Pokainggu nakana bo nanoa
23
TUPU nompapola tesaNa: “Nee mompatolele kareba dava, bo nee mombatulungi tona nadaa ante mosabi anu ledo makana. 2 Nee mosipasiose mantuntuni todea movia anu nadaa. Ane komiu mosabi ri ngayo ntopotangara, nee aga mantuntuni todea anu nodava bo nombatenggoaka atura. 3 Nee mompelenje riara mpotangara, naupa tona nitangara haitu tona napakasi.4 Ane rapeintamiu japi bara keledai nu balimiu anu nalipo, keni mpanjilimo ka tupuna. 5 Ane keledai nu balimiu madungga sabana panggenina nantamo, tulungimo ia mompopeangga keledaina. Nee aga rapalaika.
6 Ane tona napakasi makava manggeni parakara ri potangara, pakanoa mombatangara parakarana. 7 Nemo mombarai tona ante anu ledo nakana bo nee ntoto rapalamba tona ledo nasala sampe rahuku mate, apa Kuhuku tona movia anu nadaa ivehaitu.
8 Nee mantarima doi sogo, sabana doi sogo haitu mamala mombatutui mata ntona sampe ledo nikitana anu nakana, bo mompakarugi tona ledo nasala.
9 Nee movia anu ledo masipato ka topesovo. Nirasaimiumo berimba najadi topesovo, sabana bara ipia komiu muni topesovo ri tana Mesir.”
Mpae kapapituna bo eo kapapituna
10 “Ono mpae komiu mamala mombatuda taluamiu bo mangala aselena. 11 Tapi mpae kapapituna tana haitu kana rapopopausemiu. Jadi ri mpae haitu ledo mamala komiu mompasiromu anu natuvu mboto riara ntaluamiu. Palambamo anu natuvu mboto haitu ka tona napakasi, bo labina ka binata ledo nipiara. Ivesia muni mupovia ante talua anggurmu bo kayu zaitunmu.
12 Riara saminggu ono eo komiu mamala mokarajaa, tapi ri eo kapapituna komiu kana menonto, ala binatamiu, batua-batua bo topesovo nokarajaa ka komiu menonto muni.
13 Pariaramo pura-pura anu niuliKu ka komiu. Nee metupu nte tupu ntanina, nau manguli sangana ledo mamala.”
Atura-atura tatalu posusa pepatora
14 “Mpae-mpae komiu kana mompovia talu nggani eo mbaso mombabila Yaku. 15 Riara bula Abib, ri tempo nipakatantu, komiu kana mompovia Posusa Pepatora Roti Ledo Noragi evamo niparentaKu ka komiu, sabana bula haitu komiu nompalaisi tana Mesir. Nee mangande roti nidika ragi, riara pitu eo kasaena posusa haitu. Nggani-nggani komiu makava metupu nte Yaku, komiu kana manggeni pesomba.
16 Poviamo Posusa Posombe tempo komiu mangala asele paratama lako ri taluamiu.
Poviamo Posusa Sou Tava ri kaupu mpae, tempo komiu mompasiromu asele ntalua anggur bo talua vua-vua.
17 Mpae-mpae tempo mompovia tatalu posusa pepatora haitu, pura-pura langgai kana makava metupu nte Yaku, TUPU Alatala nisombamiu. 18 Tempo komiu manggeni binata rapesomba ka Yaku, nee rapesomba roti noragi mosinggani-nggani nte raa nu binata haitu. Lomu lako ri binata nipesomba ri eo mbaso, ledo mamala raboli sampe maile.
19 Mpae-mpae asele paratama lako ri poviamiu kana rakenimiu hau ri banuaKu, TUPU, Alatala nisombamiu.
Nee raporiapu bau bimba bara tovau ante uve njusu ntinana.”
Janji bo Parenta
20 “Yaku mombatudu malaekaKu mombalenduti komiu riara mpolipamiu bo manggeniaka komiu hau ri ngata nipasadiaKu ka komiu.
21 Pariaramo bo osekamo tesa nu malaekaKu haitu. Nee monasu ka ia, sabana kuasaKu naria nte ia, bo ia ledo mombaampungi komiu mombaliunaka tesana. 22 Ane komiu manturusi ia bo mangoseaka mpengaya parentaKu, Yaku mombaeva pura-pura balimiu bo tona anu mangeva komiu. 23 MalaekaKu mokolu ka komiu bo manggeni komiu hau ri ngata ntoAmori, toHet, toFeris, toKanaan, toHewi bo toYebus, bo ira Kupakaropu. 24 Nee mombasomba tupu-tupu nisombara, bo nee mompasiala inggura nosambaya. Rupusimo tau-tau nisombara bo kotosi tinja-tinja vatu nipakera nosambaya. 25 Ane komiu mombasomba Yaku, TUPU Alatala, Kudekei rasi, pangande bo panginu ka komiu, bo mpengaya dua ledo mambela komiu. 26 Ri ngatamiu ledo maria mombine malali bara magampa, komiu Kupopoumuru mandoe.
27 Tona ri ngata-ngata rakavamiu Kupakaviora nte Yaku, bo Kupakaingu rarara. Pura-pura balimiu radagi bo malai. 28 Bali-balimiu Kupakagaro, bo toHewi, toKanaan bo toHet Kupopalai lako ri ngayomiua ala komiu mamala mapola. 29 Ira ledo Kupopalai singgani riara sampae, ala tana haitu ledo marakayu, bo binata sese nee madea gaga. 30 Tapi ira Kupopalai mpeunju-unju sampe magana kadea ntodeamiu monturoka tana haitu.
31 Pantaa-pantaa nu ngatamiu Kupakatantu lako ri Tasi Siroyo sampe ri Tasi Tatanga, bo lako ri karava bai sampe ri Binangga Efrat. Komiu Kupakakuasa monturo ri ngata haitu, sampe tupu ngata haitu mamala rapopalaimiu tempo komiu mangago ngata haitu. 32 Nee movia pojanji ante tupu ngata gahaitu bara ante tupu-tupu nisombara. 33 Nee mompalamba ira monturo ri ngatamiu, ala komiu ledo matetoliani bo rakenira mombasomba tupu nisombara bo ivesiamo komiu movia dosa ri ngayoKu.”