Ngata Ai nigerosi
8
Nangulimo TUPU ka i Yosua, “Pasiromu puramo tantara-tantaramu bo koi suumo ngata Ai. Nemo maeka bo makini rara! Apa Yaku mombadekei padagi ka komiu mangeva magau ngata Ai. Todeana radagimiu bo ngatana Kudekei ka komiu. 2 Ngata Ai bo magauna kana mupovia masimbayu nte anu nipoviamu ka ngata Yerikho bo magauna. Tapi hitupa mbara-mbarara bo binatara mamala raalamiu majadi bagiamiu. Suu nggalinomo ngata haitu dako ri bengona.”3 Pade nasadiamo i Yosua hau ri ngata Ai nosinggani-nggani ante tantarana. Nipelisina talupulu njobu (30.000) tantara tobelona, ira nitudu hau mokolu molipa bongina. 4 Dopame ira neanggataka, i Yosua nanguli parenta ka tantarana, “Petabunimo ri bengo ngata haitu komiu, tapi nee makavao gaga, bo komiu masadia-dia mesuu. 5 Yaku ante tantara ntanina anu naboli nte yaku, manggaparai ngata Ai ri koluna. Ane toAi mesuvu mombaeva kami, kami mangova malai eva baipia. 6 Kami mombaopa ira, ala ira makavao dako ri ngata haitu. Apa ira manjarumaka kami mangova malai eva baipia. 7 Tempo haitumo komiu mesuvu dako ri petabunimiu, mombasuu bo mombagero ngata haitu. TUPU Alatala mombadekei ngata haitu ka kita. 8 Maupu ngata haitu radekei ka komiu, tunjusimo ngata haitu, nangoseaka parenta nTUPU. Haitumo rapoviamiu.” 9 Naupu haitu nitudu i Yosuamo ira hau, bo nakava hamai netabunimo ira ri sabingga mpanauna, ri olo ngata Ai ante ngata Betel bo nepopea ri sia. Tapi i Yosua naturu ri potenda ntoIsrael.
10 Mpadondo mpisina ntoto i Yosua nembangu bo nomparenta tantara ntanina anu da naboli masiromu. Pade ia bo pakeni todea Israel nanggeni tantara gahaitu hau ri ngata Ai. 11 Tantara gahaitu nosanggani-nggani nte i Yosua hau ri ngata Ai nolipa nanggaparai vamba bobaa ngata haitu. Ira notenda ri sabingga tasina, ri sia naria lembana nombaoloki potendara ante ngata Ai. 12 Nitasere lima njobu (5.000) deana tantara nituduna netabuni ri sabingga mpanau, ri olo ngata Ai bo ngata Betel. 13 Jadi sunju ponturo tantara haitu nipasiayu pura. Tantara deana nidika ri sabingga tasina bo tantara-tantara ntanina ri sabingga mpanau ngata haitu. Bongi haitu i Yosua nolipa ri lembana ri sabingga tasina ngata Ai.
14 Mpadondona ntoto, tempo magau ngata Ai nangganoto tantara i Yosua, nasalisamo ia nangulika todeana. Ia bo pura-pura tantarana nesuvu hau ri lembana haitu mombasuu toIsrael ri belana baipia. Ledo nisanina ia rasuu ntoIsrael dako ri bengona. 15 I Yosua bo tantarana eva tona naeka noura raraga nu balira, ira nangova hau ri karava bai. 16 Pura-pura langgai anu namalamo mosieva ri ngata Ai, niulika mombaraga i Yosua bo tantarana. Ira anu nombaraga i Yosua bo pura-pura tantarana, nateopa nakavaomo dako ri ngatara. 17 Ngatara nipalambakaramo natebuka sampe domo naria tona anu namalamo mosieva nojagai ngatara. Apa pura-pura tona anu namalamo nosieva ri ngata haitu nesuvu nombaraga toIsrael.
