau-tau japi haitu bo niulina ivei, “Maile maria posusa mombabila TUPU Alatala.” 6 Kamaile mpadondona, nakavamo todea nanggeni bara sakoangu binata ka pesomba rapalabu, bo bara sakuyapa vai ka pesomba posinggabelo. Ira nonturo nompebasa nangande bo nanginu, nompesana-sana sampe nadea anu ledo nasipato nipoviara.
7 [Da ranja mposusa toIsrael,] nangulimo TUPU ka i Musa, “Musa! Potuamo masalisa, apa todea nikeniakamu nesuvu lako ri Mesir novia anu nadaamo. 8 Nasalisa mpuu niliunakara parenta-parentaKu. Nipoviara tau-tau japi lako ri bulava nigonu, bo nisombara ante nombadekei pesomba ka tau-tau haitu. Niulira, haitumo tupu anu nanggeniaka ira lako ri Mesir. 9 NisaniKu todea gahaitu nakaa mpuu bagara. 10 Nee mombalava Yaku! Yaku narau mpuu ka ira bo Kupakaropu ira. Tapi iko bo mulimu Kupajadi sangu ngata nambaso.”
11 I Musa nerapi nte TUPU Alatala, ivei, “Pue, nee marau sampe Komiu mompakaropu todea haitu! Apa Komiumo nompakasalama ira lako ri Mesir ante kuasa bo karoso nambaso. 12 Ane Komiu mompakaropu ira, toMesir manguli [Komiu ledo nabelo apa] Komiu aga nanggeni todea haitu nesuvu lako ri Mesir ala Komiu mompatesi bo mombaropusi ira. Nee ivetutu, Pue! Balikimo niaMiu bo nee mombaropusi todea gahaitu. 13 Nee rakalingasi batuaMiu i Abraham, i Ishak bo i Yakub. Toramo, Komiu nojanji ante sumpa mombadekei muli madea ka ira, nasimbayu mpo kadea betue ri langi. Bo muni njumangu tana nijanjiMiu haitu majadi tanara mboto.” 14 Jadi TUPU nombabaliki niaNa bo ledo najadi mombaropusi todeaNa haitu.
15 I Musa notua lako ri bulu haitu hau nanjili nte todeana bo nanggeni rompeka vatu anu ntimali-mali nitulisi parenta nu Alatala. 16 Alatala mboto novia vatu haitu bo notulisi parenta-parentaNa.
17 Da ranja mpolipa notua, i Yosua anu nomporoa i Musa panganea nangepe toIsrael novoo-voo, jadi nangulimo ia ka i Musa, “Naria voo mposieva lako ri potenda!”
18 Nangulimo i Musa, “Niepeku eva ledo suara ntona padagi bara pongare ntona nidagi. Raitu suara ntopodade.”
19 Tempo i Musa da ri kente nu bulu napara ri potenda haitu, nipeintana tau-tau nolenje mpo japi nipovia lako ri bulava bo tona nodade nolodi-lodi, jadi narau mpuumo ia. Nivaatakana rompeka vatu nipotulisi parenta nTUPU nikenina haitu, sampe narupusaka. 20 Nakava ri potenda, nialana tau-tau japi nipovia ntoIsrael haitu, nigonusina, nipombayuna sampe nalusu mpo avu, pade nigalona nte uve, bo nituduna toIsrael manginuna.
21 Nanguli i Musa ka i Harun, “Nuapa nipoviara ka iko sampe nipalambamu ira novia dosa mbaso?”
22 Nesana i Harun, “Nee marau ka yaku. Nisanimu mboto berimba todea gahitu nasaro novia anu nadaa. 23 Niulira ka yaku ivei: ‘I Musa hii nanggeni kita nesuvu lako ri Mesir, tapi ledo nisanita nuapa najadi nte ia. Isema manggeniaka kita? Jadi povia ka kamimo anu mamala manggeniaka kami.’ 24 Jadi yaku nombatudu ira mombadekei ramba-ramba bulavara, bo nidekeiramo ka yaku. Pura-pura ramba-ramba haitu nidikaku ri apu, bo najadi mbotomo japi hitu.”
25 Nikita i Musamo i Harun nompalamba toIsrael majadi eva jara nikabasaka lako riara vala, sampe ira aga rapongeika nu balira. 26 Jadi neanggamo i Musa ri pesua nu potenda bo nongare, “Isema mosabingga ka TUPU, kana makava tumai!” Jadi nakavamo valaa i Lewi nantagui i Musa, 27 bo niulina ka ira, “TUPU Alatala nisomba ntoIsrael nomparenta komiu simbo mombaosu gumamiu bo molipa mompesayo potenda hitu, lako ri pesua hitu sampe ri kaupu mpotenda bo mompatesi sampesuvu, roa-roa bo tona nasadoyata nte komiu.”
28 Valaa i Lewi nangoseaka parenta haitu bo nitasere talu njobu (3.000) tona namate nipatesi. 29 Nangulimo i Musa ka valaa i Lewi, “Eo hitu nitaniakamiumo karomiu majadi tona mokarajaa ka TUPU. Komiu nangoseaka parentaku sampe komiu nasadia nompatesi ana-anamiu bo sampesuvu-sampesuvumiu. Jadi TUPU mombadekei rasi ka komiu.”
30 Kamailena nangulimo i Musa ka todea haitu, “Komiu novia dosa mbaso. Tapi hitupa hau vai yaku mantende ri bulu haitu mantingayo TUPU. Perapi doa yaku mamala merapi nte TUPU ala dosamiu raampungiNa.”
31 Naliu haitu, hau vaimo i Musa nantingayo TUPU bo nanguli, “Todea haitu novia dosa mbasomo. Ira novia tupu ntanina lako ri bulava. 32 Ampungimo dosara! Ane ledo raampungiMiu, lalisimo sangaku dako ri Buku nipotulisiMiu sanga ntodeaMiu.”
33 Nesana TUPU, “Aga tona novia dosa nte Yaku Kulalisi sangana dako ri Buku haitu. 34 Koimo keniaka ira hau ri ponturo niuliKu ka iko. MalaekaKu mombakeniaka iko. Tapi makava tempona ngena, tona gahaitu Kuhuku sabana dosa-dosara.”
35 Jadi TUPU nombahuku todea gahaitu sabana ira nompasuu i Harun movia tau-tau nolenje mpo japi lako ri bulava rasombara.