Pojanji nTUPU ante toIsrael nipakaasa
24
Naliu haitu, TUPU nanguli ka i Musa, “Pantendemo mantingayo Yaku, komiu i Harun, i Nadab bo i Abihu, bo pitu pulu pakeni ntodea. Dopame mapara nte Yaku, pantaputumo mombasomba Yaku. 2 Aga iko saitomu, Musa, mamala manggaparai Yaku. Tona ntanina ledo mamala manggaparai Yaku, bo todea ledo mamala mendake ri bavo nu bulu hitu.”3 Jadi haumo i Musa manguli pura-pura tesa bo parenta nTUPU ka todeana. Ira pura-pura nesana nosanggani-nggani, “Kami madota mangoseaka pura-pura parenta nTUPU.” 4 Naliu haitu, nitulisi i Musa puramo parenta nTUPU.
Kamailena, da mpadondona, nipovia i Musamo lanta pesomba bo nipopeanggamo sapulu randua vatu pepatora ri kente bulu haitu. Vatu sapulu randua haitu rapotandai sapulu randua valaa ntoIsrael. 5 Naliu haitu nitudu i Musamo bara sakondua ngana kabilasa mombadekei pesomba nipalabua ka TUPU bo nombasambale bara sako angu japi majadi pesomba posinggabelob. 6 Sabagia raa japi haitu niala i Musa bo nitolina riara loya-loya. Sabagiapa nitolina ri bavo lanta. 7 Pade nialana buku anu nitulisi parenta-parenta nTUPU, bo nibacana pakamangga ka todea haitu. Nangulimo ira, “Kami madota mangoseaka parenta nTUPU bo movia anu niuliNa.”
8 Naliu haitu, niala i Musamo raa riara loya bo nivembasina ka todea bo nanguli, “Raa hitu nompakaasa pojanji nTUPU nte kita, nangoseaka parenta-parentaNa.”
9 Naupu sia, i Musa, i Harun, i Nadab, i Abihu, bo pitupulu pakeni ntodea hau nantende ri bulu, 10 bo nikitara Alatala nisomba ntoIsrael neangga ri bavo anu eva jaula nipovia lako ri vatu nilam, anu nagavu mpo langi nagasa. 11 Jadi pakeni-pakeni ntoIsrael nanggita Alatala. Naupa ivesia, Alatala ledo nompakaropu ira. Naliu haitu nangande bo nanginumo ira [pade nanjili hau ri potendara.]
I Musa ri Bulu Sinai
12 Naupu sia, nangulimo TUPU ka i Musa, “Kaimo tumai ri bavo bulu mosinggava nte Yaku. Yaku mombadekei rompeka vatu ka iko anu nitulisi ante atura-aturaKu. Pura-pura atura haitu nitulisiKu rapatuduki ka todeaKu.”
13 Naliu haitu i Musa bo timalina i Yosua hau nendake ri bulu nikakava nu Alatala. 14 Dopame nalai, nitevai i Musa mamimo pakeni-pakeni ntoIsrael, “Popeamiu ri potenda sampe kami manjili. I Harun bo i Hur naria ri sii nte komiu. Isema maria parakarana mamala makava nte ira bo ira mamala mombatulungi.”
15 I Musa nendake ri Bulu Sinai, bo bulu haitu nibungusi nggulimu kumba. 16-17 Reme karia nTUPU nanau ri bavo Bulu Sinai haitu bo toIsrael nanggitana eva apu narega ri vuntu nu bulu. Ono eo kasaena kulimu haitu nombabungusi bulu, pade ri eo kapapituna TUPU nombaronde i Musa lako riara nggulimu. 18 Jadi i Musa nendake njuu hau riara nggulimu haitu. Patapulu eo bo patapulu mbongi i Musa nonturo ri bulu haitu.