Randua magau nidagi i Musa
12
Ri sabingga mpandake binangga Yordan, naria randua magau ngata anu nidagi bo tanara niala bo niponturo ntoIsrael. Tana haitu nompamula dako ri lemba binangga Arnon nantuntuni Lemba binangga Yordan sampe hau ri Bulu Hermon ri sabingga tasina. 2 Saito nosanga i Sihon, magau ntoAmori anu nonturo ri ngata Hesybon. Kaluo tana riara pomparentana, santanga tana Gilead, dako ri ngata Aroꞌer ri tinggi salu Arnon bo ngata ri tatanga lembana haitu sampe ri binangga Yabok ri pantaa tana ntoAmon, 3 bo muni njumangu tana Lemba Yordan sabingga mpandake, dako ri rano Kinerota sampe ri Bet-Yesimot ri sabingga mpandake Tasi Mate napola ri kente Bulu Pisga sabingga puluna.b4 Magau ntanina anu nidagi ntoIsrael, haitumo Magau Og dako ri tana Basan, anu nonturo ri ngata Asytarot bo Edrei. Ia saito tona naboli dako nte toRefaim.c 5 Tana nesua riara pomparenta Magau Og haitumo: Bulu Hermon, Salkha bo njumangu ri tana Basan sampe hau ri tana Gesur bo tana Maakha, bo muni sabagia tana Gilead sampe hau ri bagia pomparenta magau Sihon ri ngata Hesybon.
6 Haitumo randua magau anu nidagi i Musa batua nTUPU ante toIsrael. Tana magau gahaitu nidekei i Musa majadi bagia valaa i Ruben, valaa i Gad bo ka sabagia valaa i Manasye.
Magau-magau ri sabingga mpanau anu nidagi i Yosua
7 Magau-magau anu nidagi i Yosua ante toIsrael, haitumo pura-pura magau ri bagia sabingga mpanau binangga Yordan, dako ri Baal-Gad ri lemba Libanon sabingga tasina napola sampe ri Bulu Bai sabingga puluna napara tana Seir. Tana haitu nibagi-bagi i Yosua ka valaa-valaa ntoIsrael ala majadi bagiara. 8 Tana haitu ri bagia buluna, ri kente-kente bulu sabingga mpanau bo ri kente-kente bulu sabingga mpandake, lemba Yordan, karava bai bo ri tana Negeb sabingga puluna. Tana-tana gahaitu bela ponturo toHet, toAmori, toKanaan, toFeris, toHewi, bo toYebus. 9-24 Magau-magau nidagira, kadeana talu pulu bo saito, iramo magau dako ri ngata Yerikho, ri Ai napara ngata Betel, ri Yerusalem, ri Hebron, ri Yarmut, ri Lakhis, ri Eglon, ri Gezer, ri Debir, ri Geder, ri Horma, ri Arad, ri Libna, ri Adulam, ri Makeda, ri Betel, ri Tapuah, ri Hefer, ri Afek, ri Lasaron, ri Madon, ri Hazor, ri Simron-Meron, ri Akhsaf, ri Taanakh, ri Megido, ri Kedes, ri Yokneam ri bulu Karmel, Dor ri bulu, Goyim ri bagia Galilea bo ri Tirza.