Isa Al Masih nggaduna sampuru d̄ua dou anamori-Na
9:1-6
9
Isa ouna sampuru d̄ua dou anamori-Na, edempara mbeina d̄i siad̄oho kuasa ^dikatesakaina roh setan ro ^dikatahokaina dou masupu. 2 Edempara Sia kauna siad̄oho lao kataho wea dou masupu ro ngoa ro kahaba Injil mab̄oha Karaja'an Allah. 3 Isa nggahina,<<Aina wa'amu au-au d̄i ade lampa ro laokaimu, aina wa'amu tiki, atao ka^du^du ^ditaukaimu osu, atao ngaha ro nono, atao piti atao d̄ua ndo'o ^baju. 4 Ta ^bera nggomid̄oho tarima aokai b̄a dou, ngge'epu ta ede sampe nggomid̄oho tu'u wi'imu kota ede. 5 Ro ta ^bera nggomid̄oho wati tarima aokai b̄a dou, wakatu nggomid̄oho tu'u wi'imu kota ede, fura pakipu kalu^bu ma wara d̄i kopa e^dimu, d̄imandad̄i tanda kawarakai rawi siad̄oho.>> 6 Sawa'u b̄a ede anamori Isa laona, siad̄oho laona aka kampo-kampo d̄i ngoa ro kahabakaina Injil ede ro katahona dou-dou masupu.
Herodes darura adena
9:7-9
7 Wakatu sangaji Herodes ma parenta d̄i dana ro rasa Galilea, sia ringana haba mab̄oha sara'a au ma ndad̄i ede, sia darura adena. B̄ara wara ma nggahi la Yahya Mataki kandeu raso dou nawa'ura mori mbali. 8 Wara rau ma nggahi b̄a one la Elia wa'ura wontu mbali. Dou makalai manggahi rau b̄a one sab̄ua dou nabi d̄i ade weki nabi-nabi ntoina ma wa'ura made, nawa'ura mori mbali. 9 Nggahi Herodes, <<Nahu wa'ura kakaiku dou fati kakori tuta la Yahya. Pala Dou ede, couku sapodakaina Sia? Mboto haba ra ringa b̄a nahu mab̄oha Sia.>> Ndad̄i Herodes nane'e podaku eda Isa.
Isa Al Masih mbeina ngaha 5.000 dou
10-17
10 Sawa'u b̄a dula mbali rasul-rasul ra nggadu b̄a Isa, siad̄oho ngoana d̄i Isa sara'a au ra karawi b̄a siad̄oho.Isa recena siad̄oho lao kalai weki aka kota Betsaida. 11 Pala wakatu b̄ade b̄a dou-dou mab̄oha lampa rawi ede, siad̄oho lao b̄atuna Isa. Sia tarima aona siad̄oho, edempara nuntu ro nggahina d̄i siad̄oho mab̄oha Karaja'an Allah. Ro Sia kataho rauna dou masupu d̄i ade weki siad̄oho.
12 Wakatu ne'empara nci'i liro, sampuru d̄ua dou anamori Isa mai rakana Sia ro nggahina, <<Guru, hid̄i ake nad̄o'o lab̄o rasa. Satahona, Ita takau to'ipu dou-dou ake lao, loakud̄u siad̄oho ngupana ngaha ro nono ro hid̄i ^dimarukaina d̄i kampo-kampo ro rasa-rasa d̄i kompe ro pei ake.>>
13 Pala cambe b̄a Isa, <<Nggomi^dohoku d̄imambeina ngaha siad̄oho.>>
Nggahi anamori Isa, <<D̄i madad̄oho wara lima mbua roti ro d̄ua tembe uta mpa. Sab̄ua madad̄oho pab̄uaku lao weli ngaha ro nono d̄i ru'u b̄a sara'ana dou ake?>> 14 Wara takasi 5.000 dou mone ta ede.
