I Yosua nombadagi magau-magau ri tana Kanaan sabingga puluna
10
I Adoni-Zedek, magau Yerusalem nangepe i Yosua nombadagi bo nombagerosi ngata Ai, bo nombapatesi magau ngata haitu, nasimbayu eva nipoviana tempo ia nombagerosi ngata Yerikho bo nompatesi magauna. Niepena muni toGibeon novia pojanji posinggabelo ante toIsrael bo ira nonturo singgani. 2 Niepepa ntoponturo ri Yerusalem anu haitu naeka mpuu ira, sabana Gibeon ngata nambaso, nasimbayu mbasona ante ngata-ngata nomagau, bara nambasopa pade ngata Ai. Todeana muni tona natau nosieva. 3 Sabana haitu i Adoni-Zedek nombasuro tona hau nte Magau Hoham ri ngata Hebron, Magau Piream ri ngata Yarmut, Magau Yafia ri ngata Lakhis, bo Magau Debir ri ngata Eglon, manguli petevaina, ivei, 4 “Kamai tulungimo yaku mombasuu ngata Gibeon, sabana ira novia pojanji posinggabelo nte i Yosua bo toIsrael.” 5 Alima magau Amori haitu, iamo magau ngata Yerusalem, Hebron, Yarmut, Lakhis bo Eglon nompakasangu, ante pura-pura tantarara mombatiku bo mombasuu ngata Gibeon.6 ToGibeon nompakatu kareba ka i Yosua ri potenda ri Gilgal, ivei, “Nemo rapalamba kami, pua! Hitupa kakavamo mombatulungi kami, sabana tantara pura-pura magau ntoAmori anu nonturo ri bagia buluna hitu nompakasangumo mombaeva kami!”
7 I Yosua bo pura-pura tantara anu naroso bo nabia nanggalivo dako ri Gilgal hau mosieva. 8 TUPU nanguli ka i Yosua, “Nee maeka nte ira. NibotusiKumo, komiu padagi mangeva ira, sabana haitu ledoria saitoa ira mompakule mangeva komiu.” 9 I Yosua bo tantarana njambongi-mbongi nolipa dako ri Gilgal hau ri Gibeon, sampesanika nisuuramo toAmori. 10 TUPU nompakapari rara ntoAmori tempo nanggita toIsrael. Nadea toAmori nipatesi ri Gibeon, bo tona anu da natuvu niraga notua dako ri kente bulu ri ngata Bet-Horon sampe nakavao hau ri ngata Azeka bo ngata Makeda ri sabingga puluna. 11 Tempo toAmori da ranja mpotua ri kente bulu nangovaka tantara toIsrael, TUPU nombanavusaka uda es nambaso dako ri langi ntapumpu dala sampe ri ngata Azeka. Nadeapa ira namate nirunju uda es pade nipatesi ntoIsrael.
12 Ri eo haitu tempo TUPU nombadekei toIsrael nombadagi toAmori, i Yosua notesa ka TUPU ri ngayo ntodea Israel, ivei,
“Hee mata nu eo! Petaamo ri bavo ngata Gibeon.
Bo iko bula! Nemo molinja
dako ri bavo Lemba Ayalon.”
13 Bo netaa mpuumo mata nu eo bo bula ledo noenju sampe toIsrael nombadagi balira. Kajadia hitu nitulisi riara Buku Yasara. Saeo ntua mata nu eo netaa, bo nasae ntoto pade nasolo. 14 Eo haitu TUPU nangoseaka dota manusia sabana Ia mboto nosieva nosabingga nte toIsrael. Eo eva haitu doparia najadi baipia bo domo maria majadi hanupa.
15 Naupupa posieva haitu, i Yosua bo tantarana nanjili hau ri potenda ri Gilgal.
I Yosua nombasaka alima magau ntoAmori
16 Tapi alima magau ntoAmori haitu namala nalai bo netabuni ra bolo ri Makeda. 17 Tona nanggita petabuni magau gahaitu, niulikara i Yosua. 18 Nangulimo i Yosua, “Duliaka vatu-vatu mbaso mombatutui vamba bolo haitu bo tudumo bara sakondua tantara mombajagaina. 19 Tapi komiu nemo metaa ri sia, raga njuu bo suumo ira dako ri bengo. Nemo rapalamba ira mesua hau ri ngatara! TUPU Alatala anu nisombata nombadekei kita mombadagi ira.” 20 I Yosua bo toIsrael nompatesi toAmori gahaitu, tapi naria muni bara sakondua ira nalai netabuni hau ri ngatara sampe ira domo namala nipatesi. 21 Naliu haitu pura-pura tantara i Yosua nanjili ledo ria nakuya-kuya hau ri potendara ri Makeda.
Ledo ria saitoa ri ngata haitu nabia notesa mangeva toIsrael.
