I Harun ntaliana nianggataka najadi topanggeni pesomba
29
TUPU nanguli ka i Musa, “Iveimo i Harun ntaliana raanggataka ala ira mamala mokarajaa manggeni pesomba ka Yaku. Alamo sangu japi lakina da nangura tuvuna bo roangu bimba lakina anu nadoli. 2 Lako ri gando tobelona ntoto, poviamo talu-ngaya roti ledo nidika ragi. Sangaya ragalo ante lana zaitun, sangayapa ledo radika lana, bo sangayapa vai rapakanipi bo rarere lana. 3 Dikamo roti haitu ri tonda bo pesombamo ka Yaku singgani-nggani ante japi pesomba bo roangu bimba lakina.4 Tudumo i Harun ntaliana makava ri vamba nTendaKu bo mompakagasa karora nte uve. 5 Tudumo i Harun mompasua pakea pesomba. Pamulana rapasuana baju riarana anu nirambaki, pade baju ndoe, baju efod, potutui bambara, bo pompou kope. 6 Dikamo songgo ri balenggana bo patakamo poramba bulava anu niuki ivei: ‘Nipatani ka TUPU.’ 7 Maupu sia alamo lana ada bo tolimo ri bavo balenggana. Jadi ivesiamo ia raanggataka majadi topanggeni pesomba.
8 Maliu haitu, tudumo anana makava bo mompasua baju riarana anu nirambaki, 9 bo pompou kopera, pade dika songgo ri balenggara. Ivesiamo manganggataka i Harun ntaliana majadi topanggeni pesomba. Ira ante mulira kana mokarajaa ka Yaku.
10 Maliu haitu iko kana manggeni japi lakina ri ngayo nTendaKu. I Harun ntaliana kana mombadika palera ri bavo balengga binata haitu. 11 Sambalemo japi haitu ri ngayoKu, ri ngayo vamba nu Tenda. 12 Alamo sabagia raa nu japi haitu bo rereka ri anu nipovia mpo tandu ri pasuna pata-mpasu nu lanta pesomba. Labi nu raa haitu kana ratoli ri tana ri tambe nu lanta. 13 Maupu haitu, ala sambana nte lomu anu nombatutui taina, todu nu atena, bo randua vuana ante lomuna, bo dika puramo haitu ri bavo lanta pesomba bo palabumo, rapesomba ka Yaku. 14 Isina, kulina, tai tinana bo tai liko nu japi haitu kana rapalabu ri savaliku nu ngata. Haitu majadi pesomba ka posompo dosa ntopanggeni pesomba.
15 Maliu haitu alamo sangu bimba lakina pangane. I Harun ntaliana kana mombadika palera ri bavo balengga binata haitu. 16 Sambalemo binata haitu, alamo raana bo dundusika sulapa pata-njulapa nu lanta pesomba. 17 Bimba lakina haitu kana rasampa. Isi rarana bo paana kana ratoposi bo radika ante balenggana bo anu nisampa. 18 Dika puramo bimba nisampa haitu ri bavo lanta pesomba majadi pesomba rapalabu. Soa nu pesomba haitu mompakasana raraKu.
19 Ala bimba lakina karanduana, haitumo bimba ka ada panganggataka i Harun ntaliana. Tudumo i Harun ntaliana mombadika palera ri bavo balengga binata haitu. 20 Pade sambalemo bimba lakina haitu, ala sakide raana bo rereka talinga nggana i Harun bo ana-anana, ri kotumpu mpale ngganara, bo ri kotumpu nggada ngganara. Labi nu raa haitu kana mudundusika sulapa pata-njulapa nu lanta pesomba. 21 Ala sakide raa lako ri bavo lanta pesomba bo sakide lana ada, bo vembasika i Harun nte ana-anana ante pakeara. Ivesiamo i Harun bo ana-anana ante pakeara rapatani ka Yaku.
22 Alamo lomu nu bimba nisambale ka ada panganggataka haitu. Ala lelona nalomu, sambana bo lomu lako ri isi ntaina, todu nu atena, roangu vuana ante lomuna, bo paa ngganana. 23 Lako ri karanji roti ledo nidika ragi anu nipesomba ka Yaku pangane, alamo roti sangu-sangu sangaya, haitumo sangu nigalo lana zaitun, sangu anu ledo nidika lana, bo sangu anu nirere lana. 24 Dika puramo bau bo roti haitu ri pale i Harun ntaliana bo tudumo ira manganggatakana mompopakita pedekei ka Yaku. 25 Pade alamo roti bo bau nte lomuna haitu lako nte ira bo palabumo ri bavo lanta pesomba, ri bavo pesomba nipalabu pangane. Soa nu pesomba haitu mompakasana raraKu. 26 Alamo bangasu nu bimba lakina haitu bo anggataka rapompakita pedekei ka Yaku. Bo haitumo bagiamiu rakandemiu.
