I Yosua notesa ka todea Israel ri ngata Sikhem
24
Naupu haitu i Yosua nompasiromu pura-pura todea Israel ri ngata Sikhem bo ia nanguli ka totua-totua ngata, pura-pura pakeni, pura-pura topotangara bo pura-pura topompasiayu tantarana makava meangga ri ngayo nu Alatala. 2 Pade nangulimo i Yosua ka ira, “Epemo tesa nTUPU Alatala ka komiu ivei: ‘Tempo totuamiu nggaulu da nonturo ri sambote binangga Efrat, ira da nombasomba viata-viata. Saito dako nte ira nosanga i Terah tuama i Abraham bo i Nahor. 3 Pade Yaku nombaronde i Abraham, totuamiu nggaulu, bo nombatudu ia mompesayo njumangu ngata Kanaan hitu. Yaku nombadekei muli dea ka ia. Pamulana nidekeiKu i Ishak ka ia, 4 pade ka i Ishak nidekeiKu randua ngana, haitumo i Yakub bo i Esau. Yaku nombadekei tana ri bulu Seir najadi tana bagia i Esau bo muli-mulina, tapi i Yakub nolinja hau ri Mesir nosanggani-nggani nte anana.5 Naliu haitu Yaku nombasuro i Musa bo i Harun, bo nombadekei silaka mbaso ka toMesir pade nanggeni totuamiu nggaulu nesuvu dako hamai. 6 Yaku nanggeni totuamiu nggaulu nesuvu dako ri Mesir, pade toMesir nombaraga ira ante kareta mposieva bo tantara nesavi jara. Tempo totuamiu nggaulu nakava ri Tasi Siroyo, 7 ira nongare-ngare nerapi tulungi nte Yaku. Ri olo toMesir bo ira nipakalandaKu, Yaku nompopogaa uve ntasi ala totuamiu nggaulu mamala mevote. Tapi tempo toMesir nompamulamo metuntuni, Yaku nompoposintomu mpanjili uve ntasi nombatampunisi ira. ToMesir gahaitu natoyo pura. Nipeintamiu puramo anu nipoviaKu ka toMesir.
Naliu haitu nadea mpuu mpaena komiu naroo ri karava bai. 8 Pade Yaku nanggeni komiu hau ri ngata ntoAmori anu nonturo ri sabingga mpandake binangga Yordan. Ira nombasuu komiu, tapi Yaku nombadekei komiu nombadagi ira. Komiu nomponturosi ngatara bo Yaku nombaropusi ira. 9 Naliu haitu magau tana Moab, nosanga i Balak ana i Zipor nangeva komiu. Ia nombasuro tona hau nte i Bileam ana i Beor ala mopindasi komiu. 10 Tapi ledo niepeKu perapi i Bileam, ia aga nerapi doa ala komiu radekeika rasi. Ivesiamo Yaku nompakasalama komiu dako nte i Balak. 11 Naupu haitu komiu nevote binangga Yordan, bo nakava ri Yerikho. ToYerikho nosieva nte komiu, ivesia muni toAmori, toFeris, toKanaan, toHet, toGirgasi, toHewi, bo toYebus. Tapi Yaku nombatulungi bo nombadekei komiu nombadagi ira. 12 Tempo komiu hau nombasuu ira, Yaku nompakaingu rarara bo novia ira najadi naeka, sampe randua magau ntoAmori nalai dako nte komiu. Ledo aga kataumiu nompake guma bo kataumiu nopana nompajadi komiu padagi. 13 Tana nidekeiKu ka komiu, ledo asele titi nu inimiu mboto. Bo ngata-ngata nidekeiKu ka komiu ledo komiu nompopeanggana. Tapi hitupa komiu nonturokana, bo komiu nangande asele vua anggur nte vua zaitun, nau ledo komiu nombatudana.’ ”
14 Nanguli i Yosua, “Jadi bilamo TUPU, matutu mosomba Ia ante mpuu-mpuu raramiu. Tumo mombasomba tupu-tupu ntanina anu nisomba ntotuamiu nggaulu ri sambote binangga Efrat bo Mesir. Aga TUPU masipato rasomba. 15 Ane rapana komiu ledo madota mombasomba TUPU, eo hitu muni botusimo, isema kakanana rasombamiu: tupu-tupu ntanina anu nisomba ntotuamiu nggaulu ri sambote binangga Efrat, bara mombasomba tupu-tupu anu nisomba ntoAmori, ngatara niponturomiu sii-sii. Tapi kami sambanua aga mombasomba TUPU.”