Nggahi Isa d̄i anamori^doho-Na, <<Kaupu doud̄oho ede doho kalompo-kalompo, takasi lima mpuru dou sakalompo.>>
15 Anamori Isa ede kalampana au ra kaukai b̄a Isa d̄i siad̄oho. 16 Isa wehana lima mbua roti ro d̄ua tembe uta ede, edempara ^dongana langi ro rentana syuku. Sawa'u b̄a ede Sia to^be-to^bena roti ro uta ede kai rima-Na edempara mbeina d̄i anamorid̄oho-Na loakud̄u cengga-cenggana d̄i dou mamboto ede. 17 Siad̄oho sara'ana ngaha sampe mbocuna. Sawa'u b̄a ede anamori Isa kab̄orona ngaha ro nono ma ncewi ede wara sampuru d̄ua wonca ^bini.
Isa Al-Masih Memberi Makan Lima Ribu Orang
Mangaku la Petrus mab̄oha Isa Al Masih
9:18-21
18 D̄i sab̄ua ainaina, wakatu Isa wunga do'a kesena, anamorid̄oho-Na mai rakana Sia. So^di b̄a Isa d̄i siad̄oho, <<Ranggahi b̄a dou, couku Nahu ake?>>
19 Cambe b̄a siad̄oho, <<Wara ma nggahi la Yahya Mataki kandeu raso dou. Wara rau ma nggahi la Elia, ma kalai walina manggahi sab̄ua nabi ade weki nabi-nabi jaman ma ulu ma wa'ura mori mbali.>>
20 <<Pala nggahi b̄a ndai nggomid̄oho, Nahu ake couku?>> So^di b̄a Isa.
Cambe b̄a la Petrus, <<Ita eded̄u Sangaji Makasalama ra sake b̄a Allah Ta'ala.>>
Isa Al Masih ngoana mab̄oha susa ro ncoki-Na ro mab̄oha madekai-Na
9:22-27
21 Edempara nggahi Isa d̄i anamori^doho-Na, <<Ai to'ina ngoamu kone d̄i cou-cou rau mab̄oha lampa rawi ede.>> 22 Isa nggahi walina, <<Ana Manusia poda romo pab̄uaku mboto iu susa ro ncoki ro ^ditula b̄a dou-dou ma tuakai Yahudi ro dou-dou mana'ekai imam, ro ahli-ahli Taurat. Sia ^dihade, pala d̄i ainaina ma katolukaina ^dikamori mbali.>>
Pengakuan Petrus: Isa adalah Al-Masih yang Datang dari Allah
23 Edempara nggahi Isa d̄i sara'a dou ma wara ta ede, <<Dou ma ne'e b̄atu Nahu, pab̄uaku tu'u wi'ina au ra paralu b̄a ndaina, tundu salibna sanai-nai, ro b̄atu ncauna Nahu. 24 B̄a one dou ma ne'e jaga morina d̄i dunia, ^dimambora morina. Pala dou ma mbora morina b̄ara b̄atuna Nahu, d̄imaraka mori ma sapodakaina ro ma ede ro hi^di. 25 Auku onena d̄i ru'u b̄a sab̄ua dou nggara sara'a dunia ake ndad̄i ntauna, pala sia naleli ro mbora morina? 26 Nggara dou namajasi mangaku Nahu ro au ra ngoa ro tei b̄a Nahu, Ana Manusia rau namajaku mangaku dou ede wakatu Sia maina peade kai kuasa-Na, ro kai kuasa Ama ro kuasa mala'eka-mala'eka ma raso! 27 D̄i ^bademu: ade weki nggomid̄oho ta ake wara ma wati d̄imamade sawatipu b̄a edana d̄ese ro ntasa Karaja'an Allah.>>
Isa Al Masih kad̄ese ro kantasa
9:28-36
28 Takasi saminggu sawa'u b̄a Isa ngoa ro teina lampa rawi ede, Sia wa'ana la Petrus, Yahya, ro la Yakub ese sab̄ua doro to'i ne'e lao do'a. 29 Wakatu Isa wunga do'ana ta ede, Isa lai pahu-Na ro kani ro lombo-Na ndad̄i lanta kancilo. 30-31 We^di lalo mpa wara d̄ua dou, eded̄u la Musa ro la Elia makatada weki. Siad̄oho ^di'edamu nacahaya poda ro wunga nuntuna lab̄o Isa mab̄oha made-Na ma watid̄u ntoi wali ^dikalampana d̄i Yerusalem. 32 Wakatu ede la Petrus ro lengana wunga maruna, pala wed̄i lalo mpa tu'una, ro edana Isa heko b̄a cahaya saroga ro d̄ua dou maki^di d̄i kompe Sia. 33 Wakatu d̄ua dou ede nane'era tu'u wi'i Isa, nggahi la Petrus d̄i Isa, <<Ruma, sana poda ndai wara ta ake. Taho madad̄oho d̄imatu'u tolu mbua kema: sab̄ua d̄i ru'u b̄a Ita, sab̄ua d̄i ru'u b̄a la Musa ro sab̄ua wali d̄i ru'u b̄a la Elia.>> La Petrus nggahina b̄une ede kai wati loana ka'ao au ra nggahina ede.
