I Akhan novia dosa
7
TUPU nomparenta ka toIsrael, ala mbara-mbara dako ri ngata Yerikho raropusi, nemo ntoto maria sangua raala. Tapi naria ira ledo nangoseaka parenta haitu. Saito langgai anu nosanga i Akhan nombalumpaiki parenta haitu, jadi narau mpuu rara nTUPU nte todea Israel. Tuama i Akhan, nosanga i Karmi bo tupuna nosanga i Zabdi, muli i Zerah dako ri valaa i Yehuda.2 Tempo haitu i Yosua nombasuro bara sakondua toIsrael dako ri ngata Yerikho hau ri ngata Ai, sangu ngata ri sabingga mpandake Betel, napara Bet-Awen. Tona gahaitu niparenta hau mombakumisi bagia ngata haitu. Naupupa ira nombakumisi ngata haitu, 3 nanjilimo ira bo nanguli ka i Yosua, “Ledo paraluu pura-pura kita hau mombasuu ngata Ai. Tudumo ronjobu bara talu njobu tona mombasuu ngata haitu. Nemo ratudu pura tantara hau mosieva, sabana ngata haitu aga ngata nakodi.” 4 Jadi haumo tantara nombasuu ngata haitu, nitasere talu njobu (3.000) kadeana. Tapi ira nidagi ntodea ngata Ai. 5 ToAi nombaraga ira dako ri vamba bobaa ngata Ai sampe ri bagia Syebarim. Nitasere talu pulu bo aono deana toIsrael nipatesi toAi ri kente nu bulu. Jadi naeka bo nakinimo rara ntoIsrael.
6 I Yosua bo pakeni-pakeni ntodea Israel nabuku ntoto rarara, ira nombabite-bitesi bajura, bo njumaeo sampe nabongi ira nantaputu notungga lenjera sampe natudu ri tana ri ngayo Peti Pojanji nTUPU, bo nombadika avu ri balenggara tanda nggabuku rara. 7 Nangulimo i Yosua ka TUPU, “O PUE Alatala nisombaku! Nakuya nikeniMiu kami ri sambote binangga Yordan hitu? Ala kami radekei ka toAmori rapatesira? Mabelopa kami monturo hamai, ri sambote binangga Yordan! 8 O Pue! Hitupa nuapa masipato kuuli? Kami toIsrael nidagi nu bali kamimo. 9 Ane toKanaan bo pura-pura tona ntanina ri bagia ngata hitu mangepe kareba najadi nte kami, rapatikura bo rapatesira pura kami. Ane ivesia nuapa rapoviaMiu ala sangaMiu batena ratoiya?”
10 Nangulimo TUPU ka i Yosua, “Pembangu! Ledo ria gunana iko nantaputu ivetutu ri tana! 11 ToIsrael novia dosamo. Yaku nomparenta ala ira mombaturusi pojanjira ante Yaku, tapi ira nombalumpaikina! Mbara-mbara anu masipato raropusi aga nialasira. Nipanganggara bo nitabuniakara nte mbara-mbarara ala domo rasani. 12 Haitumo sabana ira ledo nompakule nantingayo balira. Ira nidagi nu baliramo apa ira masipato mambela pehuku bo raropusi. Ane mbara-mbara anu ledo masipato majadi bagiamiu tutu dopa raropusi, Yaku domo mombatulungi komiu. 13 Hitupa pembangumo, Yosua! Tudumo toIsrael mompakagasa karora mantingayo Yaku. Parenta ira masadia-dia maile, apa Yaku TUPU Alatala ntoIsrael manguli ka ira ivei, ‘Hee toIsrael! Mbara-mbara anu niparentaKu ka komiu raropusi, sabagia nialamiu. Ane ledo ratedeakamiu mbara-mbara haitu, komiu ledo mompakule mangeva bali!’ 14 Ulikamo ka ira, maile mpadondo ira raparesa savalaa-savalaa. Ane Kutuduaka sangu valaa, pura-pura muli nu muli sangu valaa haitu hau ri ngayona. Ane Kutuduaka sangu muli, pura-pura posampesuvu riara muli haitu hau ri ngayona. Ane Kutuduaka sangu posampesuvu nokoyo puse haitu, saito-saito ira hau ri ngayona. 15 Ane tona nituduaka pangane rakava momboli mbara-mbara anu nitagi haitu, ira sambanua rapatesi. Mboara, binata-binatara bo mbara-mbarara rapalabusi. Apa iamo nombalumpaiki pojanji, bo nadaa mpuu panggaviana ri tatanga ntodea Israel.”
16 Kamailena, da sanggaeo mpisina, i Yosua nantudu todea Israel hau namaju ri ngayona, valaa mbo valaa. Bo valaa i Yehuda anu nambela. 17 Pade nitudu i Yosua valaa i Yehuda namaju hau ri ngayona, bo muli i Zerah nambela. Bo hau puramo muli-muli i Zerah hau ri ngayona, bo muli i Zabdi ntali sampesuvu nambela. 18 Naupu haitu i Yosua nantudu i Zabdi ntali sampesuvu hau namaju ri ngayona saito-saito, bo nikavamo i Akhan nambela. I Akhan haitu ana i Karmi tupu i Zabdi, muli i Zerah dako ri valaa i Yehuda. 19 Nangulimo i Yosua ka i Akhan, “Anaku, ulimo bo pangakumo ri sii ri ngayo nTUPU Alatala nisomba ntoIsrael, nuapa anu nipoviamu. Ulimo ka yaku, nemo mutabuniaka.”
20 Nangulimo i Akhan, “Nakana, yaku novia dosamo ri ngayo nTUPU Alatala nisomba ntoIsrael, iveimo anu nipoviaku: 21 Yaku nompeinta mbara-mbara anu niagota, naria baju ndoe nagaya povia ntoSinear, salaka nitasere randua kilo ntamona, bo bulava sanggoto ntamona santanga kilo. Nipokonoku mpuu mbara-mbara gahaitu, nialaku bo nitabuniakaku. Nitanaku ri tambe tendaku bo salaka nidikaku ri tambena ntoto.”
22 Pade i Yosua nantudu tona nasalisa hau ri potenda i Akhan. Nakana mpuu, mbara-mbara anu nitagi haitu pura-pura nitabuniakana ri tambe ntana, salaka nibolina ri tambena ntoto. 23 Tona nitudu i Yosua pangane nangala mbara-mbara haitu bo nikenira ka i Yosua bo pura-pura toIsrael. Pade mbara-mbara haitu nidika ri ngayo nTUPU. 24 Naupu haitu i Yosua nte todea Israel nombasaka i Akhan, bo nikenira hau ri Lemba Akor nte pura-pura anana, japina, keledaina, bimbana, tendana bo pura-pura anu naria nte ia, bo muni salaka, baju ndoe bo bulava anu nipanganggana. 25 Pade nangulimo i Yosua ka i Akhan, “Nakuya iko nokainggu anu nompakasusa kita? Hitupa TUPU mompambela kasusa ka iko!” Naupu haitu pura-pura toIsrael nombarempe i Akhan sambanua nte vatu sampe namate. Mboara, pura-pura mbara-mbarana bo mbara-mbara anu nipanganggana, nipalabusi pakaupu. 26 Naupu sia ira nombatambunaka vatu dea ri kamate i Akhan sambanua haitu. Naliu haitu domo narau rara nTUPU. Vatu-vatu anu nitambunakara ri kamate i Akhan sambanua da nariapa tempo potulisi buku hitu. Haitumo sabana ri pompatesi i Akhan sambanua haitu nipoposanga Lemba Akhor, batuana lemba kasusa.