Kagero ngata Yerikho
6
Tempo haitu toYerikho nombatutui pakarapa vamba bobaa pesua rangatara bo nijagaira pakabelo, ala toIsrael ledo mamala mesua. Apa ira ledo nombadekei tona mesua suvu ri ngata haitu.2 TUPU notesa ka i Yosua, “Hitupa Kudekei ka ikomo ngata Yerikho bo magauna, bo pura-pura tadulako-tadulakona anu nabia. 3 Iko ante pura-pura tantaramu mombalintiku ngata haitu sanggani saeo, kasaena aono-eo. 4 Papitu topanggeni pesomba simbo manggeni tabue dako ri tandu bimba, kana molipa ri kolu Peti Pojanji. Eo kapapituna iko ante tantaramu kana mombalintiku ngata haitu pitu nggani, bo muni topanggeni pesomba mantavusi njuu tabuena mombalintiku ngata haitu. 5 Ri eo kapapituna topanggeni-topanggeni pesomba kana motavusi tabuena ante oni mandoe. Tempo komiu mangepe oni tabue mandoe haitu, pura-pura todea Israel mongare pakamangga bo tembo ngata haitu maombosaka. Tempo haitumo komiu mamala mombasuaki ngata haitu.”
6 Pade i Yosua nombaronde topanggeni-topanggeni pesomba bo nangulika ira, “Kovamo Peti Pojanji nTUPU, bo papitu komiu ntanina manggeni tabue tandu bimba, molipa ri kolu topanggeni Peti Pojanji haitu.” 7 I Yosua nangulika tantara-tantarana, “Polipamo mombalintiku ngata haitu, sabagia dako nte komiu anu manggeni pareva mposieva kana molipa ri kolu Peti Pojanji nTUPU.”
8-9 Nangoseaka parenta i Yosua, nompamulamo nolipa tona nanggeni pareva mposieva ri kolu papitu topanggeni pesomba anu nantavusi tabue dako ri tandu bimba. Ri puri topanggeni pesomba anu nantavusi tabue haitu, nolipa topanggeni pesomba anu nombakova Peti pojanji nTUPU. Ri purira naria vai baresi tantara kaupuna. Tempo ira pura-pura nolipa, tabue nitavusi njuu. 10 I Yosua nomparenta ka pura-pura tantara, nemo mongare bo motesa sambelaa dopame ia modekei tanda. 11 Vesiamo i Yosua nombatudu manggeni Peti Pojanji mombalintiku ngata haitu sanggani, pade ira nanjili hau ri potenda bo naturu ri sia.
12-13 Kamailena, da sanggaeo mpisina i Yosua nembangu, bo karongganikana ira nobaresi nombalintiku ngata haitu, eva sunju pobaresira ri eo pamulana. Baresi ntona nanggeni pareva mposieva nolipa ri koluna, naupu haitu nituntuni papitu topanggeni pesomba nantavusi tabue, pade nituntuni topanggeni pesomba nokova Peti Pojanji bo kaupuna baresi pojaga. Bo tabue haitu nitavusi njuu. 14 Tempo eo karoeona, ira nombalintiku ngata haitu aga sanggani pade nanjili hau ri potenda. Ivehaitumo nipoviara sampe aono-eo kasaena.
15 Ri eo kapapituna dako nebonda eo ira nembangumo, pade nolipa pitu nggani nombalintiku ngata Yerikho nasimbayu eva sunju pobaresira ri eo-eo naliu. Aga ri eo kapapituna ira nombalintiku ngata haitu pitu nggani. 16 Kapitu ngganina ira nombalintiku ngata haitu, topanggeni-topanggeni pesomba nasadiamo nantavusi tabue ante oni nandoe bo i Yosua nombadekei tanda ka pura-pura tantara mposieva mongare. Nangulimo i Yosua, “Nidekei nTUPU ka kitamo ngata hitu! 17 Pura-pura ngata ante anu naria riarana kana raropusi pura rapajadi pesomba ka TUPU. Aga i Rahab bo pura-pura tona naria riara banuana nemo rapatesi, apa ia nombatulungi tona nituduta nompomata-mata ngata hitu. 18 Tapi komiu nitagi mangala mbara-mbara anu niparenta ka komiu ragerosi. Ane komiu mangalana, pura-pura kita toIsrael manggava silaka mbaso dako nte TUPU. 19 Pura-pura bulava, salaka, gala,a bo ase kana rapasantani ka TUPU bo raboli riara pomboli mbara-mbara ka TUPU.”
20 Pade topanggeni pesomba nombatavusi tabue. Nangepe moni ntabue haitu, tantara Israel nongare-ngare namangga, pade tembo ngata Yerikho naombo. Pura-pura tantara Israel kapola-pola nesua riara ngata haitu bo nombagerosina. 21 Pura-pura tona nau totua, ngana, langgai, bo mombine, nipatesira ante guma. Bo pura-pura binata nipatuvura, evamo japi, bimba bo keledai nipatesi muni.
22 I Yosua nangulika randua tona anu nompomata-mata ngata Yerikho haitu ivei, “Koimo hau ri banua i Rahabb haitu bo kenimo ia mesuvu bo pura-pura tona anu naria riara banuana eva anu nijanjimiu ka ia.” 23 Jadi nesuamo tona randua haitu hau ri banua i Rahab bo nanggeni ira nesuvu, tuamana, tinana bo sampesuvu-sampesuvuna anu nosanggani ante ia. Naupu haitu nituduakaramo ponturo ka i Rahab ntali sampesuvu anu napara ri potenda ntoIsrael. 24 Pade tantara toIsrael nombatunju pakaupu ngata haitu ante pura-pura anu naria riarana, aga bulava, salaka, gala, bo ase ledo nitunjura. Mbara-mbara haitu nialara bo nibolira ri pomboli mbara-mbara riara banua nTUPU. 25 I Rahab ante pura-pura sampesuvuna ledo nipatesi i Yosua, tapi nipalambana natuvu nosinggani-nggani nte ira. Apa ia nombatulungi tona anu nompomata-mata ngata Yerikho anu nitudu i Yosua. Tempo buku hitu nitulisi i Rahab da naroo njuu ri tatanga ntoIsrael.
26 Tempo haitu i Yosua nosumpa ivei,
“Isema-sema mompasimbuku mompopeangga mpanjili ngata Yerikho hitu,
kana mambela pepindasi.
Isema movia pandasina
kana mamate ana lumbuana.
Bo isema mompataka vamba bobaana
kana mamate anana kaupu.”
27 TUPU nomporoa i Yosua bo sanga i Yosua natolele ri njumangu tana Kanaan.