34 Wakatu la Petrus mbuipu nuntuna, mai lalora apu ro ^bontona siad̄oho, ndad̄i siad̄oho dahuna. 35 Edempara d̄i ade apu ede wara ringa eli ma nggahi, <<Akeku Ana Nahu ra kad̄ale b̄a Nahu. Ringa ro kade'epu Sia!>>
36 Sawa'u b̄a dengga eli ede, siad̄oho edana Isa kese-Na ta ede. Anamori Isa namidi mpa mab̄oha sara'ana ede ro wati ngoana kone d̄i cou-cou rau mab̄oha au ra wa'u eda b̄a siad̄oho.
Isa Al-Masih Dimuliakan di Atas Gunung
Isa Al Masih katahona ana dou ra lu'ukai b̄a roh setan
9:37-43a
37 B̄ala aisanai Isa ro tolu dou anamori-Na londona d̄i doro ede, ro mboto dou ma mai raka Isa. 38 Sab̄ua dou mone d̄i ade weki dou mamboto ede kanggicana, <<Guru, ta tio to'ipu ana mada -- sia ede mpoa mpa ana mada! 39 Nggara namai deisi b̄a roh setan ede, sia nakanggica sadeka lalo mpa ro sarumbuna kiro sampe kabubu oi fela d̄i asana. Roh ede nakancoki ncauku sia ro wati ngawana losa d̄i sia! 40 Mada wa'ura rahoku d̄i anamori Ita loakud̄u siad̄oho katesana roh setan ede, pala siad̄oho wati loana.>>
41 Cambe b̄a Isa, <<Oe, nggomid̄oho ma kura imbi ro ma santuda! Sampe b̄une aiku Nahu pab̄uaku ngge'e sama lab̄o nggomid̄oho ro lembo ade d̄i nggomid̄oho? Mai wa'apu anamu ede!>>
42 Wakatu ana dou ede wunga lao rakana Isa, roh setan ede kuasakaina ana dou to'i ede, ndad̄ina ana dou ede ^batena wekina ro sarumbuna ndad̄i kiro. Pala Isa kauna roh setan ede losa ro ana dou ede taho lalona. Edempara ana dou ede d̄onggo mbalina d̄i amana. 43 Sara'a dou midi adena eda kuasa Allah Ta'ala ma ipi na'e.
Isa Al-Masih Menyembuhkan Seorang Anak yang Dikuasai Roh Jahat
Isa Al Masih ngoa walina mab̄oha madekai-Na
9:43b-45
Wakatu dou-dou mbuipu midi adena eda sara'a au ra karawi b̄a Isa, Sia nggahina d̄i anamori^doho-Na, 44 <<Tio kab̄aepu ro aina nefa nggahi ro eli Nahu ake: Nahu, Ana Manusia ^di^donggo d̄i kuasa manusia.>> 45 Pala anamori Isa wati loana ka'ao nggahi ro eli-Na ede. Lampa rawi ede wati katadana d̄i siad̄oho loakud̄u siad̄oho wati loana ka'ao. Pala siad̄oho nadahuku sod̄i mab̄oha lampa rawi ede d̄i Sia.
