36
Ivesiamo i Bezaleel, i Aholiab, bo pura-pura tona nanggava katau lako nte TUPU, nisanira novia mpengaya anu niparaluu mompovia Tenda nTUPU. Ira kana movia mpengaya haitu nangoseaka anu niparenta nTUPU ka ira.”Pedekei ntoIsrael nadea
2 Jadi i Musa nombaronde i Bezaleel, i Aholiab bo pura-pura topanggava katau lako nte TUPU, bo tona ntanina anu nadota rarana netulungi. Pade nituduna ira mompamulamo mokarajaa. 3 I Musa nombadekei pedekei ntoIsrael ka topokarajaa novia Tenda nTUPU. Mpadondo-mpadondo toIsrael kana nanggeni pesomba lako ri kamomi rarara. 4 Jadi pura-pura tona natau haitu da ranja pokarajaa, [nipeintara nadea gaga gana nikeni ntoIsrael]. Jadi simbo nibolira pokarajaara bo hau 5 nanguli ka i Musa, “Pedekei ntona haitu nelabimo, nadeapa pade gana-gana anu niparaluu rapake movia pokarajaa nipatava nTUPU.”
6 Jadipa niuli i Musamo ka todea ri potenda, naganamo pedekei ka Tenda nTUPU. Jadipa todea domo nanggeni pedekei hanupa, 7 sabana nelabimo gana rapompakaupu pura-pura pokarajaa haitu.
Tona anu natau movia Tenda nTUPU
8 Tona anu natau ntoto lako ri topande haitu, novia Tenda nTUPU. Tenda haitu nipoviara lako ri sapulu baa kae linen nalusu anu nitanu ante bana nagavu, nakamao bo nalei, pade nisuji ante gambara malaeka kerub. 9 Sabaa-sabaa nasimbayu tuvuna; kandatena sapulu rometere bo pekana rometere. 10 Lima-baa kae niposidai bivi ndatena najadi sangu povombo. Lima-baapa nipovia ivesia muni. 11 Ri bivi ndate randua povombo haitu nipovia pokaina lako ri kae gavu, 12 limapulu pokaina ri sangu-sangu povombo ala majadi sangu. 13 Nipovia limapulu pekaina dako ri bulava mompakasangu randua povombo haitu.
14 Naliu haitu nipoviara ata nu tenda lako ri sapulu sabaa (11) kae nipovia lako ri bulu ntovau. 15 Sabaa-sabaa nasimbayu tuvuna, kandatena sapulu talu (13) metere, bo pekana rometere. 16 Lima-baa niposiumpu bivi ndatena najadi sangu povombo, bo ono-baapa niposiumpu najadi sangu povombo muni. 17 Limapulu pokai nipataka ri bivi ndate povombo paratama bo limapulu vai ri bivi ndate povombo karanduana. 18 Pade nipovia limapulu pekaina lako ri gala mompoposidai roangu povombo haitu majadi ata nu Tenda.
19 Naliu haitu, nipovia randua potutui Tenda, sangu lako ri kuli bimba lakina anu nipakalei, bo anu ntanina lako ri kuli nalusu.
20 Naliu haitu ira novia dopi-dopi lako ri kayu akasia raporindi nu Tenda. 21 Sampeka-sampeka dopi kandatena pata-metere bo kapekana ono pulu aono (66) senti. 22 Ri vuntu-vuntu nu dopi nipopodila randua. Ivesiamo nipoviara pura-pura dopi haitu. 23 Ri bagia Tenda sabingga puluna, nipoviamo ropulu mpeka dopi 24 bo patapulu potandena nipovia lako ri salaka, randua potande nidika ri tambe sampeka dopi. 25 Ri sabingga tasina nipovia ropulu mpeka dopi, 26 ante patapulu potande nipovia dako ri salaka, randua potande nidika ri tambe sampeka dopi. 27 Ri bengo nTenda ri sabingga mpanau, nipovia ono mpeka dopi biasa 28 bo rompeka nipoposiku ri pasuna ntimali. 29 Rompeka dopi ri pasuna nipoposiumpu lako ri tambena sampe ri bavona. Ri pasu rompasu nipovia ivesia pura. 30 Jadi ono mpeka dopi biasa bo rompeka dopi nipoposiku bo sapulu aono potande nipovia dako ri salaka, randua potande ri tambe dopi sampeka.
31 Naliu haitu, nipoviara sapulu alima polondona lako ri kayu akasia ka Tenda. Alima ri sabingga puluna, 32 bo alimapa ri sabingga tasina, bo alima vai ri bengo nTenda, haitumo ri sabingga mpanauna. 33 Kayu polondo nipasantanga lako ri dopi sampeka hau ri tampana ntimali-mali. 34 Dopi nu tenda bo kayu polondona haitu nitapiki ante bulava, pade nipataka ponto-ponto bulava rapotande kayu polondo haitu.
35 Ira muni novia povombo polenduti [ri olo Tombi Nagasa bo Tombi Nelabi Kagasana] riara nTenda haitu. Povombo polenduti nipovia lako ri kae linen nalusu anu nitanu ante bana nagavu, nakamao bo nalei, pade nisuji ante gambara malaeka kerub. 36 Nipoviara ampa tinja lako ri kayu akasia anu nitapiki bulava rapetaka povombo polenduti haitu. Bo nipoviara muni pekaina lako ri bulava bo pata mpeka polampi tinja nipovia dako ri salaka.
37 Pade nipovia muni povombo vamba ka Tenda lako ri kae linen nalusu anu nitanu ante bana nagavu, nakamao bo nalei, bo nirambaki ante posuji. 38 Nipoviara alima tinja ante pekai-pekaina rapompataka kae ri vamba haitu. Vuntu ntinja bo polondona nitapiki ante bulava, tapi alima polampina nipoviara lako ri gala.