ToIsrael nombavote binangga Yordan.
3
Kamaile mpandondona i Yosua ante pura-pura toIsrael nasalisa mpuu nembangu bo mompalaisi potendara ri Sitim hau ri binangga Yordan. Ri sia ira notenda mompopea tempona hau mevote. 2 Naliupa katalu eona, topompasiayu todea nompesayo pura-pura potendara, 3 bo nombadekei parenta ka pura-pura todea Israel haitu bo nanguli, “Ane rapeintamiu Peti Pojanji nTUPU Alatala raanggataka ntopanggeni pesomba, hau munimo komiu mantuntuni ira. 4 Tapi nemo molipa mapara gaga ante peti haitu. Tuntuni dako ri purina sangu kilo kakavaona. Ala rasanimiu dala ratuntunimiu, apa komiu dopa naria nangose dala haitu.”5 I Yosua notesa ka toIsrael, “Pakagasamo pekiri bo karomiua apa maile TUPU movia kabaraka ri ngayomiu.” 6 Pade i Yosua nomparenta ka topanggeni pesomba ala manganggataka Peti Pojanji haitu rakova molipa ri kolu ntoIsrael. Bo nioseakaramo parenta i Yosua.
7 Naliu haitu TUPU Alatala notesa ka i Yosua, “Mompamula eo hitu Kupakambaso sangamu ri ngayo ntodea Israel, ala rasanira Yaku momporoa iko, nasimbayu eva Yaku nomporoa i Musa. 8 Hitupa ulikamo ka topanggeni pesomba anu nombakova Peti Pojanji haitu, ane makava ri binangga Yordan, ira manau rabinangga bo meangga mapara ri tinggina.”
9 Pade notesamo i Yosua ka todea Israel, “Kamai mapara ri sii bo epemo parenta nTUPU Alatala ka komiu. 10-11 Ane komiu mesua ri tana Kanaan ngena, natantumo TUPU mompopalai toKanaan, toHet, toHewi, toFeris, toGirgasi, toAmori, bo toYebus dako ri ngayomiu. Bo tempo Peti Pojanji nTUPU Alatala anu nambaso kakuasana rakeni molipa ri kolumiu mevote binangga Yordan, pade rasanimiumo Alatala anu natuvu sampe ri kasae-saena mpuu-mpuu nomporoa komiu. 12 Hitupa pelisimo sapulu randua tona dako ri valaa-valaa toIsrael, saito dako ri sangu valaa. 13 Ane topanggeni pesomba anu nokova Peti Pojanji nTUPU molemparaka kadara hau riara binangga Yordan, uve binangga haitu mogaa, uve noili dako ri uluna metaa moili bo majadi eva uve nivusu.”
14-15 Tempo haitu, tempo posoreaka asele ntalua. Jadi eva biasana, uve binangga Yordan nesepe.
Tempo toIsrael nalai dako ri potendara hau mombavote binangga Yordan, topanggeni pesomba nolipa nokolu nanggeni Peti Pojanji. Tempo topanggeni pesomba nombalemparaka kadara rabinangga, 16-17 tempo haitu muni uve binangga nogaa. Nakavao hau ri uluna, uve haitu nasiromu napara ngata Adam, sangu ngata anu napara ri Sartan. Domo ria sakidea uve noili hau ri layana hau ri Tasi Mate. Bo toIsrael namala nevote nolipa ri tana bai ri toto ngata Yerikho. Topanggeni pesomba anu nokova Peti Pojanji haitu bate-batena neangga ri tatanga binangga ri tana nabai sampe pura-pura toIsrael nakava ri sambotena.