I Yosua nombatudu tona hau mompomata-mata ngata Yerikho
2
Dako ri potenda ri Sitim, i Yosua nombatudu randua tona mompomata-mata tana Kanaan. Anu nopoko ntoto rapomatara haitumo ngata Yerikho. Pade haumo ira ri ngata haitu bo naturu ri banua bajinga nosanga i Rahab. 2 Magau ngata Yerikho nangepe bongi haitu naria toIsrael nakava nompomata-mata ngata Yerikho. 3 Pade magau nombatudu tona hau nte i Rahab bo nanguli, “Suvuraka ka kami tona nakava bo nesua ri banuamu, apa ira tuu nakava nompomata-mata ngata hitu.”4 Tapi i Rahab nombatabuniaka tona randua haitu. Nangulimo ia, “Nakana mpuu tona gahaitu nakava ante yaku, tapi ledo nisaniku dako ri umba ira, 5 bo tempo vamba bobaa pesua rangata ratutui, apa nanggoviamo, nesuvumo tona gahaitu, ledo nisaniku hau ri umba rakalaura. Ragamiumo, tantu da rakavamiu ira.” 6 Tano i Rahab aga notabuniaka tona randua haitu ri tambe nu ramia anu nipovaina ri bavo nu ata nantalumbu. 7 Jadi haumo tona gahaitu nombaraga ira hau ri binangga Yordan, ri tombua pevote. Nesuvupa toperaga gahaitu nitutui puramo vamba bobaa pesua rangata.
8 Bongi haitu dopame tona randua haitu naturu, nompenemo i Rahab hau nosinggavaka ira ri bavo nu ata nantalumbu, 9 bo notesa i Rahab ka ira, “Nisaniku, nidekei nTUPU Alatala ka komiumo ngata hitu. Pura-pura tona ri ngata hitu nakini bo naeka rarara mangeva komiu. 10 Apa niepe kamimo TUPU nompakabai tasi Siroyo ri ngayomiu, tempo komiu nesuvu dako ri Mesir. Bo nuapa nipoviamiu ka magau ntoAmori anu ri sabingga mpandake binangga Yordan haitu, iamo i Sihon bo i Og anu nipatesimiu. 11 Tempo kami nangepe tesa-tesa haitu naeka bo nouramo bia kami bo pura-pura tona naeka mantingayo komiu, apa Alatala anu nisombamiu, iamo Alatala nakuasa ri langi bo ri dunia. 12-13 Yaku nabelo nte komiu jadi komiu kana mabelo muni nte yaku. Pojanjimo ante sanga nTUPU Alatala, komiu mabelo nte sampesuvu-sampesuvuku. Pojanjimo komiu ledo mompatesi tina tuamaku, sampesuvu-sampesuvuku, bereira bo ana-anara! Dekei ka yaku sangu tanda ala mamala kuparasaya komiu mpuu-mpuu mompakasalama kami.”
14 Pade nesanamo tona randua haitu, “Kami mojanji, ane TUPU mombadekei ngata hitu ka kami, kami mombajaga komiu pakabelo, tapi nemo mutesa ka tona ntanina kami. Damo TUPU mombapindasi kami ane ledo rapakadupa kami pojanji kami hitu.”
15 Banua i Rahab nipopeangga narapa ri tembo nu ngata haitu, bo tona randua haitu niuluraka i Rahab ri pelaba. 16 Pade nangulimo i Rahab ka ira, “Koimo hau ri buluna, ala komiu ledo rasaka ntona nitudu magau. Petabunimo talueo, pade mamala komiu mompapola polipamiu.”
17 Nangulimo tona randua haitu ka i Rahab, “Kami kana mompakadupa pojanji kami anu niperapimu dako nte kami. 18 Aga hitu anu mupovia. Ane rasuu kami ngatamiu ngena tatakamo kaloro dako ri bana lei hitu ri pelaba nipoulurakamu kami. Tomamu, tinamu ante sampesuvu-sampesuvumu mupasiromu ri banuamu hitu. 19 Isema-sema ngena mesuvu dako ri banuamu bo mamate rapatesi, haitu salana mboto, ledo sala kami. Tapi ane maria komiu mamate rapatesi riara banuamu hitu, damo kami manjimbuaka salana. 20 Tapi ane mutesa ka tona ntanina patuju kami ri sii, domo maria sala kami, kami domo matepou ante janji anu niperapimu dako nte kami.” 21 Nipoiyo i Rahabmo tesa haitu, bo nidekeinamo ira malai. Pade nitatakanamo kaloro dako ri bana lei haitu ri pelaba.
22 Bo nalaimo tona randua haitu hau netabuni ri buluna. Talueo kasaena tona nitudu magau nompaelo ira ntapumpu dala, tapi ledo nikavara. Nanjilimo tona gahaitu hau ri ngata Yerikho. 23 Pade randua toIsrael pangane notua dako ri buluna bo nombavote binangga Yordan, nanjili hau nte i Yosua. Pura-pura kajadia anu najadi nte ira nitesara ka i Yosua. 24 Bo niulikaramo i Yosua, “Natantumo TUPU mombadekei ngata haitu ka kita; apa pura-pura tona ri ngata haitu naeka nte kita.”