Pesomba nikeni ntona rapovia Tenda nTUPU
25
TUPU nanguli ka i Musa, 2 “Tudumo toIsrael manggeni pesomba rapovia tenda ka Yaku. Isema mamomi rarana, kenimo pesomba, haitumo:3 bulava, salaka, gala;
4 kae linen a nalusu,
kae nagavu, nakamao bo nalei,
kae nipovia lako ri bulu ntovau,
5 kuli bimba lakina anu nipakalei,
kuli binata nalusu,
kayu akasia,
6 lana rapake ri poindo,
rampa-rampa rapovia lana ada bo rapovia dupa vangi,
7 bo mpengaya vatu mpoali raporambaki baju efod bo potutui bambara ntopanggeni pesomba.
8 Tudumo todea movia tenda ka Yaku, ala Yaku mamala monturo ri tatangamiu. 9 Tenda bo mpengaya ganana kana rapoviara mangoseaka anu Kupopakita ka iko.”
Peti Pojanji
10 “Poviamo sangu peti lako ri kayu akasia, kandatena saatu sapulu (110) senti, pekana bo kalangana simbo ono pulu aono (66) senti. 11 Riarana bo ri savalikuna ratapiki ante bulava anu ledo ria galona, bo bivina ralili bulava muni. 12 Ri kayu pokova, likomo ampa ponto bulava bo pataka randua ponto ri sulapa sabingga njidi bo randuapa vai ri sulapa sabingga nggana, randua sabingga. 13 Povia muni pokova lako ri kayu akasia, bo ratapiki bulava. 14 Pade suarakamo kayu pokova riara ponto haitu. 15 Pokova haitu batena maboli riara ponto bo ledo mamala rasuvuraka. 16 Riara peti mupodika rompeka vatu anu nitulisi parenta-parenta Kudekei ka iko.
17 Poviamo potutui peti haitu lako ri bulava anu ledo ria galona. Kandatena saatu sapulu (110) senti bo pekana onopulu bo ono (66) senti. Potutui haitu rauli ‘Potutui tanda posinggabelo nu Alatala nte manusia.’b 18 Povia muni randua anu nolenje mpo malaeka lako ri bulava nipempe, sangana kerub. 19 Kerub haitu radika ri potutui tampana ntimali-mali. Randua kerub haitu rapakasangu nte potutuina, 20 bo rapoposintingayo metiro bo kapina menggaka mosintomu mombataungo potutui Peti Pojanji haitu. 21 Dikamo vatu rompeka anu nitulisi aturaKu riara mPeti bo tutuimo Peti haitu. 22 Ri sia Yaku mosinggava nte iko. Ri bavo potutuina ri olo randua kerub anu nombataungo Peti haitu, Yaku mombadekei parenta-parenta ka iko bo mupapola ka toIsrael.”
Meja pomboli roti pesomba
23 TUPU nanguli ka i Musa, “Poviamo meja lako ri kayu akasia, kandatena valupulu valu (88) senti, pekana patapulu pata (44) senti, bo langana simbo onopulu ono (66) senti. 24 Tapiki ante bulava anu ledo ria galona, bo bivina ralili bulava. 25 Poviamo polava pitu senti santanga (7,5) pekana ri ntiku-ntiku bivi meja mompakaroso kadana. Bivi mpolava haitu muni kana radika bulava. 26 Bo povia ampa ponto bulava bo patakamo ri pasuna pata-mpasu, ri kadana. 27 Ponto haitu kana mapara polavana mombatande kayu pokova ala meja haitu mamala rakova. 28 Kayu pokova haitu kana rapovia lako ri kayu akasia bo ratapiki ante bulava. 29 Poviamo dula, tubu, boda mbaso, bo jolo rapotoli uve anggur rapesomba. Pura-pura gana nu meja kana rapovia lako ri bulava anu ledo ria galona. 30 Meja haitu kana radika ri ngayo nu Peti Pojanji, bo ri bavo meja haitu, kana batena masadia roti pesomba ka Yaku.”
Kada mpoindo
31 “Poviamo kada mpoindo mopanga mpo bunga. Poviamo lako ri bulava anu ledo ria galona. Potandena bo batana kana rapovia lako ri bulava nipempe; bunga-bungana, bo pantaka bungana kana rapakasangu ante potandena bo batana. 32 Ri batana kana rapovia ono-mpanga, tatalu-tatalu mpanga sabingga. 33 Sampanga-sampanga rarambaki mpo tatalu bunga badam ante pantaka bungana. 34 Ri batana rarambaki muni ampa bunga badam ante pantaka bungana. 35 Ri tambe sapasa pangana ntimali haitu, kana rarambaki sangu pantaka nu bunga. 36 Jadi njumangu kada mpoindo ante pantaka-pantakana bo panga-pangana kana rapovia lako ri sanggoto bulava nipempe anu ledo ria galona.
37 Poviamo papitu poindo, bo tunjumo ala remena mombavanta sampe ri koluna. 38 Poviamo supi bo dula lako ri bulava anu ledo ria galona. 39 Pakemo talupulu alima (35) kilo bulava rapovia kada mpoindo haitu ante mpengaya ganana. 40 Nee malinga, kada mpoindo haitu kana rapovia mangoseaka jonjo nituduakaKu ka iko ri bavo bulu hitu.”