Atura eo penonto
35
I Musa nompasiromu toIsrael bo nanguli parenta nTUPU ka ira ivei: 2 “Naria ono eo tempo mokarajaa, tapi eo kapapituna eo penonto, eo nitaniaka ka TUPU. Isema-sema mokarajaa ri eo penonto kana rahuku mate. 3 Nau mompanaki apu riara banuamiu eo haitu, ledo mamala.”Pesomba rapake rapovia Tenda nTUPU
4 I Musa notesa parenta nTUPU ka pura-pura toIsrael: 5 “Kenimo anu naria nte komiu rapesomba ka TUPU rapovia TendaNa. Isema-sema mamomi rarana kana mombadekei:
bulava, salaka, gala,
6 kae linen nalusu,
kae nagavu, nakamao, bo nalei,
kae nipovia lako ri bulu ntovau,
7 kuli bimba lakina anu nosura nalei, kuli binata nalusu,
kayu akasia,
8 lana zaitun ka poindo,
rampa-rampa rapovia lana ada bo rapovia dupa vangi,
9 vatu ake bo vatu mpoali ntanina raporambaki baju efod bo potutui bambara ntopanggeni pesomba.”
Gana-gana rapake movia Tenda nTUPU
10 [I Musa nompapola tesana ka toIsrael.] “Pura-pura topande anu nidekei pompakule, anu naria nte komiu kana makava movia mpengaya anu niparenta nTUPU, haitumo: 11 Tenda nTUPU, atana bo potutuina, pokaina bo pekaina, dopina, kayu polondona, tinja vambana bo potandena. 12 Kana rapovia muni Peti Pojanji ante kayu pokovana, potutuina bo kae povombo polenduti. 13 Rapovia meja pomboli roti pesomba, kayu pokovana, roti pesomba, bo pura-pura ganana. 14 Kana rapovia muni poindo, kada mpoindo, ante lana bo pura-pura ganana. 15 Rapovia muni lanta potunju dupa ante kayu pokovana, lana ada, dupa vangi. Rapovia muni povombo vamba nTenda. 16 Rapovia lanta pesomba ka pesomba nipalabu ante kawa gala nosulapa ampa, kayu pokova ante pura-pura ganana. Rapovia pomboli uve ante kadana rapomboli uve potoposi kada. 17 Rapovia muni povombo-povombo ka doyata, povombo bobaa ri doyata, tinja-tinja ante potandena, 18 Rapovia panto bo kaloro ka Tenda nTUPU bo ka povombo doyatana. 19 Rapovia muni pakea rapake topanggeni pesomba tempo ira mokarajaa ri Tombi Nagasa, pakea nitaniaka ka i Harun ntaliana.”
ToIsrael nanggeni pesombara
20 Naliu haitu pura-pura toIsrael anu nasiromu haitu nagaromo, 21 bo isema-sema namomi rarana, nanggeni pedekeina ka TUPU nompakagana anu niparaluu ka Tenda nTUPU. Nikenira muni pura-pura anu niparaluu riara mpetupu bo gana ka pakea ntopanggeni pesomba. 22 Isema-sema namomi rarana, nau langgai bara mombine, nakava nanggeni kanji poramba, nganti-nganti, sinji, bili, bo mpengaya-ngaya bulava poramba ntanina rapesomba ka TUPU. 23 Naria muni nanggeni gana-gana ntanina anu naria nte ira, evamo kae linen nalusu, kae nagavu, kae nakamao, bara kae nalei, kae nipovia lako ri bulu ntovau, kuli bimba lakina anu nosura nalei, bara kuli binata nalusu. 24 Pura-pura tona naria salaka bara gala, nikenira ka TUPU. Ivesia muni tona naria kayu akasiana, nikenina muni. 25 Mombine natau nokaloro bana, nanggeni bana nikalorora mboto, haitumo bana linen nalusu bo bana nipovia lako ri bulu bimba anu nosura nagavu, nakamao bara nalei. 26 Ira natau muni nokaloro bana dako ri bulu ntovau. 27 Pakeni-pakeni nanggeni vatu ake bo vatu mpoali ntanina rapataka ri baju efod bo ri potutui bambara. 28 Ira muni nanggeni rampa-rampa bo lana zaitun rapake ri poindo, bo rapovia lana ada bo dupa vangi. 29 Pura-pura toIsrael anu namomi rarana, nanggeni pesomba ka TUPU rapake ri pokarajaa niparenta nTUPU ka i Musa. Haitumo pesomba nikenira ka TUPU nte momi rara.
Topande nipatava movia Tenda nTUPU
30 Naliu haitu nangulimo i Musa ka toIsrael, “TUPU nompelisi i Bezaleel ana i Uri, tupu i Hur, lako ri valaa i Yehuda. 31 Alatala nombadekei Nosa GasaNa bo kuasaNa ka ia. NidekeiNa muni kapande, katau bo pompakule riara mpengaya pokarajaa 32 evamo katau nomperano, bo norandu bulava, salaka bo gala. 33 Natau ia nosampu vatu mpoali, norandu kayu, bo natau novia mpengaya-ngaya anu nagaya. 34 I Bezaleel bo roana i Aholiab, ana i Ahisamakh lako ri valaa i Dan, nidekeika nTUPU pompakule mompatuduki kataura ka tona ntanina. 35 Ira nidekeika katau riara mpengaya-ngaya pokarajaa. Natau ira nopaa vatu bo ase. Natau muni ira novia baju dako ri kae linen nalusu bo bana nagavu, nakamao bo nalei, bo natau muni nantanu kae ntanina. Iramo topande nomperano bo nompakule movia mpengaya pokarajaa.