16 Nesana todea Israel, “Ledo ntoto kami mombasomba tupu-tupu ntanina! 17 TUPU Alatala anu nombakabasaka totuata nggaulu bo kita dako ri pepandasa ri Mesir. Nipeintatamo kabaraka-kabaraka anu nipopakita nTUPU. TUPU nomporoa bo nombajagai kita riara polipata, nombaliu ngata-ngata tona ntanina. 18 Bo tempo kita nesua ri ngata hitu TUPU nompopalai toAmori, toponturo ri ngata hitu. Jadi kami aga mombasomba TUPU, sabana aga Iamo Alatala anu masipato rasombata!”
19-20 Pade nanguli i Yosua, “Tapi bara ledo mompakule komiu mombasomba TUPU, sabana Ia Alatala anu ledo ria kasimbayuna, ledoria ntanina Alatala. Ledo mamala morandua rara mosomba Ia. Ane komiu domo mombasomba Ia bo aga mombasomba tupu-tupu ntanina, Ia marau bo mombahuku komiu bo domo ntoto raampungiNa dosamiu. Ia mombaropusi komiu, naupa ruru Ia nabelo nte komiu.”
21 Pade nesana toIsrael gahaitu, “Ledo! Kami ledo madota mombasomba tupu-tupu ntanina. Kami aga mombasomba TUPU.”
22 Nanguli i Yosua, “Komiu mboto najadi sabi tesamiu, sabana niulimiu, komiu aga mombasomba TUPU.”
Nesana ira, “Nakana, kami mboto mombasabiki tesa kami.”
23 Nanguli vai i Yosua, “Ane ivesia tumo rasombamiu tupu-tupu anu nisomba ntodea ntanina, tedeakamo anu haitu ane da maria nte komiu bo pojanjimo komiu aga matutu mombasomba TUPU Alatala nisombata toIsrael.”
24 Pade nangulimo toIsrael gahaitu ka i Yosua, “Kami aga mombasomba TUPU Alatala bo mangoseaka parenta-parentaNa.”
25 Eo haitu muni ri ngata Sikhem i Yosua bo todea Israel nompakaasa pojanji ri ngayo nTUPU, i Yosua nombadekei parenta anu kana raoseakara. 26 Pura-pura parenta haitu nitulisina riara Buku Atura Alatala. Naupu haitu i Yosua nantudu toIsrael mompopeangga sangu vatu mbaso, bo nipopeanggara ri tambe kayu mbaso, ri sia niuli tana nagasa, sabana haitumo tana nipatani ka TUPU.a 27 Naupu haitu nangulimo i Yosua ka todea Israel, “Jadi vatu hitu najadi sabi ka kita. Pura-pura tesa niuli nTUPU ka kita, nisovadakamo ri ngayo vatu hitu. Jadi vatu hitu najadi sabi ka komiu, bo mompopatora ala nemo komiu mangeva Alatala.” 28 Kaupuna i Yosua nantudu toIsrael gahaitu nanjili, bo nanjilimo ira hau ri tanara mboto.
I Yosua bo i Eleazar namate
29 Naliu haitu i Yosua ana i Nun, batua nTUPU, namate noumuru saatu sapulu (110) mpae. 30 Ia nitana ri tanana mboto, ri ngata Timnat-Serah, ri bulu Efraim sabingga tasina bulu Gaas. 31 Tempo i Yosua da natuvu sampe ia namatemo, ira batena nombasomba TUPU. Bo tempo da natuvu pakeni-pakeni ntoIsrael anu nangganoto mboto pura-pura povia nTUPU ka todea Israel, ira da bate-batena nombasomba TUPU.
32 Buku-buku mboa i Yusuf anu nikeni ntoIsrael dako ri Mesir, nitanara ri ngata Sikhem, ri tana niali i Yakub ante ali saatu doi salaka dako nte ana-ana i Hemor, tuama i Sikhem. Tana haitu nipopotupuka ka muli i Yusuf. 33 Naliu haitu i Eleazar ana i Harun namate munimo bo nitana ri ngata Gibea, haitumo sangu ngata ri bagia bulu Efraim. Ngata haitu nidekei ka i Pinehas ana i Eleazar.