ToGibeon nombabagiu i Yosua
9
Kareba-kareba toIsrael padagi natolele niepe magau-magau ri sabingga mpanau binangga Yordan ri bagia buluna, ri bagia kente nu bulu, bo ri bagia talinti nTasi Tatanga sampe ri bulu Libanon ri sabingga tasina, haitumo, magau toHet, toAmori, toKanaan, toFeris, toHewi bo magau toYebus. 2 Magau gahaitu nasintuvu hau mombasuu i Yosua bo toIsrael.3 Tapi toHewi dako ri ngata Gibeon nieperamo i Yosua nombadagi ngata Yerikho bo ngata Ai. 4 Pade ira nangelo dala mombabagiu i Yosua. Karu ntua bo pomboli anggur nabitemo anu nipovia dako ri kuli niulayara ri keledaira. Bo baku nikenira, nipasadiara aga roti ngau nakavungoromo. 5 Ira nompake pakea nabitemo ante sapatu naranta. 6 Ivehaitumo nipoviara hau mosintomuka i Yosua ri potenda ntoIsrael ri Gilgal. Nakavapa hamai nangulimo ira ka i Yosua bo ka toIsrael, “Kami hii nakava dako ri ngata nakavao, madota movia pojanji ante i pua bo toIsrael.”
7 Tapi nanguli toIsrael, “Mokuya kami movia pojanji nte komiu? Nee-nee bara aga napara ri sii ponturomiu!”
8 Nesana ira, “Madota pura kami movia bara nuapa raparenta i pua ka kami.”
Nekutana i Yosua nte ira, “Isema tano komiu? Bo dako ri ngata mbana komiu?”
9 Nesanamo ira, “Kami dako ri ngata nakavao ntoto, pua, sabana niepe kamimo povia nTUPU Alatala anu nisomba i pua bo toIsrael. Niepe kami puramo, anu nipoviaNa ri Mesir, 10 bo anu nipoviaNa nte randua magau ntoAmori ri sabingga mpandake binangga Yordan, iamo i Sihon magau ngata Hesybon nte i Og magau ngata Basan anu nonturo ri ngata Asytarot. 11 Pakeni bo pura-pura todea nu ngata kami nantudu kami mompasadia baku manggalivo tumai, mosintomu nte i pua. Sabana haitu, kami merapi kabelo rara i pua ala movia pojanji nte kami. 12 Peinta vei pua, roti nipobaku kami. Tempo kami nanggalivo, roti hitu da napane. Tapi hitupa, nangau bo nakavungoromo. 13 Bo pomboli anggur hitu da nabaru tempo kami nangisina, tapi hitupa, nabite-bitemo. Pakea bo sapatu kami nabite muni sabana nangose dala nggavao.”
14 ToIsrael nangala sakide baku ntoGibeon haitu, [bo nikandera tanda nitarimara perapi ntoGibeon haitu] tapi ledo nipekutanara ntani nte TUPU. 15 Naupu haitu i Yosua novia pojanji posinggabelo ante toGibeon haitu bo nojanji ledo mompatesi ira. Pakeni-pakeni ntoIsrael muni nosumpa mangoseaka pojanji haitu.
16 Tapi talu eo kaliuna pojanji haitu nipovia, toIsrael nangepe kareba toGibeon gahaitu nonturo ledo nakavao dako ri Gilgal, ngatara aga ri tatanga tana Kanaan. 17 Pade neanggatakamo toIsrael dako ri Gilgal. Ri eo katataluna nakava ira ri ngata ntona gahaitu, haitumo ri ngata Gibeon, Kefira, Beerot bo Kiryat-Yearim. 18 Tapi toIsrael ledo mamala mompatesi toGibeon, sabana pakeni-pakeni ntoIsrael nosumpamo nte ira ante sanga nTUPU Alatala nisomba ntoIsrael. Pura-pura toIsrael nantangau ka pakenira nantora janjira haitu. 19 Tapi nangulimo pakeni gahaitu, “Nuapapa rapoviata? Nojanjimo kami nte ira bo nosumpa ante sanga nTUPU Alatala nisombata. Hitupa kita domo mamala mosinjala nte ira. 20 Kita domo mamala mompatesi ira sabana kita nojanjimo, bo ane kita mombalumpaiki janji haitu Alatala mombahuku kita. Jadi hitumo anu rapoviata ka ira: 21 Domo rapatesita ira, tapi ira rapajadita topombeso kayu bo topanambu uve ka kita.” Ivesiamo nipakatantu pakeni gahaitu.
22 Pade toGibeon gahaitu nironde mantingayo i Yosua. Nanguli i Yosua, “Nakuya komiu nombabagiu kami? Niulimiu ngatamiu nakavao, tano aga napara ri sii. 23 Alatala mombapindasi komiu sabana komu novia ivesia. Todeamiu kana majadi batua. Komiu majadi topombeso kayu bo topanambu uve rapake ri Banua Alatala nisomba kami.”
24 Nesana ira, “Kami novia ivesia apa niepe kamimo TUPU Alatala anu nisomba i pua, nantudu batuaNa i Musa mombadekei ka i pua njumangu ngata hitu bo mompatesi pura-pura todeana. Jadi naeka mpuu kami nee-nee kami rapatesi. Haitu sabana kami novia ivehaitu. 25 Hitupa kami riara mparenta i pua. Poviamo ka kami bara nuapa mabelo rapekiri i pua.” 26 Bo hitumo anu nipovia i Yosua: ia nombasaliku tona gahaitu bo ledo nidekeina toIsrael mompatesi ira. 27 ToGibeon nipajadina batua, ira najadi topombeso kayu bo topanambu uve ka toIsrael rapake ri lanta pesomba ka TUPU. Sampe buku hitu nitulisi ira da nokarajaa ri pombasomba TUPU ri umbapa pompelisi nTUPU.