Valaa i Ruben, i Gad, bo sabagia valaa i Manasye nitudu manjili hau ri ngatara ri sabingga mpandake binangga Yordan
22
Naliu haitu i Yosua nombaronde tantara-tantara dako ri valaa i Ruben, i Gad bo sabagia valaa i Manasye anu nonturo ri sabingga mpandake binangga Yordan, 2 bo nangulimo ia, “Pura-pura anu niparenta nTUPU ka batuaNa i Musa ka komiu, nipoviamiumo. Bo muni pura-pura anu niparentaku ka komiu niturusimiu munimo. 3 Sampe eo hitu ledo ria nipalambamiu sampesuvu-sampesuvumiu toIsrael. Parenta-parenta nTUPU Alatala anu nisombata, mpuu-mpuu niturusimiu. 4 Jadi evamo anu nijanji nTUPU Alatala anu ni sombata, Ia mombadekei katinonto ka sampesuvu-sampesuvumiu toIsrael ntanina. Jadi hitupa panjilimo komiu hau ri ngatamiu mboto, ri sabingga mpandake binangga Yordan, anu nidekei i Musa ka komiu nggaulu. 5 Tapi komiu kana manturusi parenta anu niparenta i Musa ka komiu, ‘Potovemo Alatala nisombamu, turusimo dotaNa, oseakamo parenta-parentaNa, bo sombamo Ia ante mpuu-mpuu raramiu.’ ”6-9 Pade i Yosua nerapi doa ala TUPU mombadekei rasi ka ira. Bo nidekeinamo ira manjili hau ri ngatara. Niulina, “Hitupa komiu nakalumanamo bo manjili manggeni binata patuvua nadea, bulava, salaka, gala, ase, bo pakea. Asele anu niagomiu tutu bagi muni ka tona anu nosavalaa ante komiu.” Jadi valaa i Ruben, i Gad bo sabagia valaa i Manasye dako ri sabingga mpandake binangga Yordan nogaa ante toIsrael anu nonturo ri tana Kanaan, bo ira neanggataka dako ri ngata Silo ri tana Kanaan manjili hau ri ngatara mboto ri tana Gilead. Ira nonturo ri ngata haitu nangoseaka parenta nTUPU anu niuliNa ka i Musa.
(Sabagia valaa i Manasye nonturo ri sabingga mpandake binangga Yordan ri tana anu nidekei i Musa, bo sabagiapa ira nonturo ri sabingga mpanau binangga Yordan ri tana anu nidekei i Yosua. Bo ira nonturo nosanggani ante valaa-valaa ntanina ri tana haitu.)
Lanta pesomba nipovia napara binangga Yordan
10 Tempo valaa i Ruben, i Gad bo sabagia valaa i Manasye nakava ri Gelilot, ri sabingga mpanau binangga Yordan, rahaitu ira novia sangu lanta pesomba nambaso bo nabelo napara binangga. 11-12 ToIsrael anu nonturo ri ngata Silo nanguli, “Sampesuvuta dako ri valaa i Ruben, i Gad bo sabagia valaa i Manasye anu nonturo ri sabingga mpandake binangga Yordan novia sangu lanta pesomba ri Gelilot, napara binangga Yordan. Bo nipoviara lanta pesomba haitu da nambela bagia tana Kanaan!” Jadi ira nasiromu ri ngata Silo madota mombasuu valaa-valaa Israel anu nonturo ri sabingga mpandake binangga Yordan.
13 Ira nombatudu i Pinehas ana i Eleazar topanggeni pesomba, mosinggavaka valaa i Ruben, i Gad bo sabagia valaa i Manasye ri Gilead ri sabingga mpandake binangga Yordan. 14 I Pinehas niporoa sapulu pakeni-pakeni Israel, saito dako ri sangu valaa. Haitumo ira anu nonturo ri sabingga mpanau binangga Yordan. 15 Pade nakavamo ira ri ponturo valaa i Ruben, i Gad bo sabagia valaa i Manasye. 16 Nangulimo ira, “Nakuya komiu novia anu nadaa ri ngayo Alatala nisomba ntoIsrael? Komiu nangeva TUPU! Domo nioseakamiu parentaNa, apa Komiu novia vai sangu lanta pesomba ka komiu mboto. 17 Domo nitoramiu dosata ri Peor? Tempo haitu kita nihuku nTUPU ante dua mpendai, naupa kita todeaNa mboto! Bo sampe eo hitu kita nandasa sabana dosata haitu. Apa haitu dopa nagana? 18 Bo hitupa, apa ratubengosimiu vai TUPU? Ane eo hitu komiu mangeva TUPU, maile Ia kana marau ka kita pura-pura toIsrael. 19 Ane ngata niponturomiu ledo nagasa bo ledo masipato rapake mombasomba TUPU, polinjamo tumai ri tana nTUPU, ri pompopeangga Tenda nTUPU. Perapimo sabagia ngata kami, tapi nemo raevamiu TUPU bo kami, apa nipoviamiu vai sangu lanta pesomba ntanina, sabana nariamo lanta pesomba ka TUPU Alatala. 20 Toramo, i Akhan ana i Zerah ledo nioseakana parenta nTUPU, nialana mbara-mbara anu nitagi nTUPU. Sabana pokaingguna haitu, pura-pura toIsrael nihuku! Anu novia dosa aga i Akhan, tapi anu namate ledo aga saitona!”
