Posuna ri Gilgal
5
Pura-pura magau ntoAmori ri sabingga mpanau binangga Yordan, bo pura-pura magau ntoKanaan anu nonturo ri talinti Tasi Tatanga nangepe binangga Yordan nibaisi nTUPU, tempo todea Israel nombavotena. Naekamo ira bo domo nabia ira mantingayo toIsrael.2 Tempo haitu TUPU notesa ka i Yosua, “Poviamo ladi dako ri vatu bo povia vai ada posuna ka toIsrael.” 3 Nipakadupa i Yosuamo parenta nTUPU bo ia nombasuna todea Israel ri Bulu Posuna. 4-6 Apa tempo toIsrael nesuvu dako ri Mesir pura-pura langgai nisunamo. Tapi pura-pura ngana langgai anu nipoanaka ri polipara ri karava bai dako ri Mesir dopa nisuna. Haitu sabana i Yosua nitudu nombasuna ira. ToIsrael nolipa ri karava bai patapulu mpae kasaena bo riara polipara haitu pura-pura langgai anu naganamo umuruna nesua tantara namate puramo, sabana ira ledo nangoseaka parenta nTUPU. Jadi nangoseaka janji nTUPU, ira ledo nidekei mangganoto ngata anu nabelo bo naboya haitu anu nijanjiNa ka totuara nggaulu. 7 Jadi ana-anara anu nipoanaka riara mpolipara ri karava bai, ira haitumo nidekei nTUPU mesua ri tana Kanaan nanjambei totuara, bo ira haitumo nisuna i Yosua ri Gilgal, sabana ira dopa nisuna riara mpolipara ri karava bai.
8 Naupupa pura-pura tona ri ngata haitu nisuna, naroomo ira ri potendara haitu sampe natoro bakara nisuna. 9 Tempo haitu notesamo TUPU ka i Yosua, “Eo hitu Kukabasakamo kaeya matamiu najadi batua ntoMesir.” Haitumo sabana ri potenda haitu nipoposangaka Gilgala sampe eo hitu.
10 Ri potendara ri Gilgal, ri lobuna napara ngata Yerikho, todea Israel novia posusa Paskah ka nggoviana tanggala sapulu ampa bula haitu. 11 Kamailena naliu posusa paskah, haitumo pamulana ira nangande asele tana Kanaan, haitumo roti ledo noragi bo gando nitunu. 12 Eo haitu muni mannab domo nanavu dako ri langi, toIsrael netaamo nangande manna, tempo haitu ira nangande asele tana Kanaan.
I Yosua nosintomu nte Tadulako Tantara nTUPU
13 Tempo i Yosua napara ngata Yerikho, sampesanika nipeintana saito langgai neangga ri ngayona nantipale guma. I Yosua nanggaparai tona haitu, bo nekutana, “Komiu roa bara bali?” 14 Nesana tona haitu, “Yaku ledo roa ledo muni bali, tapi yaku Tadulako Tantara nTUPU anu nakava.”
Nangepe potesa ntona haitu nantaputumo i Yosua nombasomba tona haitu bo nanguli, “Yaku hii batua i Pua, nuapa masipato kupovia ka i Pua?”
15 Nesana Tadulako Tantara nTUPU haitu, “Vonju solomu, tana nipeanggamu tutu tana nagasa sabana naria TUPU.” Pade nivonju i Yosuamo solona.