Pakea ka pakeni ntopanggeni pesomba
28
TUPU nanguli ka i Musa, “Pokiomo tuakamu i Harun ante ana-anana i Nadab, i Abihu, i Eleazar bo i Itamar, bo patanimo ira majadi topanggeni pesomba ka Yaku. 2 Poviamo baju rapake i Harun manggeni pesomba, ala ia rapeinta mpo tona nibila. 3 Pokio puramo tona natau nodau anu nidekeiKuka kapande. Tudumo ira movia pakea rapake i Harun tempo ia rapatani mobago manggeni pesomba ka Yaku. 4 Tudu muni ira movia baju efod, potutui bambara, baju ndoe, baju riarana nirambaki, songgo, bo pompou kope. Pakea ntopanggeni pesomba haitu kana rapoviara ka tuakamu i Harun bo ana-anana rapakera mobago ka Yaku tempo manggeni pesomba ka Yaku. 5 Dekeika topande haitu kae linen nalusu bo bana nagavu, nakamao, bo nalei, bo bulava rapakera movia pakea haitu.6 Poviamo baju efod lako ri kae linen nalusu anu rarambaki ante posuji. 7 Poviamo robingga vinga nu baju efod. Tampana ntimali-mali radau ri baju efod. 8 Povia muni sangu pompou kope lako ri kae nasimbayu bo radau rapakasangu nte baju efod.
9-12 Alamo roangu vatu ake. Bo elo saito pande bulava mombauki sanga ana i Yakub sapulu randua ri vatu-vatu haitu nangoseaka sunjuna, simbo aono sanga ri sangu vatu. Pade ri bivi randua vatu haitu rapataka bulava nirandu bo radika ri vinga nu baju efod ntimali-mali majadi tanda pombatora sapulu randua valaa i Israel. Ivehaitumo i Harun manggeni sangara ri vingana, sampe Yaku, TUPU, batena mantora ira. 13-14 Anu ntanina lako ri bivi bulava randua haitu, kana rapovia muni randua rante lako ri bulava anu ledo ria galona. Rante haitu nikaloro mpo lui, bo rapataka ri bulava nirandu ri bivi vatu haitu.”
Potutui bambara rapake pakeni ntopanggeni pesomba
15 “Poviamo potutui bambara ka pakeni ntopanggeni pesomba [anu rapataka ri savaliku baju efod ri bambara ntopanggeni pesomba.] Potutui bambara rapake ntopanggeni pesomba tempo ia hau mangisani dota nTUPU. Kae potutui bambara haitu kana ratanu bo rasuji masimbayu eva potanu bo posuji kae baju efod. 16 Potutui haitu ratilu randua bo rapoposulapa. Maupu ratilu, kandatena bo kaluona kana simbo ropulu bo randua (22) senti. [Bivina ntimali-mali radau rapovia mpo kanto.] 17 [Ri savalikuna] rapatakamo sapulu randua vatu mpoali, pata ndala. Dala paratamana vatu delima, vatu krisolit, bo vatu zamrud. 18 Dala karondalana vatu pirus, vatu nilam, bo vatu intan. 19 Dala katalu-ndalana vatu ambar, vatu ake bo vatu kecubung. 20 Dala kapata-ndalana vatu beril, vatu ake nolapi-lapi bo vatu yaspis.a Bivi vatu sapulu randua haitu, kana rarandu ante bulava. 21 Ri sangu-sangu vatu haitu kana rauki sanga saito-saito lako ri sapulu randua ana i Yakub, majadi tanda pombatora valaa ntoIsrael.
22 Jadi poviamo randua rante potutui bambara haitu lako ri bulava ledo ria galona anu nikaloro mpo lui. 23 Povia muni randua ponto bulava bo pataka ri potutui bambara haitu ri tampa bavona ntimali-mali, 24 pade suaraka randua rante haitu riara nu ponto pangane. 25 Tampana randuapa kana rapataka ri bulava nirandu [ri bivi vatu ake ri vinga nu baju efod], ala potutui bambara haitu mamala raposiumpu ante bagia ngayo vinga nu baju efod.
26-27 Povia vai ampapa ponto bulava. Patakamo randua ponto ri toto potutui bambara haitu ntimali-mali ala mambela baju efod. Maliu haitu, pataka randuapa ponto bulava ri baju efod ntimali, ri olo podau vinga baju efod bo pompou kope, anu nitanu nalusu. 28 Ponto ri potutui bambara kana rapoposiumpu ante lui nakamao ri ponto ri baju efod ala potutui bambara haitu batena ri bavo pompou kope bo ledo montoya.
29 Tempo i Harun mesua hau riara Tombi Nagasa, ia kana manggeni sanga-sanga nu valaa ntoIsrael anu niuki ri potutui bambarana, ala Yaku, TUPU, kana mantora todeaKu. 30 Dikamo Urim bo Tumimb riara potutui bambara haitu. Rongaya anu haitu rapake i Harun ala rasanina dotaKu ka toIsrael ane ia mantingayo Yaku. Nggani-nggani ia mantingayo Yaku, TUPU, ia kana mompake potutui bambara.”
Pakea ntanina ka topanggeni pesomba
31 “Baju ndoe anu ledo nopale nipake ri tambe nu efod, kana rapovia lako ri kae nagavu. 32 Tambolo baju haitu kana ri tatangana, bo bivina ralapisi ante didi ala ledo masalisa maugu. 33-34 Ri doe-doe baju ndoe anu ledo nopale haitu kana rapovia poramba eva vua delima, lako ri bana gavu, nakamao bo nalei. Poramba vua delima haitu raposiolo ante banggula kodi nipovia dako ri bulava. 35 Baju haitu kana rapake i Harun tempo mokarajaa manggeni pesomba. Tempo ia makava ri ngayoKu ri Tombi Nagasa bara mompalaisi tombi haitu, maria raepe moni nu banggulana moringgo-ringgo, ala ia ledo mamate.
36 Poviamo poramba lako ri bulava anu ledo ria galona bo tulisimo ‘Nipatani ka TUPU.’ 37 Poumo poramba haitu ri songgo bagia koluna ante lui gavu. 38 Poramba bulava haitu kana rapake i Harun nte songgona ri toto kirena, tandana ia nanjimbuaka katasala nipovia ntoIsrael tempo nanggeni pesomba ka Yaku. Ane ivesia, Yaku, TUPU, mantarima pura-pura pesomba ntoIsrael ka Yaku.
39 Baju ndoe ntanina anu nopale bo nirambaki, bo songgo i Harun kana ratanu lako ri kae linen nalusu bo pompou kope kana rasuji. 40 Poviamo baju ndoe anu nopale, pompou kope, bo songgo ka ana i Harun ala rapeinta mpo tona nibila. 41 Tudumo tuakamu i Harun bo anana mompasua pakea haitu. Tolimo lana zaitun ri balenggara; ivesiamo ira raanggataka bo rataniaka mokarajaa manggeni pesomba ka Yaku.
42 Bo poviamo puruka ede lako ri kae linen ka ira, kandatena lako ri kope sampe ri timpu ala mombatutui bagia karo anu ledo masipato rakita. 43 Puruka haitu kana rapakera tempo mesua ri TendaKu bara manggaparai lanta pesomba tempo manggeni pesomba ri Tombi Nagasa, ala ledo mamate ira sabana natekita bagia karora anu ledo masipato rapeinta. Atura haitu kana rapake i Harun bo mulina sampe ri kasae-saena.”