18 Pade nangulimo TUPU ka i Yosua, “Anggatakamo tokomu bo duduaka hau ri toto ngata Ai, ngata haitu Kudekei ka komiumo.” 19 Nianggataka i Yosuapa toko ri palena, tantarana anu netabuni nasalisa nesuvu, nombasuu, nombadagi bo nombatunjusi ngata haitu. 20-22 Tempo toAi neili, nikanotora naria unu nu apu neore hau ri langi. Unu nu apu haitu nikanoto i Yosua bo tantarana muni. Nisaniramo ngata Ai nidekei nTUPUmo ka tantarana anu netabuni ri bengo ngata haitu. Jadi negolimo Yosua bo tantarana nombasuu bo nombapatesi toAi. Tantara toIsrael ri ngata Ai haitu muni nakava nesuu, sampe toAi ledo namala nalai mompakasalama karora mboto. Ledo ria saitoa toAi namala nalai, ira namate pura nipatesi ntoIsrael. 23 Tapi aga magau ngata Ai ledo nipatesira, ia nisaka bo nikeni hau nte i Yosua.
24 Naupupa tantara toIsrael nompatesi pura balira anu nombaraga ira ri karava bai pangane, nanjili vai ira hau ri ngata Ai bo nompatesi pura-pura tona hamai. 25-26 I Yosua njuu-njuu nanganggataka tokona nombatuduaka hau ri ngata Ai, bo ledo nipopanauna sampe tona ri ngata Ai namate pura nipatesi. Eo haitu muni mombine bo langgai sapulu ronjobu (12.000) deana namate. 27 Binata bo mbara-mbara anu niagora ri ngata haitu, niala ntoIsrael najadi bagiara, nangoseaka panguli nTUPU ka i Yosua. 28 I Yosua nombatunju ngata Ai, bo nipalambakanamo najadi santambu rupuna, da nariapa rupu nu ngata haitu tempo buku hitu nitulisi. 29 Magau ngata haitu niloena ri tinja poloe sampe namate, bo nipalambakana ri sia sampe nanggovia. Tempo eo masolomo, i Yosua nantudu tona nangala mboa haitu bo nitedeakara ri ngayo vamba bobaa ngata. Ri potedeakara mboa haitu nitambunakara vatu dea. Vatu haitu da nariapa tempo potulisi buku hitu.
Parenta-parenta nTUPU nibaca ri bulu Ebal
30 Naliu haitu ri Bulu Ebal i Yosua nosunju vatu novia sangu lanta pesomba ka TUPU Alatala nisomba ntoIsrael. 31 Lanta pesomba haitu nipoviana nangoseaka parenta-parenta ka toIsrael anu nitulisi riara buku i Musa batua nTUPU, ivei, “Sangu lanta pesomba rapovia dako ri vatu anu dopa naria nikarajaa nompake pareva pande nu ase.” Ri bavo lanta pesomba haitu toIsrael mombadekei pesomba ka TUPU, haitumo pesomba rapalabua bo pesomba posinggabelora.b 32 Ri vatu lanta pesomba haitu, i Yosua notulisi parenta-parenta nTUPU anu naria riara Buku Atura nitulisi i Musa, nisabiki ntoIsrael. 33 ToIsrael, topesovo, pakeni-pakeni, topobalenggai tantara bo topotangara neangga pura ri sabingga Peti Pojanji nTUPU nantingayo topanggeni pesomba muli i Lewi anu nombakova Peti Pojanji nTUPU. Sabagia toIsrael gahaitu notingayo hau ri Bulu Gerizim, bo sabagiapa notingayo hau ri Bulu Ebal. I Musa batua nTUPU nomparenta ka ira baipia, anu haitu kana rapoviara ane makava ira ri sambote binangga Yordan ala TUPU mombadekei rasi ka toIsrael.c 34 Naupu haitu i Yosua nombabaca pakamangga pura-pura parenta nitulisi riara Buku Atura nitulisi i Musa, haitumo rasi bo pepindasi. 35 Parenta i Musa nibaca i Yosua ka pura-pura toIsrael anu nasiromu ri sia, ka mombine, langgai, ngana-ngana bo topesovo. Ledo naria sangua parenta i Musa ledo nibaca i Yosua.