27 Jadi riara ada panganggataka topanggeni pesomba, bangasu bo paa nu bimba anu nianggataka rapopakita pedekei ka Yaku, kana rataniaka ka topanggeni pesomba majadi bagiana. 28 Iveimo kabotuKu anu ledo namala rabaliaka: nggani-nggani todeaKu makava manggeni pesomba posinggabelo, bangasu bo paa nu binata haitu bagia i Harun ntaliana. Haitumo rareke pedekei ka Yaku lako ri pesomba posinggabelo ntodea.
29 Pakea petupu i Harun kana radekei ka muli-mulina, ala mamala rapakera tempo ira raanggataka majadi topanggeni pesomba ri ngayoKu. 30 Ana i Harun anu manjambei tuamana bo mesua ri TendaKu metupu ri Tombi Nagasa, ia kana mompake pakea haitu pitu eo kasaena nantuntuni ada panganggataka.
31 Alamo isi bimba karanduana anu nipake mpo ada panganggataka i Harun ntaliana bo pakangongomo bau haitu ri poriapu nitaniaka ka Yaku. 32 Bau haitu kana rakande gi Harun ntaliana ri vamba nTendaKu ante labi roti ri tonda. 33 Aga topanggeni pesomba anu nipoviaka ada posompo dosa pangane mamala mangande bau bo roti haitu. Ledo mamala rakande ntona ntanina, apa bau bo roti haitu nitaniaka ka Yaku. 34 Ane maile mpadondo roti bara bau haitu da melabi, labina haitu kana rapalabusi pakaupu bo domo rakande, sabana nipatanimo bo nireke nagasa.
35 Ada panganggataka i Harun ntaliana rapovia pitu eo kasaena nantuntuni anu nituduKu ka iko. 36 Eo-eo kana radekei sangu japi lakina rapesomba ka posompo dosa. Ante pedekei haitu lanta pesomba rareke nagasa. Lanta pesomba haitu kana mulanai ante lana zaitun ala rapatani ka Yaku. 37 Poviamo haitu pitu eo kasaena, ala lanta pesomba mpuu-mpuu magasa sabana nitaniaka ka Yaku. Nuapa-nuapa mambela lanta pesomba haitu kana rataniaka ka Yaku. Isema-sema mambela lanta pesomba haitu nireke nitaniaka ka Yaku.”
Pedekei eo-eo
Bilangan 28:1-8
38 TUPU nanguli, “Eo-eo sampe ri kasaena, ri bavo lanta pesomba haitu kana radika pesomba roangu bimba anu noumuru sampae. 39 Sangu rapesomba ri mpadondona bo sangu ri nggoviana. 40 Mosinggani ante ana nu bimba pesomba mpadondona, kana radika rolite gando tobelona ntoto ragalo ante salite lana zaitun nagasa. Toli muni salite uve anggur, haitumo niuli pesomba potoli. 41 Ana bimba anu rasambale nggoviana rapovia pakasimbayu, ante gando, lana zaitun bo uve anggur. Soa nu pesomba nipalabu haitu mompakasana raraKu.
42 Ivesia sampe ri kasae-saena anu nipalabu haitu kana radekei ka Yaku ri bavo lanta pesomba ri ngayo vamba TendaKu. Ri sia Yaku mosintomu nte komiu bo motesa ka komiu. 43 Yaku mosinggava hamai ante komiu toIsrael, bo reme peongaKu mompakajadi Tenda haitu rareke magasa.
44 TendaKu bo lanta pesomba haitu Kutaniaka ka Yaku. I Harun ntaliana Kutaniaka mokarajaa ka Yaku majadi topanggeni pesomba. 45 Yaku monturo ri tatangamiu toIsrael, bo majadi Alatala rasombamiu. 46 Rasanimiu ngena Yakumo TUPU, Alatala anu nanggeni komiu nesuvu lako ri tana Mesir, ala Yaku mamala monturo ri tatangamiu. Yakumo TUPU, Alatala rasombamiu.”