Mab̄oha ainaina Sabat
6:1-5
6
D̄i sab̄ua ainaina Sabat, wakatu Isa ro anamorid̄oho-Na lampa saina oma gandum, anamorid̄oho-Na pokena gandum. Siad̄oho rujuna gandum ede kai rimana, edempara ngahana. 2 Nggahi dou-dou Farisi, <<^Ba^bauku nggomid̄oho sapakaimu hukum-hukum agama ndaita kai karawimu ra kantakai d̄i ainaina Sabat?>>3 Cambe b̄a Isa, <<Sab̄ua watipu rabaca b̄a nggomid̄oho mab̄oha au ra karawi b̄a la Daud, wakatu sia ro dou-dou mab̄atuna iuna hi^do? 4 Sia lu'una d̄i ade Bait Allah ro wehana roti ra wa'u d̄onggo ro mbei d̄i Allah Ta'ala, edempara ngahana. Sawa'u b̄a ede mbei rauna roti ede d̄i dou-dou ma^batuna. Sapodakaina nggahi b̄a hukum agama ndaita, imam-imam mpa ma loana ngaha roti ede.>>
5 Edempara nggahi Isa, <<Ana Manusia nantau kuasa ^dima'ato ainaina Sabat!>>
Isa Al Masih katahona dou ma made ^binci rima d̄i ainaina Sabat
6:6-11
6 D̄i sab̄ua ainaina Sabat ma kalai sawa'u b̄a ede, Isa lao ngoa ro teina d̄i uma sambea ro ibadakai. Ta ede wara dou ma made ^binci sa^bae rimana. 7 Ahli-ahli Taurat ro dou-dou Farisi mane'e ngupa rawi ncara Isa loakud̄u da'awana Sia. Ndad̄i siad̄oho tio kab̄ae ncauna sab̄ua Sia nakatahoku dou d̄i ainaina Sabat atao wati. 8 Pala Isa nab̄adeku kananu siad̄oho.Edempara nggahi Sia d̄i dou ma made ^binci rimana ede, <<Mai ki^dipu d̄i tando ake!>> Dou ede tu'una, edempara ki^dina ta ede. 9 Edempara Isa sod̄ina d̄i dou-dou ma wara ta ede, <<Nggahi b̄a atoran agama, auku d̄i loa karawi b̄a ndai d̄i ainaina Sabat? Karawi ma taho atao karawi ma iha? Kasalama dou atao ka'ihaku dou?>> 10 Isa ntanda hekona dou-dou ma wara ta ede, edempara nggahinaf d̄i dou ede, <<^Dalapu rimamu.>> Dou ede ^dalana rimana ma made ^binci ede, ro rimana ndad̄i taho.
11 Pala ahli-ahli Taurat ro dou-dou Farisi ede mbani podana, ro tampu'ura mafakana mab̄oha auku d̄ikarawi b̄a siad̄oho d̄i Isa.
Isa Al Masih kad̄alena sampuru d̄ua dou rasul
6:12-16
12 Di wakatu ede Isa tekana d̄i sab̄ua doro to'i, Sia nane'e do'a. Ta ede Sia do'ana d̄i Allah Ta'ala sa^bala ai mantuki. 13 Wakatu wa'ura taroa ai, Sia ouna dou-dou ma ^batu-Na, edempara kad̄alena sampuru d̄ua dou d̄i ade weki siad̄oho.Tangarakai b̄a Sia sampuru d̄ua dou ede rasul. Siad̄oho eded̄u: 14 la Simon ^dipehe rau kai b̄a Sia la Petrus, ro la Andreas ari la Simon; la Yakub, Yahya, Filipus ro la Bartolomeus, 15 La Matius, Tomas, Yakub ana la Alfeus, ro la Simon ^dipehe rau kai la Patriot, 16 la Yudas ana la Yakub ro la Yudas Iskariot eded̄u ma d̄onggo Isa d̄i dou-dou ma musu-Na.
Isa Al-Masih Memilih Dua Belas Orang Pengikut-Nya
Isa Al Masih ngoa ro tei ro katahona dou-dou ma supu
6:17-19
(Mat. 4:23-25)
17 Edempara Isa ro rasul-rasul ede londona d̄i doro to'i ede, ro ki^dina d̄i sab̄ua hid̄i ma piri. Ta ede wara mboto poda anamori Isa ma kalai ro mboto dou ma ramai ta b̄e-b̄e ra d̄i sara'a Yudea, Yerusalem, ro dou-dou ma ngge'e d̄i kengge moti kota Tirus ro kota Sidon. 18 Siad̄oho maina ta ede b̄a ne'ena ringa ngoa ro tei b̄a Isa, ro nane'eku kataho wea supuna. Siad̄oho ralu'ukai b̄a roh setan, mai rauna d̄i hid̄i ede ro siad̄oho kataho rau b̄a Isa. 19 Sara'a dou na'usahaku ^dama Isa, b̄a one wara kuasa ma losa d̄i weki-Na ma kataho sara'a supu siad̄oho.
