I Yosua nombadagi magau-magau ri tana Kanaan sabingga tasina
11
Tempo i Yabin magau dako ri ngata Hazor nangepe toIsrael nombadagi pura magau nievara haitu, ia nombasuro tona hau nte Magau Yobab ri ngata Madon bo ka magau ri ngata Simron bo Akhsaf. 2 Ia muni nosuro tona hau nte magau ri bagia buluna sabingga tasina, bo hau nte magau ri lemba Yordan ri sabingga puluna Kinerot,a ri bagia kente nu bulu bo ri bagia talinti napara ngata Dor. 3 Nisurona muni tona hau nte magau ntoKanaan ri sabingga mpanau bo sabingga mpandake. Bo nisurona muni tona hau nte magau toAmori, toHet, toFeris bo toYebus ri bagia buluna, bo muni nte toHewi ri kente nu Bulu Hermon ri bagia Mizpa. 4 Jadi nakavamo magau gahaitu ante pura-pura tantarara, kadeana eva bone ri bivi ntasi. Jara bo kareta posievara nadea muni. 5 Magau gahaitu nompakasangu bo notenda singgani-nggani napara binangga Merom mombasuu toIsrael.6 TUPU nanguli ka i Yosua, “Nemo maeka nte ira. Maile tempo ivehitu, Kupatesi pura ira ka toIsrael. Jara nipakera kana ralopusimiu, bo kareta-kareta posievara kana rapalabusimiu.” 7 Sampesanika I Yosua ante pura-pura tantarana nokolu nombasuu balira gahaitu napara binangga Merom. 8 Bo TUPU nombadekei toIsrael nombadagi ira. ToIsrael nombasuu bo nombaraga ira sampe ri Sidon-Mbaso bo Misrefot-Maim ri sabingga mpanau, bo sampe ri Lemba Mizpa ri sabingga mpandake. Posieva haitu najadi-jadi mpuu sampe domo ria saitoa balira natuvu. 9 ToIsrael nombalopusi jara bo nombatunjusi kareta mposieva balira, nangoseaka parenta nTUPU ka i Yosua.
10-11 Nanjilipa i Yosua, ia nombadagi ngata Hazor, ngata narosopa pade pura-pura kamagaua rahaitu. Ngata haitu nitunjura, magau bo pura-pura toponturo riarana nipatesira, ledo ria saitoa nipalambara natuvu.
12 Pura-pura ngata gahaitu nidagi i Yosua, magau-magauna nisaka bo nipatesi nantuntuni parenta nTUPU ka batuaNa i Musa. 13 Tapi ngata-ngata nipopeangga ri bavo rupu-rupu ngata anu natetaivumo nggaulu, ledo ria sangua nitunju ntoIsrael, aga ngata Hazor nitunju i Yosua. 14 Pura-pura toponturo riara ngata haitu nipatesi, ledo ria saitoa nipalamba natuvu. Tapi pura-pura binata bo mbara-mabara anu noali niala ntoIsrael najadi bagiara. 15 Pura-pura anu niparenta nTUPU ka batuaNa i Musa, niuli i Musa ka i Yosua bo pura-pura haitu nipovia i Yosua. Ledo ria sangua ledo nipoviana.
I Yosua nangala njumangu tana Kanaan
16-18 I Yosua ante tantarana nangala njumangu tana ri Kanaan, dako ri Bulu Bai ri sabingga puluna napara tana Seirb, sampe ri ngata Baal-Gad ri Lemba Libanon napara Bulu Hermon ri bagia tasina. Nialara pura muni tana ri olona haitu, tana ri buluna, ri njumangu tana Negeb bo tana Gosyen, ri kente bulu, ri lemba Yordan bo tana ri bulu Israel ante kente bulu. Nasae mpuu i Yosua nte tantarana nosieva nte magau-magau ri bagia haitu, tapi kaupuna magau gahaitu nisaka bo nipatesi pura. 19 Dako ri pura-pura ngata ri tana Kanaan, ledo ria sangua ngata anu novia pojanji posinggabelo nte toIsrael, aga toHewi ri ngata Gibeon. Pura-pura ngata ntanina nidagi riara mposieva. 20 TUPU nompakakaa bagara sampe ira mosieva nte toIsrael, ala ira raropusi bo nemo maria asi mata mompatesi ira eva anu niparenta nTUPU ka i Musa.
21 Ri tempo haitu muni i Yosua hau mombaropusi toEnak, haitumo muli ntona nambaso anu nonturo ri bagia buluna, ri ngata Hebron, ri Debir, ri Anab bo ri njumangu bagia buluna ri Yehuda bo Israel. Ira pura-pura nipatesi i Yosua bo ngata-ngatara nigerosi. 22 Ledo ria saitoa toEnak haitu naboli ri tana Israel. Aga ri ngata Gaza, ri ngata Gat, bo ri ngata Asdod da nariapa naboli. 23 Njumangu ngata haitu nidagi i Yosua nantuntuni parenta nTUPU ka i Musa, pade nidekei ka toIsrael najadi bagiara. Ngata haitu nibagi-bagi, sangu valaa nanggava sangu bagia.
ToIsrael netaamo nosieva bo ngatara natinontomo.