Lanta potunju dupa
30
Nanguli vai TUPU ka i Musa, “Poviamo sangu lanta lako ri kayu akasia rapotunju dupa. 2 Lanta potunju dupa haitu kana mosulapa; kandatena bo kapekana simbo patapulu bo lima (45) senti, bo langana siopulu (90) senti. Ri pasuna pata-mpasu rapovia mpo tandu anu rapakasangu ante lanta potunju dupa haitu. 3 Ri bagia bavona, bo sulapa pata-njulapa ante anu nipovia mpo tandu kana ratapiki ante bulava mpuu bo ralili bulava ri bivina ntiku-ntiku. 4 Povia ampa ponto bulava bo pataka roangu ri tambe lilina ntimali-mali raposuaraka kayu pokova. 5 Kayu pokova haitu kana rapovia lako ri kayu akasia bo ratapiki ante bulava. 6 Dika lanta potunju dupa haitu ri savaliku nu povombo polenduti anu nipataka ri ngayo nu Peti Pojanji. Ri sia Yaku mosintomu ante komiu.7 Mpadondo-mpadondo tempo i Harun makava mompasadia poindo, ia kana motunju dupa vangi ri bavo lanta potunju dupa haitu. 8 Ivesia muni kana rapoviana tempo ia motunju poindo nggoviana. Potunju dupa haitu kana rapoviana sampe ri muli nu mulina. 9 Nemo manggeni dupa nitagi rapesomba ri lanta potunju dupa. Nee mompalabu binata bara pedekei ntanina evamo gando bo nee mombatoli uve anggur ri bavo lanta potunju dupa. 10 Sanggani sampae i Harun mompovia ada pompakagasa lanta potunju dupa. Ri pasu pata-mpasu anu nipovia mpo tandu kana rarere ante raa nu binata anu nipesomba ka posompo dosa. Anu haitu kana rapovia mpae-mpae sampe ri muli nu mulina. Ivesiamo lanta potunju dupa kana rataniaka ka Yaku bo rareke nagasa mpuu.”
Balasitee ka Tenda nTUPU
11 TUPU nanguli ka i Musa, 12 “Tempo movia posensus, haitumo tempo mombareke kadea ntoIsrael, langgai-langgai kana mombayari doi potolosi karora nte Yaku ala ira ledo mambela silaka tempo posensus haitu rapovia. 13 Pura-pura tona nireke riara posensus haitu kana mombayari doi potolosi santanga doi salaka. Kadeana nipakatantu nangoseaka ali nipake ri TendaKu. Doi haitu majadi pedekei nitaniaka ka Yaku. 14 Tona nireke riara posensus haitu, haitumo langgai-langgai noumuru lako ri ropulu mpae, kana mombadekei pedekei nitaniaka haitu. 15 Tona nakalumana ledo mombadekei melabi, bo tona napakasi ledo namala mombayari makura tempo ira mombayari doi potolosi ka karora. 16 Alamo doi haitu lako nte toIsrael, pakemo mangali gana-gana niparaluu rapetupu riara nTendaKu. Pura-pura doi haitu, doi potolosi ka karora mboto, bo Yaku kana mantora bo manjaliku ira.”
Pomboli Uve
17 TUPU nanguli ka i Musa, 18 “Poviamo sangu pomboli uve lako ri gala anu nolenje mpo gumba ante kadana lako ri gala muni. Dikamo pomboli uve haitu ri olo nu TendaKu bo lanta pesomba, pade isi ante uve. 19 Uve haitu ka i Harun ntaliana ala ira mamala mombatoposi pale bo kadara 20-21 dopame mesua ri TendaKu bara manggaparai lanta pesomba manggeni pesomba rapalabu. Ira kana motoposi palera bo kadara ala ledo Kupatesi. Ira bo mulira kana manturusi atura haitu sampe muli nu mulira.”
Lana ada
22 TUPU nanguli ka i Musa, 23 “Ala rampa-rampa tobelona ntoto, ono kilo lana vangi mur nauve, talu kilo kanino, talu kilo tovu vangi, 24 bo ono kilo kayu teja. Pura-pura ratimba nangoseaka potimba nipake ri TendaKu. Tambai pata lite lana zaitun, 25 bo poviamo lana ada, anu nigalo mpo lana vangi. 26 Tolimo sakide lana ada niposigalo haitu ri TendaKu, ri Peti Pojanji, 27 ri meja ante mpengaya ganana, ri kada mpoindo bo ganana, ri lanta potunju dupa, 28 ri lanta pesomba ka pesomba nipalabu ante mpengaya ganana, bo ri pomboli uve ante kadana. 29 Iko mombatoli sakide lana ada ri gana-gana haitu, batuana iko mombataniaka gana-gana haitu ka Yaku, ala pura-pura anu haitu rareke magasa. Aga tona nitaniaka ka Yaku mamala mombatui mbara-mbara nitaniaka ka Yaku.a
30 Toli muni sakide lana ada ri balengga i Harun ntaliana ala ira raanggataka majadi topanggeni pesomba mokarajaa ka Yaku. 31 Ulika toIsrael: lana ada haitu rataniaka ka Yaku sampe ri muli nu mulimiu. 32 Lana haitu ledo mamala ratoli ka tona biasa. Nee muni mompake galona haitu movia lana ntanina. Lana haitu nitaniaka ka Yaku, bo kana rareke anu nagasa. 33 Isema-sema movia lana eva haitu, bara mompakena ka tona ledo topanggeni pesomba, domo rareke todeaKu.”
Dupa
34 TUPU nanguli ka i Musa, “Alamo bara sakuya ngaya rampa-rampa, haitumo pulu nu dama, kuli nu katue lokan, pulu nu kayu rasamala bo dupa navangi, masimbayu kaogena. 35 Pakemo pura-pura haitu movia galo nu dupa vangi. Tambai gara ala dupa haitu ledo mabali bo mamala rapake ka Yaku. 36-37 Sabagia lako ri dupa haitu kana rapombayu pakalusu. Kenimo dupa lusu haitu hau ri TendaKu, ri posinggavaKu nte komiu. Dupa radika ri ngayo Peti Pojanji haitu. Dupa haitu kana rareke anu nagasa nitaniaka ka Yaku. Nee movia dupa masimbayu eva haitu ka komiu mboto. 38 Isema movia dupa vangi eva haitu rapakena mboto, domo rareke todeaKu.”