Rompeka vatu potulisi nabaru
34
Naliu haitu nangulimo TUPU ka i Musa, “Paamo rompeka vatu eva bara ipia. Ri vatu haitu Kutulisi tesa nasimbayu ante ri vatu narupusaka nivaatakamu. 2 Masadia-diamo, maile mpadondo iko mendake ri Bulu Sinai bo mantingayo Yaku ri bavo bulu haitu. 3 Ledo ria saitoa mamala momporoa iko bara maria ri umba-umba ri bulu haitu. Nau japi bo bimba, nee rapalamba mangguku ri kente nu bulu haitu.”4 Pade nipaa i Musa vaimo rompeka vatu, nasimbayu eva vatu bara ipia. Bo kamaile mpadondo mpisina, nikeni i Musamo vatu haitu hau ri bavo Bulu Sinai nangoseaka anu niparenta nTUPU ka ia. 5 Jadi nanaumo TUPU riara nggulimu, bo neangga nte i Musa ri bulu haitu, bo nanguli sangaNa nagasa, haitumo TUPU. 6 Noliumo TUPU ri ngayo i Musa bo nanguli, “Yakumo TUPU, TUPU Alatala. Nabelo raraKu bo naasi mataKu. Nambaso mpuu toveKu. Yaku namala raparasaya bo ledo nasalisa narau. 7 Yaku batena mompotove nonjobu-njobu tonaa sampe ri muli nu mulina bo nombaampungi kasala, pesapuaka, bo dosa. Tapi tona masipato rahuku, ledo Kukabasaka lako ri pehuku, bo pehuku haitu muni rarasai nu ana-anana bo tupu-tupuna sampe ri muli katatalu ntapina bo kapata ntapina sabana dosa ntotuara.”
8 I Musa kaliu-liu notungga sampe ri tana bo nesomba. 9 Niulina, “Pue, ane Komiu mpuu-mpuu nompokono yaku, yaku merapi, poroamo kami. Todea hitu nakaa mami bagara, tapi ampungimo sala bo dosa kami bo tarimamo kami majadi todeaMiu.”
Pojanji nipakabaru
10 TUPU nanguli ka i Musa, “Hitupa Yaku mompovia pojanji ante komiu toIsrael. Rakitamiu Yaku novia kabaraka-kabaraka anu dopa naria najadi ri njumangu dunia hitu. Pura-pura todea ngata anu nosinjori ka komiu manggita kabaraka nipokumaaka Kupovia, bo rasanira Yakumo noviana. 11 Oseakamo atura-atura Kudekei ka komiu eo hitu. Yaku mompopalai toAmori, toKanaan, toHet, toFeris, toHewi bo toYebus tempo komiu hau mangala tana haitu. 12 Nee komiu movia pojanji posinggabelo ante tona ri ngata rakakavamiu, apa ira ledo maupu-upu mombarasaki komiu movia dosa. 13 Nee radekei ira monturo ri ngatamiu, tapi ombosakasimo lanta pesombara, rupusimo tinja vatu nabaraka bo dungganakasimo tinja nu viatara anu nosanga Asyera. 14 Nee mombasomba tupu ntanina, apa Yaku TUPU, ledo nipokonoKu Yaku rapasimbayu ante nuapa-nuapa.
15 Nee mpuu movia pojanji posinggabelo ante tona ri ngata haitu, sabana tempo ira mombadekei pesombara ka tupu-tupu nisombara, ira mangunaka komiu, bo komiu mangande anu nipesombakara. [Batuana, komiu nangoseaka ira nombasomba tupu nisombara haitu.] 16 Ane ana-anamiu moberei ante anara mombine, anamiu rapadidisi nu mombine-mombinera haitu mompalaisi Yaku bo mombasomba anu nisombara.
17 Nee rapovia tau-tau lako ri ase bo nee rasombamiu.
18 Poviamo posusa Pepatora Roti Ledo Noragi. Evamo niparentaKu ka komiu bara ipia, komiu kana mangande roti anu ledo nidika ragi pitu eo kasaena riara bula Abib, sabana ri bula haitu komiu nompalaisi tana Mesir.
19 Pura-pura ngana langgai lumbua bo binata lakina lumbua, Yakumo tupuna. 20 Tapi ana lumbua nu keledai mamala ratolokimiu ante ana bimba. Ane ledo madota komiu mombatolokina, tambolo nu keledai haitu kana rakotosakamiu. Ana-anamiu langgai lumbua kana ratolokimiu.
Ledo ria saitoa mamala makava nte Yaku ane ledo manggeni pesomba.
21 Naria ono eo loga mokarajaa, tapi ri eo kapapituna, komiu kana menonto, naupa tempo mpotuda bara tempo mposoreaka.
22 Poviamo Posusa Posoreakab tempo komiu mompamula mangala asele pamulana lako ri gando. Povia muni Posusa Sou Tava tempo komiu mompupu vua-vua ri kaupu mpae. 23 Talu-nggani sampae pura-pura langgai kana makava mombasomba Yaku, TUPU Alatala anu nisomba ntoIsrael. 24 Yaku mompopalai tona lako ri tana Kudekei ka komiu bo Kupakaluo ngatamiu. Bo tempo komiu hau mantuntuni posusa Roti Ledo Noragi, Posusa Posoreaka bo Posusa Sou Tava, ledo ria saitoa mabia mombasuu ngatamiu.
25 Tempo komiu mombadekei binata rasambale rapesomba, nee radekei mosinggani-nggani ante anu nidika ragi. Binata nisambale ka pedekei tempo Posusa Paskahc kana rapakaupu bongi haitu muni, ledo mamala maria labina sampe eo maile.
26 Mpae-mpae asele pamulana lako ri tanamiu kana rakenimiu ri banua nTUPU, Alatala nisombamiu.
Bau ana nu bimba bara tovau ledo mamala raporiapu ante uve njusu ntinana.”
27 Nangulimo TUPU ka i Musa, “Tulisimo tesaKu hitu, sabana nangoseaka tesaKu hitu, nipoviaKumo pojanji ante iko bo toIsrael.” 28 Patapulu eo bo patapulu bongina i Musa nonturo ri bulu haitu nosinggani-nggani ante TUPU, bo ledo nangande bo ledo nanginu. Tesa-tesa ri pojanji haitu, haitumo sapulu parenta nu Alatala, nitulisi i Musa ri vatu rompeka.
I Musa notua lako ri bulu Sinai
29 Tempo i Musa notua lako ri Bulu Sinai nanggeni rompeka vatu nipotulisi sapulu parenta haitu, lenjena nenggila sabana ia notesa nte Alatala. Tapi i Musa mboto ledo nisanina lenjena nenggila. 30 I Harun bo pura-pura todea nanggita lenje i Musa nenggila, bo naeka ira manggaparaina. 31 Tapi i Musa nombaronde ira, jadi i Harun bo pura-pura pakeni ntodea nombakaparai ia, bo notesamo i Musa ka ira. 32 Naliu haitu nasiromu puramo toIsrael nombatagui ia, bo niuli i Musamo atura nitesa nTUPU ka ia ri bavo Bulu Sinai.
33 Naliu notesa nte ira, nitutui i Musamo lenjena ante kae. 34 Nggani-nggani i Musa nesua riara nTenda Posinggava, motesa nte TUPU, kae haitu nibukana sampe ia nesuvu. Nesuvupa ia nompasimbayu pura-pura petevai nTUPU ka toIsrael, 35 nikitara lenje i Musa nenggila. Naliu haitu nitutuina vaimo lenjena sampe ia motesa vai nte TUPU.