Neo ade, ^dihi ade ro ncoki ade
6:20-26
(Mat. 5:1-12)
20 Isa ntandana anamorid̄oho-Na ro nggahina,
<<Taho ro sanara nggomid̄oho dou-dou mancoki mori,
b̄a one nggomid̄oho eded̄u anggota ela Karaja'an Allah.
21 Taho ro sanara nggomid̄oho ma wakatu ake hi^do;
b̄a one nggomid̄oho ^dipaha kambocu!
Taho ro sanara nggomid̄oho ma wakatu ake manangi;
b̄a one nggomid̄oho ^dimahari!
22 Taho ro sanara nggomid̄oho nggara daca'usi b̄a dou, ^ditula, d̄ikab̄awa ro katuna ro ^difitina b̄a dou b̄ara Nahu, Ana Manusia! 23 Nabi-nabi aipu jaman mantoi wa'ura karawi b̄une ede rau b̄a dou. Nggara nanda^disi lampa rawi ede d̄i nggomid̄oho pab̄uapu neo ademu, b̄a one ufamu d̄i saroga nana'eku.
24 Pala ihara nggomid̄oho ma ntau ro wara d̄i wakatu ake;
b̄a one nggomid̄oho wa'ura iu sara'amu caru mori!
25 Ihara nggomid̄oho ma mbocu wakatu ake;
b̄a one nggomid̄oho ^dimasarahi^do!
Ihara nggomid̄oho ma hari wakatu ake;
b̄a one nggomid̄oho ^dimancoki ade ro ^dimanangi!
26 Ihara nggomid̄oho, nggara sara'a dou roina nggomi; b̄ara ndede rauku wa'i ro waro siad̄oho naroiku nabi-nabi palasu d̄i jaman mantoi.>>
Ucapan Bahagia Isa Al-Masih
Meci ro ca'upu musu-musumu
6:27-36
27 <<Pala d̄i ru'u b̄a nggomid̄oho ma ringa ro kade'e nggahi ro eli Nahu d̄i wakatu ake, Nahu manggahi d̄i nggomi^doho: meci ro ca'upu musu-musumu, ro karawipu mataho d̄i dou-dou ma daca'u nggomid̄oho. 28 Do'apu loakud̄u Allah Ta'ala barekana dou-dou ma i'a ro ^ba'a nggomid̄oho, ro do'a weapu d̄i ru'u b̄a dou-dou ma karawi dab̄ae d̄i nggomid̄oho. 29 Nggara natopasi b̄a dou rawemu ma sa^bae, co'opu sia topa rauna rawemu ma sa^baena. Nggara naweha rampasi b̄a dou jumbamu, mbei raupu ^bajumu. 30 Narahosi b̄a dou au-au d̄i nggomi, mbeipu au ra rahona ede d̄i sia; ro naweha rampasi ntaumu, aina raho mbalimu. 31 Karawipu mataho d̄i dou makalai b̄une d̄i ne'e b̄a nggomid̄oho karawi b̄a dou d̄i weki ndaimu.