21 Pade tona dako ri valaa i Ruben, i Gad bo sabagia valaa i Manasye anu nonturo ri sabingga mpandake binangga Yordan nesana, 22 “Alatala TUPU To nakuasapa pade tupu-tupu ntanina! NisaniNa nuapa nipovia kami, bo kami madota ala rasanimiu muni! Ane kami movia anu haitu bo mopatuju mangeva TUPU bara kami domo nomparasaya Ia, dekeikamo kami mamate hitu-hitu muni! 23 Ane kami mopatuju mangeva TUPU bo movia lanta pesomba kami mboto rapompesombaka kami pesomba rapalabu, pesomba gando bo pesomba posinggabelo ri bavo lanta pesomba haitu, damo TUPU mboto mombahuku kami. 24 Sampesuvu-sampesuvu, ledo ivehaitu patuju kami. Kami novia lanta pesomba haitu, sabana nakini rara kami ri eo nggapurina ngena mulimiu manguli ka muli kami, ‘Komiu ledo nomparasaya TUPU Alatala nisomba ntoIsrael. 25 Peinta, Ia nombadika binangga Yordan nombataolosi kita. Nakanamo komiu ledo nomparasaya TUPU.’ Nuapa majadi ngena? Natantumo mulimiu mombatagi muli kami mombasomba TUPU. 26 Jadi kami novia lanta pesomba hitu, ledo rapake kami modekei pesomba rapalabu bara pesomba kami ntanina, 27 tapi aga majadi tanda ka kita bo ka mulita ri eo nggapurina. Ala ledo malinga rarata, kami muni nombasomba TUPU ri Tenda NikakavaNa nte nanggeni pesomba rapalabu bo pesomba posinggabelo. Bo ala mulimiu ledo motesa ka muli kami ivei: ‘Komiu ledo nomparasaya TUPU!’ 28 Jadi patuju kami ivei: Rapana ane mulimiu manguli ivehaitu, muli kami mamala mesana ivei, ‘Peintamo lanta pesomba anu nipovia ntotua kami haitu, nasimbayu ante lanta pesomba ri ngayo nTenda Nikakava nTUPU. Lanta pesomba haitu, ledo rapombadekei pesomba rapalabu bara pesomba ntanina, tapi aga majadi tanda ka kita.’ 29 Ledo mpuu kami madota mangeva TUPU, bara menonto mosomba Ia ante mantambai lanta pesomba ntanina rapombadekei pesomba rapalabu bara pesomba gando rapesombaka, sabana lanta pesomba ka TUPU Alatala nariamo ri ngayo Tenda Nikakava nTUPU.”
30 Pura-pura anu niuli ntona dako ri valaa i Ruben, i Gad bo valaa i Manasye anu nonturo ri sabingga mpandake binangga Yordan haitu, niepe i Pinehas topanggeni pesomba ante sapulu pakeni Israel anu nonturo ri sabingga mpanau binangga Yordan. Jadi naosamo rarara ante tesa haitu. 31 Pade i Pinehas ana i Eleazar topanggeni pesomba nanguli vai ka ira dako ri valaa i Ruben, i Gad bo sabagia valaa i Manasye dako ri sabingga mpandake, “Hitupa nisani kamimo TUPU nomporoa kita, sabana ledo nievamiu Ia. Nipakasalamamiumo toIsrael dako ri pehuku nTUPU.”
32 Naliu haitu neanggatakamo i Pinehas ana i Eleazar topanggeni pesomba, ante pakeni-pakeni toIsrael. Ira nogaa nte toRuben bo toGad ri Gilead, pade nanjili hau ri Kanaan. Tesa toRuben, toGad bo sabagia toManasye niulira ka toIsrael anu nonturo ri sabingga mpanau binangga Yordan. 33 Jadi naosamo rara ntoIsrael nangepe tesa haitu, sampe ira nantoiya Alatala. Domo nitesara niara mombasuu bo mombagerosi ngata ntoRuben bo toGad.
34 Kaupuna valaa i Ruben bo i Gad nanguli, “Lanta pesomba haitu majadi sabi ka kita pura sabana TUPUmo mai Alatala anu nisombata.” Jadi lanta pesomba haitu nipoposangara “Sabi.”