22 Naupu haitu nangulimo i Yosua, “Hitupa duliakamo vatu potutui bolo petabunira tutu bo keni tumai magau alima ritu.” 23 Bo niduliakara mpuu vatu haitu, pade magau ngata Yerusalem, Hebron, Yarmut, Lakhis, bo Eglon nikeni mpesuvu, bo nikenira ka i Yosua. 24 Pade nironde i Yosua puramo toIsrael masiromu bo niparentana ala pura-pura pakeni tantara anu nombatuntuni ia nosieva, makava mombadika kadara ri tambolo magau gahaitu, tanda toIsrael nombadagi ira. Nakavamo pakeni ntantara gahaitu bo nombadika kadara ri tambolo magau gahaitu. 25 Naupu haitu nangulimo i Yosua ka pakeni tantarana gahaitu, “Nemo makini rara bo nemo maeka. Pakaroo bo pakaroso raramiu, sabana ivehitumo dala nTUPU movia pura-pura balita.” 26 Pade nipatesi i Yosuamo magau gahaitu bo niloena ira alima haitu ri tinja poloe. Mboara nipalamba ri sia sampe nanggovia. 27 Tempo eo masolomo, i Yosua nomparenta ala mboara gahaitu ratoraka pade ratedeaka ra bolo, nipetabunira pangane. Pade vatu-vatu mbaso niduliaka hau ri vamba bolo petabuni haitu. Vatu-vatu gahaitu da naria ri sia tempo potulisi buku hitu.
Nadea vai ngata ntoAmori nidagi i Yosua
28 Eo haitu i Yosua nombasuu ngata Makeda, bo nombadagi ngata haitu nte magauna. Pura-pura toponturo ri ngata haitu nipatesina, ledo ria saitoa nipalambana natuvu. Povia i Yosua ka magau ngata Makeda nasimbayu ante pompoviana ka magau ngata Yerikho.
29 Naupu haitu tantarana nolipa njuu dako ri ngata Makeda hau ri ngata Libna bo nombasuu ngata haitu. 30 TUPU nombadekei toIsrael nombadagi ngata haitu bo magauna. Ledo ria saitoa nipalambara natuvu, pura-pura tona riara ngata haitu nipatesi. Povia i Yosua ka magau ngata haitu nasimbayu eva pompoviana ka magau ngata Yerikho.
31 Pade i Yosua bo tantarana nolipa dako ri ngata Libna hau ri ngata Lakhis. Ira nompatiku ngata haitu bo nombasuuna. 32 TUPU nombadekei toIsrael nombadagi ngata Lakhis riara posieva eo karanduana. Anu nipoviara ri ngata Libna ivesia muni nipoviara ri ngata Lakhis, ledoria saitoa nipalambara natuvu, nipatesira pura. 33 I Horam magau ngata Gezer nakava mombatulungi ngata Lakhis, tapi i Yosua nombadagi ia bo tantarana, ledo muni naria saitoa ira naboli, namate pura.
34 Naupu haitu i Yosua ante tantarana nolipa njuu dako ri ngata Lakhis hau ri ngata Eglon pade nompatiku bo nombasuu ngata haitu. 35 Eo haitu muni ira nombadagi ngata Eglon bo nompatesi pura-pura tona ri sia eva anu nipoviara ri ngata Lakhis.
36 Dako ri ngata Eglon i Yosua bo tantarana nendake ri bulu bo hau ri ngata Hebron, pade nombasuu 37 bo nombadagi ngata haitu. Magau bo todea ri ngata haitu bo tona ri ngata-ngata ri sinjorina, pura-pura nipatesi. I Yosua nombagerosi ngata haitu eva nipoviana ka ngata Eglon. Ledo ria saitoa nipalambana natuvu ri sia.
38 Naliu haitu i Yosua bo tantarana negoli nombasuu ngata Debir. 39 Ngata haitu bo magauna bo pura-pura ngata ntanina ri sinjorina nidagi i Yosua. Pura-pura tona ri sia nipatesi. Povia i Yosua ka ngata Debir bo magauna nasimbayu eva nipoviana ka ngata Hebron bo ngata Libna bo magauna.
40 Jadi pura-pura ngata haitu nidagi i Yosua. Ia nombadagi magau-magau ri bagia buluna, ri kente bulu bagia mpandake bo ri kente bulu bagia mpanau bo muni ri tana Negeb. Ledoria saitoa nipalambana natuvu, pura-pura nipatesina. Haitu nantuntuni parenta dako nte TUPU Alatala nisomba ntoIsrael. 41 I Yosua nombadagi ngata dako ri Kades-Barnea ri sabingga puluna sampe hau ri Gaza napara bagia talinti, haitumo pura-pura bagia ngata Gosyen napola hau ri ngata Gibeon bagia tasina. 42 Sanggani nosieva, i Yosua nombadagi pura-pura ngata bo magau gahaitu. Sabana TUPU Alatala nisomba ntoIsrael nosabinggaka ira. 43 Naupu haitu i Yosua bo tantarana nanjilimo hau ri potendara ri Gilgal.