TUPU nombatudu toIsrael mompalaisi bulu Sinai
33
TUPU nanguli ka i Musa, “Palaimo dako rahitu bo koimo mosinggani-nggani nte todea nikeniakamu lako ri Mesir haitu, hau ri ngata nijanjiKu ka i Abraham, i Ishak, bo i Yakub ante mulina. 2 Yaku mombatudu saito malaeka manggeniaka komiu. Yaku mompopalai toKanaan, toAmori, toHet, toFeris, toHewi, bo toYebus. 3 Komiu hau ri tana nakalumana bo naboya. Tapi Yaku mboto ledo hau nte komiu apa nakaa bagamiu, mbelaka Kupakaropu komiu ri tatanga dala.”4-6 Naliu haitu, TUPU nombatudu i Musa manguli tesaNa ka toIsrael ivei: “Komiu todea nakaa baga. Ane Kuporoa komiu, nau aga sampalai, natantumo Kupakaropusi komiu. Tumo rapakemiu ramba-rambamiu, pade Yaku mompekiri nuapa Kupovia ka komiu!” Nieperapa TUPU nanguli ivesia, nabuku mpuumo rarara eva tona ri kamate. Jadi nibukaramo ramba-ramba nipakera, tanda nasusa rarara. Nipalaisirapa Bulu Sinaia, toIsrael domo nompake ramba-ramba.
Tenda Posinggava nte TUPU
7 Nggani-nggani toIsrael notenda, i Musa nangala tenda santanina bo nipatakana nakavao sakide lako ri potenda ntodea. Tenda haitu niuli “Tenda Posinggava nte TUPU”, bo isema madota merapi pepopotosi dako nte TUPU, ia kana hau ri tenda haitu. 8 Nggani-nggani i Musa hau ri tenda haitu, todea neangga ri vamba ntendara bo nompeintaka ia sampe nesua riara nTenda. 9 Nesuapa i Musa, nanaumo tinja kulimu bo netaa ri vamba nTenda. Lako ri kulimu haitu TUPU notesa ka i Musa. 10 Ane nipeinta ntoIsraelmo tinja kulimu ri vamba nTenda Posinggava, ira pura-pura notungga sampe ri tana bo nesomba lako ri vamba ntendara mboto. 11 TUPU notesa nosintingayo nte i Musa, eva tona ntalivega nosimpotesa. Naliu haitu, nanjilimo i Musa hau ri potenda ntodea. Tapi i Yosua, ana i Nun, saito langgai da nangura tuvuna nipotimali i Musa, ledo nompalaisi Tenda Posinggava haitu.
TUPU nojanji mombalenduti todeaNa
12 Naria saeo i Musa nanguli ka TUPU, “Pue, Komiu nombatudu yaku manggeniaka todea hitu hau ri ngata nipejanjikaMiu. Tapi ledo niuliMiu isema ratuduMiu mombatulungi yaku. Pue, niuliMiu yaku nisaniMiu bo nipotoveMiu. 13 Ane ivetutu, Pue, patuduki ka yaku dalaMiu, ala yaku mamala mokarajaa bo mompakadamba raraMiu. Bo tora munimo todea hitu nipelisiMiumo majadi todeaMiu.”
14 Nangulimo TUPU, “Yaku mboto manggeniaka bo manjaliku komiu. Kudekei katinonto bo belo ka komiub.”
15 Nesana i Musa, “Ane Komiu ledo manggeniaka bo manjaliku kami, nee ratudu kami mompalaisi ponturo hitu. 16 Ane Komiu ledo momporoa bo mombatulungi kami, ledo rasani ntona Komiu nompotove yaku bo todea hitu. Apa pomporoaMiu kami nompoposisala kami ante tosangatana.”
17 Nangulimo TUPU ka i Musa, “Perapimu Kupoiyo, sabana iko nisaniKu bo nipotoveKu.”
18 Pade nerapi i Musa, “Pue, popakita ka yaku reme kaogeMiu.”
19 Nesana TUPU, “Yaku moliu ri ngayomu ante belo bo kuasaKu naoge bo Kuuli sangaKu nagasa ala muepe. Yakumo TUPU, bo Yaku mompopakita kabelo raraKu bo asi mataKu ka isema-sema Kupodota. 20 Tapi lenjeKu ledo Kupopakita ka iko, sabana isema-sema manggita lenjeKu natantumo ia mamate. 21 Ri sabinggaKu hitu naria vatu nobunti, iko namala meangga ri sia. 22 Tempo reme kaogeKu moliu, iko Kusuaraka ri beka nu vatu nobunti haitu bo Kututui ante paleKu sampe Yaku matepaliu. 23 Pade Kuosuraka paleKu ala iko mamala mompeinta bengoKu, tapi ledo mukita lenjeKu.”