Cou ma ipi penti?
9:46-48
46 D̄i ade weki anamori Isa wontu cence ncihi mab̄oha couku d̄i ade weki siad̄oho ma ipi penti. 47 Isa nab̄adeku fiki ro kananu siad̄oho, b̄ara ndedena Sia wehana sab̄ua ana dou to'i ro kaki^dina ana dou to'i ede d̄i kompe-Na. 48 Edempara nggahi Sia d̄i anamori^doho-Na, <<Dou ma tarima ana dou ake b̄ara Nahu, aona natarimaku Nahu. Ro dou ma tarima Nahu, natarimaku Sia ma ranggadu Nahu. B̄ara dou ma ipi to'i d̄i ade weki nggomid̄oho, sia edeku ma ipi penti!>>
Sab̄ua dou ma laina anamori Isa Al Masih katesana roh setan
9:49-50
(Mrk. 9:38-40)
49 Nggahi la Yahya, <<Ruma, madad̄oho edamu dou ma katesa roh setan kai ngara Ita, pala madad̄oho kantamu sia, b̄a one sia laina anggota ndaita.>>
50 Edempara nggahi Isa d̄i la Yahya ro anamori-Na ma kalaina, <<Nggomi^doho, aina kantamu sia, b̄a one dou ma wati musu nggomid̄oho, aona dou ede anggota nggomid̄oho.>>
Isa Al Masih wati tarima ao b̄a dou-dou d̄i sab̄ua kampo d̄i Samaria
9:51-56
51 Ne'empara raka wakatuna Isa ^dikane'e ese saroga, Sia nane'e lao aka Yerusalem. 52 Edempara Sia kauna dou lao ulu. Dou-dou ra kau b̄a Sia ede laona, siad̄oho lu'una d̄i sab̄ua kampo d̄i Samaria d̄i sadiakaina au-au d̄i ru'u b̄a Isa. 53 Pala dou-dou d̄i kampo ede wati ngawana tarima ao Isa b̄a one Isa wunga laona aka Yerusalem. 54 Wakatu anamori Isa, eded̄u la Yakub ro la Yahya b̄adena mab̄oha lampa rawi ede, nggahi siad̄oho, <Ruma, Ita mangawa, madad̄oho ma ou afi ra d̄i langi ^dimaka'a kaleli dou-dou ake?>>l
55 Isa tambarina, edempara nggahikaina sia^doho.m 56 Sawa'u b̄a ede siad̄oho laona aka kampo ma kalai.
Dou-dou ma ne'e ndad̄i ana mori Isa Al Masih
9:57-62
(Mat. 8:19-22)
57 Wakatu Isa o anamorid̄oho-Na wunga lampa ro lao walina, wara dou manggahi d̄i Isa, <<Guru, mada kane'e b̄atu Ita ta b̄e ralaokai Ita!>>
58 Cambe b̄a Isa, <<Lako doro nantau karombo, ro nasi nantau so^bu, pala Ana Manusia wati ntauna hid̄i ndorekaina.>> 59 Edempara nggahi Isa d̄i sab̄ua dou ma kalaina, <<^Batupu Nahu.>>
Pala nggahi dou ede, <<Guru, takau to'ipu mada dula wa'u ^di'umbukaiku ama mada ma wa'ura made.>>
60 Cambe b̄a Isa, <<Co'opu dou ma made na'umbu mpa b̄a dou ma made. Pala nggomi, laopu ro ngoa ro kahabapu d̄i sanikina hid̄i mab̄oha Karaja'an Allah.>>
61 Wara rau sab̄ua dou makalaina ma nggahi, <<Guru, mada kane'e b̄atu Ita, pala takau to'ipu mada dula wa'u, mada kane'e ngoa wi'i wa'u dou d̄i umaku.>>
62 Nggahi Isa d̄i dou ede, <<Dou ma wa'ura tampu'u rawi dana, edempara tambarina, dou ede wati patuna d̄imandad̄i anggota Karaja'an Allah.>>