Tesa i Yosua panggaupuna ka toIsrael
23
Nasae TUPU nombadekei katinonto ka todea Israel, ira domo nigado nu balira. Tempo haitu i Yosua natua ntotomo. 2 I Yosua nombaronde pura-pura todea Israel, totua-totua ngata, pura-pura pakeni, pura-pura topotangara bo pura-pura topompasiayu tantarana. Nangulimo ia, “Hitupa yaku natuamo. 3 Nipeintamiu puramo anu nipovia nTUPU Alatala anu nisombata, Ia nombatulungi kita nombadagi pura-pura todea ri tana hitu. TUPU Alatala, Iamo nombatulungi kita riara posieva. 4 Nibagiku puramo tana ka komiu najadi bagiamiu mboto. Tana haitu iamo tana ntodea anu nidagi tempo da yaku najadi pakenimiu, bo muni tana ntona anu dopa nidagita. Pura-pura tana nompamula dako ri sabingga mpandake binangga Yordan napola hau ri mpanau sampe ri Tasi Tatanga, nibagikumo ka komiu majadi bagiamiu. 5 TUPU Alatala nisombata, Iamo mbadekei komiu mombadagi balimiu, bo ira nalai dako nte komiu. Ngatara majadi bagiamiu evamo nijanji nTUPU Alatala ka komiu.6 Sabana haitu jagaimo ala komiu mangoseaka bo mokainggunaka pura-pura anu nitulisi riara Buku Atura i Musa. Nemo ntoto mombalumpaiki sangua dako ri isi buku atura haitu. 7 Aga mokainggu eva haitu komiu ledo mosisovo nte todea-todea ngata ntanina anu da naria nonturo nte komiu ri tana Kanaan bo nemo mombasomba viata-viatara bara mosumpa manguli sanga viatara. Komiu muni nemo metupu bara mosomba nu viata-viata haitu. 8 Komiu kana matutu mangoseaka TUPU eva anu nikainggunakamiu sampe hitu-hitu. 9 Todea-todea ngata anu naroso nipopalai nTUPU dako ri ngayomiu, ledo ria saitoa ira mamala mangeva komiu. 10 Nau aga saito dako nte kita mamala mangeva tona njobuna, sabana TUPU Alatala mboto nosieva nombatulungi kita, eva nijanjiNa ka kita. 11 Sabana haitu, toramo bo potovemo TUPU Alatala nisombata. 12 Ane komiu ledo matutu bo komiu mosinjovo ante todea-todea ntanina anu da nonturo nte komiu, bo mosipoberei ante ira, 13 tora, natantumo TUPU Alatala ledo mompopalai todea gahaitu dako nte komiu. Tapi ira aga mompakadaa komiu, sabana ira eva tolia mombatoliani komiu. Ira mpuu-mpuu mompakasusa komiu. Ira eva poboba mombaboba bengomiu bo eva timpo mombatosu matamiu. Komiu njuu-njuu masusa sampe domo ria saitoa maboli dako nte komiu ri ngata anu nabelo, ngata anu nidekei nTUPU Alatala ka komiu. 14 Hitupa naparamo tempona yaku mamate. Komiu pura-pura nangisani, TUPU Alatala nombadekei pura-pura anu nabelo nijanjiNa ka kita. Pura-pura janjiNa nipakadupaNamo. 15-16 TUPU Alatala nompakadupa janjiNa ka kita, natantumo ivesia muni Ia mompakadupa pehukuNa ka kita. Ane komiu mombalumpaiki pojanji Alatala anu niparenta ka komiu, bo metupu mombasomba tupu-tupu ntanina, natantumo TUPU Alatala marau bo mombahuku komiu bo masalisa maropu dako ri ngata nabelo hitu, ngata anu nidekei nTUPU ka komiu.”