32 Nggara nggomid̄oho mameci ro ca'usi dou mameci ro ca'u nggomid̄oho mpoa, auku jasamu? Dou madosa rau nameci ro ca'uku dou-dou ma meci ro ca'u sia^doho! 33 Ro nggara nggomid̄oho makarawisi mataho d̄i dou-dou ma karawi mataho d̄i nggomid̄oho mpoa, auku jasamu? Dou madosa rau nakarawiku b̄une ede! 34 Ro nggara nggomid̄oho mambeisi sepe piti d̄i dou-dou ma wa'u cepe mbali, auku jasamu? Dou madosa rau nambeiku sepe piti d̄i dou madosa, sawa'u b̄a ede naraho mbaliku! 35 Pala nggomid̄oho aina karawimu b̄une ede! Nggomid̄oho pab̄uapu meci ro ca'u musu-musumu ro karawipu ma taho d̄i siad̄oho.Nggomid̄oho pab̄uapu mbei sepe, ro aina kamadamu ^dimambali. Nggara makarawisi b̄une ede, ufamu ^dimana'e ro nggomid̄oho d̄imandad̄i ana-ana Allah Ma Wancu ^Dese Ro Ntasa. B̄a one Allah Ta'ala nancera ro mbura adena d̄i dou-dou ma wati b̄ade tarima kasi, ro d̄i dou ma dab̄ae rau. 36 Nggomid̄oho pab̄uapu ntau kasi ade d̄i sara'a dou b̄une Amamu makasi ade rau!>>
Sabda Isa Al-Masih di Bukit
Mab̄oha kancara dou
6:37-42
(Mat. 7:1-5)
37 <<Aina kancaramu dou makalai, loakud̄u ndai nggomid̄oho rau wati ^dikancara b̄a Allah Ta'ala. Aina hukummu dou makalai, loakud̄u ndai nggomid̄oho wati d̄ihukum b̄a Allah Ta'ala. Kangampupu dou makalai, loakud̄u Allah Ta'ala rau ^dimakangampu wea nggomid̄oho. 38 Mbeipu d̄i dou makalai, loakud̄u Allah Ta'ala d̄imambei rau d̄i nggomi^doho; nggomid̄oho d̄imatarima ma remba ma wa'ura taka rase d̄i ru'u b̄a nggomid̄oho.B̄a one taka rakani b̄a nggomid̄oho d̄i ru'u b̄a dou makalai ^dikani rau b̄a Allah Ta'ala d̄i ru'u b̄a nggomid̄oho.>>
39 Edempara Isa caritana d̄i siad̄oho conto ro ibara ake, <<Nggara dou mambuda nad̄anda ro wa'asi dou mambuda ma kalaina, tantu d̄uana ede ^dimama^bu ade lapa. 40 Wati wara anamori ma ese mai b̄a guruna. Pala anamori ma wa'ura nggori sakolana, d̄imandad̄i sama b̄une guruna.
41 ^Ba^bauku nggomid̄oho loakaimu eda fai haju ade isi mada cina ro angimu, pala haju balo d̄i ade isi mada ndaimu wati ne'emu b̄ade b̄a nggomid̄oho? 42 ^Buneku loamu nggahi b̄a nggomid̄oho d̄i cina ro angimu, <Mai cina, nahu ^dimakalosana fai haju ede ra d̄i ade isi madamu,> sapodakaina d̄i ade mada ndaimu wara haju balo ma wati ra eda b̄a nggomid̄oho? Oe dou munafik! Kalosa wa'upu haju balo ma wara d̄i isi mada ndaimu. Ede ampomu loa eda kab̄ae b̄a nggomid̄oho ro ^diloakaimu kalosa fai haju d̄i ade isi mada cina ro angimu.>>
Fu'u haju ro wuana
6:43-45
43 <<Fu'u haju ma ngawa wati mbuana wua ma iha. Ndede rauku fu'u haju ma darere wati mbuana wua ma taho. 44 Sanikina fu'u haju mapataku d̄i wuana. Humpa rui wati mbuana wua ara, ro mpori rui wati mbuana wua anggo. 45 Dou ma taho nakarawiku lampa rawi mataho b̄ara adena b̄ini b̄a rawi mataho. Dou ma dab̄ae nakarawiku ma dab̄ae b̄ara adena b̄ini kai b̄a rawi ma da^bae. B̄a one au ra renta b̄a asana edeku ma ralosa ra d̄i adena.>>
^Dua mbua dasa uma
6:46-49
(Mat. 7:24-27)
46 <<^Ba^bauku nggomid̄oho oukaimu Nahu, <Ruma, Ruma,> pala wati karawimu au ra ngoa ro tei b̄a Nahu? 47 Dou ma mai d̄i Nahu ro ringa ro kade'ena nggahi ro eli Nahu -- Nahu manggahi d̄i nggomid̄oho, couku ^diloa ntewikai sia. 48 Sia b̄une dou ma wunga tu'u uma mangari kad̄ei poda dasana, edempara ndawina dasa ese wawo wadu. Wakatu mai mbere ro oi sori ma mai ncora uma ede, uma ede wati wa'una karuku b̄a mbere, b̄a one ra tu'u ese wawo dasa ma tenggo. 49 Pala dou ma ringa ro kade'e nggahi ro eli Nahu ro wati kalampana, eded̄u b̄une santika sab̄ua dou ma tu'u uma kai wati kanina dasa. Nggara maisi mbere mancora uma ede, uma ede nandumba; ro na'ipiku ihana!>>