Sapulu randua vatu pepatora nipopeangga
4
Naupupa todea Israel haitu nombavote binangga Yordan, notesamo TUPU ka i Yosua, 2 “Pelisimo sapulu randua tona, saito-saito dako ri sangu valaa, 3 bo ulikamo ira moanggataka sapulu randua vatu dako ri tatanga binangga Yordan, ri peangga ntopanggeni pesomba. Tudumo ira mosimbuaka vatu-vatu haitu sampe makava ri potendata ngena bongi.”4 Pade i Yosua nombaronde tona sapulu randua anu nipelisi dako ri sapulu randua valaa toIsrael. 5 Notesamo i Yosua ka ira, “Pevotemo ri ngayo ntopanggeni Peti Pojanji nTUPU Alatala, bo simbuakamo mbo sangu vatu, mantuntuni dea nu valaa ntoIsrael. 6 Vatu-vatu haitu majadi tanda ka komiu. Ane ana-anata mompekutana batua vatu haitu, 7 ulikamo ka ira, ‘Tempo Peti Pojanji nTUPU nikova nevote binangga, nogaamo uve binangga Yordan. Vatu-vatu haitu najadi tanda pepatora ka toIsrael nuapa najadi rahitu.’ ”
8 Kasapulu randua tona haitu nangoseaka parenta i Yosua. Ira nangala sapulu randua vatu dako ri tatanga binangga Yordan, deana eva anu niparenta nTUPU ka i Yosua, nantutuni dea valaa ntoIsrael, pade nikenira hau ri potendara. 9 Ri tatanga binangga Yordan haitu muni, i Yosua nombasunju vai sapulu randua vatu ri bela peangga ntopanggeni pesomba, anu nombakova Peti Pojanji nTUPU. Vatu-vatu haitu da nariapa tempo potulisi buku hitu.
10 Topanggeni pesomba batena neangga ri tatanga binangga Yordan, sampe naupu pura tona novia anu niuli i Yosua ka ira eva niparenta nTUPU ka ia. Haitu nasimbayu nte petevai i Musa ka i Yosua. Bo nasalisamo toIsrael nombavote binangga Yordan. 11 Nakavapa pura ira ri sambotena, topanggeni pesomba anu nombakova Peti Pojanji nTUPU haitu, nevote muni, bo pura-pura tona nanggita ira nevote. 12 Tantara dako ri valaa i Ruben, valaa i Gad, santanga dako ri valaa i Manasye, nolipa ri kolura nombavote binangga Yordan, nasimbayu mpo anu niparenta i Musa ka ira. 13 Nitasere patapulu njobu (40.000) kadeana langgai dako ri valaa-valaa haitu nanggeni pareva mposieva, anu masadia mosieva nevote hau ri tana lobuna napara ngata Yerikho. Bo TUPU nompeinta ira nevote.
14 Tempo haitu TUPU nompakambaso sanga i Yosua ri ngayo pura-pura toIsrael, sampe ira nombabila bo nangoseaka i Yosua, eva ira muni nombabila bo nangoseaka nabi Musa sampe ri kaupu nggatuvuna.
15 Nangulimo TUPU ka i Yosua, ivei: 16 “Parentamo ka topanggeni pesomba anu nombakova Peti Pojanji nu Alatala haitu, ala ira mesoremo dako ri binangga Yordan.” 17 I Yosua nombaoseaka parenta nTUPU bo nangulika topanggeni pesomba: “Pesoremo dako rabinangga Yordan.” 18 Tempo topanggeni pesomba anu nombakova Peti Pojanji haitu nesore dako rabinangga Yordan, uve binangga haitu noili mpanjili nesepe eva batena.
19 Todea Israel nakava ri sambote binangga Yordan, tanggala sapulu bula sangu bo ira notenda ri Gilgal, ri sabingga mpandake ngata Yerikho. 20 Ri sia i Yosua nombasunju sapulu randua vatu anu nialara dako rabinangga Yordan. 21 Pade nangulimo i Yosua ka todea Israel, “Ane ri eo nggapurina ana-anata mompekutana, ‘Nuapa batuana vatu nisunju hitu?’ 22 Ulimo ka ira ivei: ‘Vatu-vatu hitu nompopatora, tempo kita toIsrael nombavote binangga Yordan nolipa ri bavo ntana nabai.’ 23 Tesamo ka ira: ‘TUPU Alatala nompakabai uve binangga Yordan hitu ka kita, sampe kita nakava ri sambotena. Nasimbayu eva anu nipovia nTUPU tempo nggaulu nompakabai Tasi Siroyo ka kita. 24 TUPU novia ivehaitu ala pura-pura tona ri dunia mangisani nambaso mpuu kuasaNa. Bo ala komiu mombabila Alatala sampe ri kasae-saena.’ ”