Tenda nTUPU
26
TUPU nanguli ka i Musa, “Poviamo tenda ka Yaku lako ri sapulu baa kae linen nalusu, anu nitanu ante bana gavu, nakamao bo nalei. Tanumo kae haitu ante gambara kerub. 2 Sabaa-sabaa kae kana masimbayu tuvuna, ndatena sapulu rometerea (12) bo pekana rometereb. 3 Bivi ndatena lima baa kae kana rapasiumpu majadi sangu povombo, bo kae lima baapa kana rapovia ivesia muni. 4 Poviamo pekaina lako ri kae gavu ri bivi ndatena randua-ndua povombo haitu. 5 Daumo simbo limapulu kadeana pekaina ri bivi ndatena ri povombo randua haitu. 6 Povia limapulu pokaina lako ri bulava ala mompoposidai povombo randua haitu majadi sangu.7 Anu rapoata nu tenda haitu, sapulu sabaa kae nipovia lako ri bulu ntovau. 8 Sabaa-sabaa kae haitu kana masimbayu tuvuna, kandatena sapulu talu metere bo pekana rometere. 9 Lima baa kae kana raposidai bivi ndatena majadi sangu povombo, bo ono baa kae ntanina kana rapovia ivesia muni. Posidaina kaaonona kana ratilu randua ala mombatutui ngayo nu tenda. 10 Patakamo limapulu pekai ri bivi ndatena povombo pamulana bo limapulu vai ka povombo karanduana. 11 Povia muni limapulu pokaina lako ri gala ala randua povombo haitu mamala raposidai majadi ata ntenda. 12 Labina santanga baa kae haitu, rapotutui bagia nTenda purina. 13 [Ata nTenda haitu nandatepa sametere pade Tenda. Jadi,] labina santanga metere ri kandatena ntimali-mali rapopelabi mombatutui bivi nTenda.
14 Poviamo randua kae mbaso ntanina anu rapotutui ri savaliku ntenda, sangu lako ri kuli bimba anu nipakalei bo sangupa vai lako ri kuli nalusu.
15 Poviamo dopi-dopi lako ri kayu akasia raporindi nu Tenda. 16 Dopi-dopi raporindi nu Tenda haitu simbo pata metere kandatena bo pekana onopulu ono (66) senti. 17 Ri vuntu-vuntu nu dopi rapopodila randua. Ivesiamo rapovia pura-pura dopi nu Tenda. 18 Kandate nu Tenda sabingga puluna, poviamo ropulu mpekana, 19 bo patapulu potandena rapovia lako ri salaka, sampeka dopi randua sapatuna. 20 Kandate nu Tenda ri sabingga tasina, poviamo ropulu mpeka dopina 21 bo patapulu potandena rapovia lako ri salaka, bo randua-randua potandena ri tambe sampeka dopi. 22-23 Ri bengo ntenda, ri sabingga mpanauna, poviamo ono mpeka dopi bo rompeka dopi nipoposiku ka pasuna ntimali. 24 Sampeka-sampeka dopi ri pasuna ntimali, anu nipoposiku, kana rapoposiumpu lako ri bagia tambena, sampe ri bavona. 25 Jadi pura-pura naria valu mpeka dopi ante sapulu aono potandena nipovia lako ri salaka, haitumo randua-randua potande ri tambe dopi sampeka.
26 Poviamo sapulu alima nggotona kayu polondo lako ri kayu akasia. Alima kayu haitu rapolondona sabingga puluna. 27 Alima vai rapolondona ri sabingga tasina, alimapa vai ri bengo nTenda, haitumo ri sabingga mpanauna. 28 Kayu polondo ri tatangana, rapasantanga lako ri dopi sampeka, hau ri tampana ntimali-mali. 29 Dopi-dopi nTenda bo kayu-kayu polondona kana ratapiki bulava. Ponto-ponto mombatande kayu haitu kana rapovia lako ri bulava.
30 Popeanggamo Tenda haitu nangoseaka anu nipopakitaKu ka iko ri bulu hitu.
31 Poviamo povombo polenduti [Peti Pojanji] riara nTenda haitu. Poviamo lako ri kae nalusu, anu nitanu ante bana nagavu, nakamao bo nalei. Tanumo kae haitu ante gambara malaeka kerub. 32 Patakamo povombo haitu ri pata ntinja kayu akasia anu nitapiki bulava ante pokaina nipovia lako ri bulava muni. Tinja haitu rapopeangga ri bavo potande nipovia lako ri salaka. 33 Pataka povombo haitu ri toto pokai-pokai ri posidai nu ata ntenda. Ri bengo povombo haitu kana radika Peti Pojanji anu niisi rompeka vatu anu nitulisi atura nu Alatala. Povombo haitu mombaoloki Tombi Nagasa bo Tombi Nelabi Kagasana [sabana ri sia rakakava nTUPU]. 34 Tutuimo Peti Pojanji ante potutuina. 35 Meja pomboli roti pesomba kana radika ri savaliku nTombi Nelabi Kagasana ri sabingga tasina, bo kada mpoindo ri sabingga puluna riara nTenda haitu.
36 Poviamo povombo vamba koluna lako ri kae linen nalusu anu nitanu ante bana nagavu, nakamao bo nalei, rarambaki ante posuji. 37 Povia muni alima tinja lako ri kayu akasia bo ratapiki ante bulava. Povia muni pekaina lako ri bulava rapombaloe povombo vamba. Poviamo lima angu potande lako ri gala rapotande tinja-tinja haitu.”